02/09/2026
▪️NEKROLOGJI
“Çdo shpirt do ta shijojë vdekjen.”
(Kur’an, Ali Imran, 185)
Me pikëllim të thellë mësuam lajmin për ndarjen nga jeta të Prof. Dr. Muharrem Dezhgiut, një prej personaliteteve të shquara të historiografisë shqiptare, historian dhe studiues i përkushtuar, veprimtaria e të cilit la gjurmë të çmuara në jetën akademike dhe kulturore të vendit.
Ndarja e tij nga kjo jetë përbën një humbje të ndjeshme për botën akademike shqiptare, për studiuesit dhe institucionet shkencore e kulturore, si dhe për të gjithë ata që patën nderin ta njohin, ta kenë bashkëpunëtor dhe të përfitojnë nga dija e përvoja e tij.
Për Institutin Shqiptar të Mendimit dhe Qytetërimit Islam (AIITC), Prof. Dezhgiu ishte një bashkëpunëtor i çmuar dhe një pjesë e rëndësishme e historisë së tij institucionale. Si anëtar i Bordit të AIITC-së, ai i shërbeu ndër vite veprimtarisë së Institutit me dijen, përvojën dhe autoritetin e tij akademik, duke dhënë një kontribut të vyer në rrugëtimin e tij.
Një vend të veçantë në këtë bashkëpunim zë edhe revista shkencore-kulturore “Univers”, ku Prof. Dezhgiu ishte anëtar i redaksisë dhe bashkëpunëtor i saj. Përkushtimi dhe kontributi i tij ndihmuan në pasurimin e përmbajtjes së revistës dhe në ruajtjen e nivelit të saj shkencor e kulturor.
🤲🏻 AIITC do ta kujtojë Profesor Muharremin me respekt, mirënjohje dhe nderim të thellë, për seriozitetin, përkushtimin, urtësinë dhe vlerën që i dha ndër vite veprimtarisë së Institutit dhe jetës akademike shqiptare.
Në këto çaste dhimbjeje, i shprehim ngushëllimet tona më të sinqerta familjes, të afërmve, kolegëve, studentëve dhe të gjithë bashkëpunëtorëve të tij. Lusim Allahun e Madhëruar ta mëshirojë, t'ia falë të metat dhe ta shpërblejë për dijen dhe kontributin e tij në shërbim të shoqërisë.
🤲🏻 Allahu e pastë në mëshirën e Tij të pafundme!
▪️ Qoftë i përjetshëm kujtimi i Prof. Dr. Muharrem Dezhgiut!
