27/04/2025
Në një atmosferë të ngrohtë akademike, shpirtërore dhe kremtimi kulturor, Kolegji Universitar Bedër organizoi me sukses edicionin e katërt të konkursit ndërkombëtar “Urtësitë e Traditës Profetike”, duke sjellë në vëmendje trashëgiminë e ndritur dhe vlerat universale të mësimeve të Profetit Muhamed (a.s.).
Me pjesëmarrjen e rreth 400 garuesve nga shkolla 9-vjeçare, gjimnaze dhe universitete, aktiviteti kapërceu sërish kufijtë kombëtarë, duke mirëpritur konkurrentë nga Kosova, Maqedonia e Veriut, Italia, Luksemburgu, Kirgistani dhe Nigeria. Të rinjtë, të udhëhequr nga dashuria për dijen dhe përkushtimi ndaj traditës profetike, sollën krijimtari që pasqyronte jo vetëm njohuri akademike, por edhe ndjenjën e thellë të përkatësisë shpirtërore ndaj mësimeve hyjnore.
Ambientet e Kolegjit Universitar Bedër u shndërruan në një qendër të gjallë reflektimi shpirtëror, ku pjesëmarrësit ekspozuan projektet e tyre në një ekspozitë posterash plot kreativitet dhe frymëzim. Çdo projekt ishte një përpjekje për të përcjellë vlerat e larta të mëshirës, drejtësisë, dhe devocionit që buronin nga tradita profetike, duke ndërthurur harmonikisht dijen shkencore me dritën e besimit.
Në vijim të ekspozitës, u zhvillua ceremonia solemne e ndarjes së çmimeve, e moderuar me përkushtim nga z. Dritan Boriçi dhe znj. Esmeralda Pashollari. Programi u pasurua me lexim të Kuranit Famëlartë, poezi frymëzuese që thërrisnin në përkushtim dhe reflektim, interpretime të ilahive që lartësonin zemrat , duke krijuar një atmosferë mbresëlënëse tek pjesëmarrësit.
Në fjalën e tij përshëndetëse, Rektori i Kolegjit Universitar Bedër, Prof. Dr. Gjergji Sinani, theksoi rëndësinë e nismave që nxisin dijen, kultivojnë virtytin dhe e lidhin edukimin me ndriçimin shpirtëror. Ndërkohë, nënkryetari i Komunitetit Mysliman të Shqipërisë, z. Taulant Bica, vuri në dukje nevojën jetike për gjallërimin dhe mishërimin e sunetit profetik në jetën e përditshme, duke e parë atë si një udhërrëfyes të domosdoshëm në ndërtimin e një jete të përkushtuar dhe të ndriçuar.
Në përmbyllje, juria e konkursit shpalli fituesit në secilën kategori, duke përmbyllur me sukses një aktivitet ku dijeja, besimi dhe tradita profetike u ndërthurën për të përcjellë një mesazh shprese dhe frymëzimi për brezat e rinj.
