KSSH-Federata Sindikatave Administrates Publike e Sherb.Civil Shqiperise

25/07/2026

🇦🇱🇪🇺📌 KSSH mori pjesë në tryezën e konsultimit publik mbi projektligjin e ri “Për Shërbimet Digjitale në Republikën e Shqipërisë”.

Në këtë tryezë konsultimi morën pjesë Ministri i Ekonomisë, Kulturës dhe Inovacionit, Enea Karakaçi, përfaqësues të Delegacionit të Bashkimit Evropian në Tiranë, përfaqësues të institucioneve publike, ekspertë dhe organizata të shoqërisë civile, të cilët diskutuan mbi projektligjin që synon harmonizimin e legjislacionit shqiptar me standardet e Bashkimit Evropian në fushën e shërbimeve digjitale.

Konfederata e Sindikatave të Shqipërisë (KSSH) u përfaqësua nga Presidenti Kol Nikollaj dhe Zv.Presidentja Anisa Subashi, si dhe Sekretare e Përgjithshme e Federatës së Sindikatave të Administratës Publike dhe Shërbimit Civil të Shqipërisë (FSAPSHCSH), e cila është gjithashtu personi i ngarkuar nga KSSH për ndjekjen e proceseve integruese të Republikës së Shqipërisë në Bashkimin Evropian.

Gjatë diskutimeve u evidentua rëndësia e krijimit të një mjedisi digjital më të sigurt, transparent dhe të besueshëm, me mbrojtje më të fortë për përdoruesit dhe konsumatorët, si dhe roli i këtij projektligji në avancimin e transformimit digjital dhe përshpejtimin e procesit të integrimit evropian të vendit.

Për KSSH-në, harmonizimi i legjislacionit me acquis të Bashkimit Evropian duhet të garantojë gjithashtu mbrojtjen e të drejtave të punëmarrësve në ekonominë digjitale, promovimin e dialogut social dhe përfshirjen e partnerëve socialë në hartimin e politikave që ndikojnë në botën e punës.

KSSH mbetet e angazhuar për të kontribuar në proceset e reformimit dhe integrimit evropian të Shqipërisë, duke mbështetur politika që ndërthurin zhvillimin digjital me standardet sociale dhe të drejtat e punëmarrësve.

🇦🇱🇪🇺

DialoguSocial TransformimiDigjital

16/07/2026

16.07.2026 📍EESC, Bruksel

📌 Sesioni i 607-të Plenar i EESC-së: Debat i Nivelit të Lartë të EESC mbi Zgjerimin e BE-së

Sot, në selinë e Komitetit Ekonomik dhe Social Evropian (EESC) në Bruksel, u zhvillua Debati i Nivelit të Lartë mbi Zgjerimin e Bashkimit Evropian (EU High-Level Debate on Enlargement), me pjesëmarrjen e përfaqësuesve të institucioneve evropiane, vendeve kandidate, partnerëve socialë dhe organizatave të shoqërisë civile.

Në këtë aktivitet mori pjesë Anisa Subashi Zëvendës Presidentja e Konfederatës së Sindikatave të Shqipërisë (KSSH), si dhe Sekretare e Përgjithshme e Federatës së Sindikatave të Administratës Publike dhe Shërbimit Civil të Shqipërisë (FSAPSHCSH), në cilësinë e Anëtare Kandidate e Zgjerimit të EESC, duke përfaqësuar KSSH-në në diskutimet mbi rolin e dialogut social dhe të partnerëve socialë në procesin e integrimit evropian.

Në fjalën e saj, Komisionerja Evropiane për Zgjerimin, Marta Kos, theksoi se zgjerimi i Bashkimit Evropian është një investim strategjik për paqen, sigurinë dhe prosperitetin e kontinentit. Ajo nënvizoi se procesi i anëtarësimit nuk kufizohet vetëm në përmbushjen e kritereve teknike, por kërkon reforma të thella në shtetin e së drejtës, demokraci funksionale, ekonomi konkurruese dhe përfshirje aktive të partnerëve socialë dhe shoqërisë civile. Komisionerja Kos vlerësoi se dialogu social dhe pjesëmarrja e organizatave sindikale janë elemente kyçe për ndërtimin e një Evrope më të fortë, më gjithëpërfshirëse dhe më konkurruese.

Gjatë debatit u trajtuan gjithashtu sfidat dhe mundësitë që sjell procesi i zgjerimit për vendet kandidate, rëndësia e përshpejtimit të reformave dhe nevoja për forcimin e bashkëpunimit ndërmjet institucioneve evropiane, partnerëve socialë dhe shoqërisë civile.
Pjesëmarrja e KSSH-së në këtë aktivitet riafirmon angazhimin e saj për të kontribuar aktivisht në procesin e integrimit evropian të Shqipërisë dhe për të promovuar rolin e dialogut social dhe të lëvizjes sindikale në përmbushjen e standardeve evropiane.

06/07/2026

2–4 korrik 2026, 📍Padova, Itali,

📌 Kongresi i 19-të i UIL (Unione Italiana del Lavoro), me temë “Puna e së ardhmes, angazhimi i së tashmes – Inovacioni, njerëzit dhe të drejtat në epokën e Inteligjencës Artificiale”.

Në Kongres morën pjesë mbi 3000 pjesëmarrës, ndër të cilët: delegatë, përfaqësues të organizatave sindikale evropiane e ndërkombëtare, Drejtori i ILO ACTRAC, TUAC, institucione shtetërore dhe partnerë socialë.

Nga Shqipëria, në këtë Kongres mori pjesë Konfederata e Sindikatave të Shqipërisë (KSSH), e vetmja organizatë sindikale shqiptare, përfaqësuar nga Kol Nikollaj, President i KSSH dhe Anisa Subashi, Sekretare e Përgjithshme e Federatës së Sinfikatave të Administratës Publike dhe Shërbimit Civil të Shqipërisë (FSAPSHCSH), duke riafirmuar marrëdhëniet e ngushta të bashkëpunimit me UIL dhe partnerët ndërkombëtarë, si dhe angazhimin për shkëmbimin e përvojave në mbrojtje të të drejtave të punëmarrësve, forcimin e dialogut social dhe duke shkëmbyer përvoja mbi sfidat e përbashkëta të botës së punës.

🗣️📢 Në raportin e tij, Sekretari i Përgjithshëm i UIL, Pierpaolo Bombardieri, theksoi se sindikata duhet të jetë protagoniste në proceset e transformimit ekonomik dhe teknologjik, duke mbrojtur të drejtat e punëmarrësve, sigurinë në punë, pagat e drejta dhe kontraktimin kolektiv. Ai nënvizoi rëndësinë e dialogut social me institucionet, por njëkohësisht riafirmoi autonominë e plotë të UIL dhe angazhimin për të mbrojtur interesat e punëmarrësve pa ndikime politike.

👩‍🦰 Në punimet e Kongresit mori pjesë edhe Kryeministrja e Italisë, Giorgia Meloni, e cila riafirmoi gatishmërinë e qeverisë për të ruajtur dialogun me partnerët socialë. Ajo theksoi rëndësinë e kontraktimit kolektiv për garantimin e pagave të drejta, angazhimin për përmirësimin e sigurisë në punë, mbështetjen e punësimit të qëndrueshëm dhe nevojën që zhvillimi i inteligjencës artificiale të shoqërohet me një qasje që vendos njeriun dhe dinjitetin e punës në qendër të politikave publike.

Në Kongresi morën pjesë edhe drejtuesit e dy konfederatave të tjera kryesore italiane, ku:

🗣️ Sekretari i Përgjithshëm i CGIL, Maurizio Landini, theksoi se uniteti i lëvizjes sindikale është kusht i domosdoshëm për të garantuar paga më të mira, punësim cilësor dhe mbrojtje efektive të të drejtave të punëmarrësve. Ai bëri thirrje për një bashkëpunim më të ngushtë ndërmjet organizatave sindikale përballë sfidave ekonomike dhe sociale.

🗣️ Sekretarja e Përgjithshme e CISL, Daniela Fumarola, vuri në dukje rëndësinë e dialogut social, pjesëmarrjes aktive të punëmarrësve në proceset vendimmarrëse dhe forcimit të kontraktimit kolektiv.

Punimet e Kongresit përfunduan me rizgjedhjen e Pierpaolo Bombardieri në krye të UIL për një mandat të ri, si dhe me miratimin e prioriteteve strategjike të organizatës për vitet në vijim.

06/07/2026

30 qershor – 1 korrik 2026 📍 Jerevan, Armenia
📌 Takimi vjetor i Shkollës Verore të PERC.

Në datat 30 qershor – 1 korrik 2026, në Jerevan të Armenisë, u zhvillua Shkolla Verore e Këshillit Pan-Evropian të Sindikatave (PERC), me pjesëmarrjen e përfaqësuesve të organizatave sindikale nga rajoni, si dhe të përfaqësuesve të Konfederatës Ndërkombëtare të Sindikatave (ITUC), Organizatës Ndërkombëtare të Punës (ILO), Institutit Evropian të Sindikatave (ETUI) dhe organizatave të tjera partnere.

Programi i punimeve u fokusua në analizën e zhvillimeve aktuale në botën e punës, ndikimin e transformimit teknologjik dhe inteligjencës artificiale në tregun e punës, sfidat për mbrojtjen e të drejtave të punëmarrësve dhe forcimin e dialogut social, si dhe mbrojtja e dialogut Social në kohë sfiduese dhe adresimi i presioneve mbi të drejtat e sindikatave dhe forcimi i zërit kolektiv.

Gjithashtu, u trajtuan zhvillimet më të fundit në kuadër të ILO-së, Konventa e ILO 193 për Punonjësit e Platformës dhe të ITUC, përfshirë përgatitjet për Kongresin e ardhshëm të ITUC-së, ndryshimet statutore, proceset zgjedhore dhe prioritetet strategjike të lëvizjes sindikale ndërkombëtare.

Një rëndësi e veçantë iu kushtua promovimit të punës së denjë si bazë për paqen, zhvillimin e qëndrueshëm dhe rritjen e rezistencës sociale, përmes prezantimit të praktikave dhe projekteve të realizuara në nivel rajonal dhe ndërkombëtar. Diskutimet interaktive krijuan mundësi për shkëmbimin e përvojave dhe praktikave më të mira ndërmjet organizatave pjesëmarrëse.

Takimi u përmbyll me një sesion përmbledhës, ku u theksua rëndësia e bashkëpunimit rajonal, koordinimit të veprimeve sindikale dhe angazhimit të përbashkët për mbrojtjen e të drejtave të punëmarrësve, forcimin e dialogut social dhe përballimin e sfidave të reja në botën e punës.

04/07/2026

03/07/2026