26/05/2026
Asetet e konfiskuara që krimi dhe korrupsioni i marrin mbrapsht
Lexon lajme të rreme çdo ditë dhe duhet t’i përtypësh. Një nga këto ishte edhe 61 milion euro asete të sekuestruara që u janë kthyer komunitetit. Me 61 milion euro do të kishim të paktën komunitete, hapësira dhe shërbime për ta, përfaqësim dhe organizim.
Kam qenë bashkë me Ecovolis pjesë e një projekti për rikthimin e aseteve të sekuestruara nga krimi i organizuar te komuniteti. Ishte eksperienca më e dështuar në 25 vite shoqëri civile. Natyrisht kishim edhe ne përgjegjësinë tonë, që nuk e ngritëm zërin mjaftueshëm; normalisht ishim edhe të kërcënuar.
Por akoma më keq, nuk folën as institucionet e BE-së, që e kishin detyrë dhe mbrojtje institucionale. Përkundrazi, kërkuan që ne si organizatë të përballeshim me grupin e strukturuar kriminal që na kishte bllokuar tokën.
I njëjti mosreagim publik ishte edhe nga Agjencia e Sekuestrimit dhe Administrimit të Pasurive të Konfiskuara. Më tej kuptuam qartë si funksiononte: nëpërmjet proceseve gjyqësore, ku shteti nuk kishte vullnetin as qëllimin t’i mbante dhe administronte këto prona e pasuri, grupet dhe individët arrinin t’i merrnin përsëri në shumë forma.
Asetet e sekuestruara nga krimi dhe korrupsioni do t’i jepnin frymë komunitetit. Ato i janë vjedhur atij në shumë mënyra. Por një shtet, një sistem që ka bazuar më shumë se gjysmën e ekonomisë në pasuri nga krimi dhe korrupsioni, siç u duk, nuk kishte as interes t’i kthente këto prona në komunitet, sesa të heshtte dhe t’ia kthente “të zotëve”.
Është pabesi e madhe nga institucionet si BE dhe ambasadat në vend që dalin në këto shfaqje propagandistike dhe vulosin me deklaratat e tyre politika që jo vetëm nuk funksionojnë, por kanë varfëruar ndjeshëm çdo komunitet, çdo sipërmarrje dhe çdo iniciativë të mirë të shoqërisë civile.
Në fund, ata e duan që asgjë të mos funksionojë, por hipokrizia duket se nuk ka kufij në vendin tonë. Që ta bëjnë të duket sikur punojnë, ne nuk bëjmë dot sikur besojmë.
Si mund të përdoreshin në të vërtetë toka, vila, magazina të sekuestruara nga krimi i organizuar?
Ato mund të ktheheshin në ferma edukimi për të rinjtë, për t’u dhënë një profesion.
Në qendra komunitare për komunitetin, ku të mblidhet dhe të organizohet për të zhvilluar në mënyrë njerëzore dhe për të mbrojtur lagjen e tij.
Për të rinjtë në qendra kulturore, arti dhe aktivizmi.
Për të moshuarit në qendra me aktivitete dhe ndihmë.
Për fëmijët në qendra krijimi.
Për të gjithë bashkë në programe komunitare që financohen nga paratë e krimit dhe korrupsionit.
Për sa kohë kjo nuk ndodh, është jo vetëm përgjegjësi e një shteti bashkëpunues në kthimin e tyre te krimi dhe korrupsioni, por edhe e institucioneve hipokrite që e ngrenë këtë dështim si flamur.
