Shoqata e të Verbërve të Shqipërisë

03/02/2026

Deklaratë për shtyp e SHVSH mbi gjuhën diskriminuese në Big Brother VIP Albania 5

Tiranë, 3 shkurt 2026

Shoqata e të Verbërve të Shqipërisë (SHVSH) dënon me forcë gjuhën e përdorur ndaj konkurrentit të verbër, Stenaldo Mëhilli, ku verbëria u etiketua si “dënim” apo “mallkim” (“Ty të ka dënuar Zoti / të ka mallkuar Zoti”). Kjo është një formë e qartë diskriminimi (ableizëm) dhe një mesazh i rrezikshëm që cenon dinjitetin njerëzor dhe ushqen paragjykimet ndaj personave me aftësi të kufizuara.

Verbëria nuk është “dënim”, nuk është “mallkim”, dhe nuk është arsye për poshtërim publik. Një gjuhë e tillë nuk sulmon vetëm një individ; ajo prek një komunitet të tërë dhe normalizon përjashtimin social, bullizmin dhe stigmatizimin—sidomos kur transmetohet në një format me audiencë masive.

1) Dënimi i veprimit

SHVSH kërkon:
• Distancim të qartë dhe publik nga kjo gjuhë diskriminuese;
• Ndjesë publike ndaj konkurrentit dhe komunitetit të personave me aftësi të kufizuara;
• Zbatim të menjëhershëm të rregullores dhe masave disiplinore për çdo gjuhë urrejtjeje/diskriminimi brenda formatit;
• Standard “zero tolerancë” ndaj çdo forme denigrimi që lidhet me aftësinë e kufizuar.

Kjo nuk është “lojë”, as “debat i nxehtë”: është shkelje e etikës njerëzore dhe e përgjegjësisë publike që duhet të mbajë çdo personazh televiziv dhe çdo produksion.

2) Mbështetja për lojën dhe dinjitetin e Stenaldos

SHVSH shpreh solidaritet dhe mbështetje të plotë për Stenaldon, i cili ka hyrë në këtë format me synimin për të konkurruar si i barabartë, pa kërkuar trajtim të veçantë dhe duke treguar se aftësia e kufizuar nuk e zbeh vlerën, karakterin dhe kapacitetin e një njeriu.

Pjesëmarrja e tij është një hap i rëndësishëm për përfaqësimin, dhe çdo tentativë për ta ulur me fjalë që e lidhin verbërinë me “dënim” është sulm ndaj dinjitetit dhe barazisë.

Thirrje për përgjegjësi publike

I bëjmë thirrje Top Channel dhe produksionit që ta trajtojnë këtë ngjarje me seriozitet maksimal: jo thjesht si incident, por si moment që kërkon qëndrim edukues, sqarim publik dhe garanci që gjuha diskriminuese nuk kthehet në “normë” të spektaklit.

SHVSH mbetet e gatshme të kontribuojë me ekspertizë për komunikim jo-diskriminues dhe ndërgjegjësim publik.

Jonit Ferhati
Kryetar, Shoqata e të Verbërve të Shqipërisë (SHVSH)
Top ChannelBig Brother VIP Albania Stenaldo Mëhilli

04/12/2025

🏢 NJOFTIM – GODINË PËR SH*TJE / QIRA

Shoqata e të Verbërve të Shqipërisë njofton se është në dispozicion një godinë 4-katëshe me sipërfaqe rreth 6,500 m², së bashku me truall rrethues prej 13,000 m², e përshtatshme për aktivitete të ndryshme sociale, arsimore, komunitare apo biznesi.

📍 Vendndodhja: Vaqarr, Rruga e Arbanës (Fortuzaj-Damjan), Tiranë
🏗️ Gjendja e objektit: E mirë, me ashensor funksional dhe hapësira të mëdha të brendshme dhe të jashtme.

🔹 Për çfarë mund të shfrytëzohet objekti:
– Qendër komunitare
– Institucion arsimor/trajnim
– Ambjent për aktivitete sociale ose kulturore
– Qendër rehabilitimi
– Zyra, depo, qendër biznesi
– Projekte të organizatave jofitimprurëse
– Çdo aktivitet tjetër që kërkon sipërfaqe të gjerë dhe strukturë të përshtatshme

Objekti ofron fleksibilitet të lartë, parkim të bollshëm dhe mundësi zhvillimi të mëtejshëm në truallin përreth.

NJOFTIM PËR SH*TJE OSE DHËNIE ME QIRA

Sh*tet ose jepet me qira një godinë 4-katëshe, me sipërfaqe ndërtimi rreth 6,500 m² dhe truall përreth prej afërsisht 13,000 m².Objekti ndodhet në Vaqarr, Rruga e Arbanës, fshati Fortuzaj–Damjan, një zonë e qetë, me akses të lehtë rrugor dhe e përshtatshme për zhvillimin e ve...

15/10/2025

DEKLARATË PËR MEDIAT

Me rastin e Ditës Ndërkombëtare të Shkopit të Bardhë – 15 Tetor

Në kuadër të Ditës Ndërkombëtare të Shkopit të Bardhë, Shoqata e të Verbërve të Shqipërisë zhvillon sot një marshim sensibilizues, duke sjellë në vëmendje simbolin e pavarësisë dhe dinjitetit të personave të verbër në shoqëri.
Kjo ditë ndërkombëtare është një thirrje për reflektim mbi të drejtën e çdo personi të verbër për lëvizje të lirë, akses të barabartë dhe pjesëmarrje aktive në jetën publike.

Prej më shumë se një dekade, komuniteti i të verbërve në Shqipëri është përballur me mungesë të theksuar mbështetjeje institucionale.
Që nga viti 2014, asnjë shërbim i specializuar për rehabilitim, arsimim të përshtatur, orientim e lëvizshmëri, punësim të asistuar apo mbështetje teknike nuk është ofruar nga shteti, pavarësisht detyrimeve të përcaktuara në ligjet kombëtare dhe në Konventën e OKB-së për të Drejtat e Personave me Aftësi të Kufizuara.
Kjo mungesë ka ndikuar drejtpërdrejt në përjashtimin e shumë personave të verbër nga mundësitë e barabarta për arsim, punë dhe jetesë të pavarur.

Shoqata e të Verbërve të Shqipërisë i drejtohet qeverisë shqiptare me këto kërkesa thelbësore:
1. Rikthimin e shërbimeve të specializuara publike për personat e verbër në të gjitha fushat — rehabilitim, arsim të përshtatur, trajnime profesionale, punësim të asistuar dhe pajisje ndihmëse që sigurojnë pavarësi funksionale;
2. Rritjen e pagesave për shkak të verbërisë, me qëllim sigurimin e shanseve të barabarta për pjesëmarrje dhe jetesë të dinjitetshme. Hera e fundit që është bërë rritje reale e këtyre pagesave ka qenë në vitin 2009, ndërsa më pas janë kryer vetëm indeksime të pjesshme që nuk kanë reflektuar rritjen e kostove të jetesës;
3. Vendosjen e një skeme të detyrueshme të ndihmës ekonomike për të gjithë personat e verbër të papunësuar, në mënyrë që askush të mos mbetet pa të ardhura minimale për shkak të mungesës së aksesit në tregun e punës.

Në një realitet ku inflacioni, çmimet e ushqimeve, transportit dhe shërbimeve bazë janë rritur ndjeshëm, është e domosdoshme që shteti të garantojë një mbështetje të drejtë, të përditësuar dhe gjithëpërfshirëse për qytetarët e verbër, si pjesë e barazisë reale në shoqëri.

Shkopi i bardhë nuk është simbol varësie, por simbol i pavarësisë dhe dinjitetit njerëzor.
Në këtë ditë, Shoqata e të Verbërve të Shqipërisë riafirmon se personat e verbër nuk kërkojnë mëshirë, por respekt, akses dhe të drejta të barabarta në arsim, punë dhe jetë publike.

Presidenti SHVSH
JONIT Ferhati

14/10/2025

📢 Marshojmë për Barazi dhe Dinjitet!
🦯 15 Tetor – Dita Ndërkombëtare e Shkopit të Bardhë

Të verbërit do të mblidhen nesër, më 15 tetor 2025, ora 10:00,
📍 Nisja nga Pallati i Kongreseve, në marshimin tonë simbolik dhe të përvitshëm,
për të kërkuar:

✅ Shërbime të specializuara dhe rehabilitim publik
✅ Rritje të pagesës për shkak të verbërisë
✅ Akses real në arsim dhe punësim
✅ Barazi në mundësi dhe respekt për dinjitetin njerëzor

Shkopi i bardhë është simbol i pavarësisë, jo i mëshirës.
Sot, më shumë se kurrë, kërkojmë veprim, jo premtime.
🕊️ Bashkohuni me ne dhe ndihmoni të dëgjohet zëri ynë për më shumë dinjitet dhe shpresë.

🎙️ Çdo pasqyrim në media është një hap më afër barazisë.

05/05/2025

DEKLARATË PËR SHTYP
Tiranë, më 05/05/2025

Shoqata e të Verbërve të Shqipërisë reagon me indinjatë ndaj fyerjeve publike të Kryeministrit ndaj personave me aftësi të kufizuara

Shoqata e të Verbërve të Shqipërisë (SHVSH), si përfaqësuesja legjitime e mbi 13,500 qytetarëve të verbër dhe me dëmtime të rënda të shikimit në vend, shpreh keqardhje dhe indinjatë të thellë për përdorimin e gjuhës diskriminuese dhe poshtëruese nga Kryeministri i Republikës së Shqipërisë, z. Edi Rama, në një aktivitet elektoral të zhvilluar në Lezhë.
Në këtë deklaratë ai u shpreh si më poshtë:
“Kur njeriu i ka sytë top, është më i verbër se dikush që nuk i ka sytë. Kush i ka sytë, s’do me pa, është qorr absolut. Kush është nga veshët top, dhe do të dëgjojë këngën e bufit për natë, është më shurdh nga shurdhi.”
është jo vetëm thellësisht ofenduese për komunitetin e personave të verbër dhe të personave që nuk dëgjojnë, por përbën një shkelje të rëndë të standardeve të respektit njerëzor dhe të barazisë së promovuar nga Kushtetuta e Republikës së Shqipërisë dhe nga Konventa e OKB-së për të Drejtat e Personave me Aftësi të Kufizuara.

Kjo nuk është hera e parë që z. Rama përdor fjalor fyese ndaj grupeve të ndjeshme. Vetëm pak ditë më parë, ai etiketoi në mënyrë të papranueshme personat me çrregullime të spektrit autik, duke vazhduar kështu një model komunikimi përçmues, që thellon paragjykimet shoqërore dhe cenon dinjitetin e mijëra qytetarëve shqiptarë.

SHVSH i bën thirrje publike Kryeministrit:
• Të kërkojë ndjesë publike, pa vonesë, ndaj komuniteteve që ka ofenduar.
• Të angazhohet realisht për respektimin dhe mbrojtjen e të drejtave të personave me aftësi të kufizuara, duke filluar nga gjuha e përdorur në hapësirën publike.
• Të rikthejë dinjitetin institucional në komunikimin me qytetarët e tij, veçanërisht ata që jetojnë çdo ditë me sfida të mëdha shëndetësore dhe sociale.

Ne nuk jemi metafora, nuk jemi figura stilistike për përdorim në fjalime politike. Ne jemi qytetarë të barabartë të këtij vendi. Dhe do të ngremë zërin për çdo akt, fjalë apo qëndrim që synon të na fyejë, të na përjashtojë ose të na instrumentalizojë.

Me respekt,
SHOQATA E TË VERBËRVE TË SHQIPËRISË

23/04/2025

“Rrëfimi i Tingujve” – Muzika që sheh nëpërmjet shpirtit

Shoqata e të Verbërve të Shqipërisë ka kënaqësinë të ftojë të gjithë anëtarët, miqtë dhe mbështetësit e komunitetit tonë të na bashkohen në një ngjarje të veçantë artistike dhe njerëzore.

Të dielën, më 27 prill, ora 11:00, në Teatrin Kombëtar të Operës, Baletit dhe Ansamblit Popullor, do të zhvillohet koncerti “Rrëfimi i Tingujve”, me pjesëmarrjen e pianistit të jashtëzakonshëm italian Nicola Pio Nasca.

Në moshën vetëm 22-vjeçare dhe i verbër që nga lindja, Nicola është pianist italian që ka përfunduar studimet e plota në piano – një shembull i rrallë i forcës, pasionit dhe përkushtimit ndaj artit.

Përmes veprave të Bach, Liszt, Chopin dhe Albeniz, ai do të na udhëheqë në një udhëtim emocional që tejkalon shikimin, duke na kujtuar fuqinë e vërtetë të ndjeshmërisë njerëzore.

Ju ftojmë ta ndiqni këtë ngjarje jo vetëm për kënaqësi shpirtërore, por edhe për të mbështetur artistët e verbër dhe vlerat e përbashkëta që na bashkojnë.
Bashkë, e bëjmë të padukshmen të ndjehet.
Të gjithë ata të verbër që duan të marrin pjesë të na kontaktojnë deri të shtunën ora 11 e paradites. Në të gjithë format e kontaktit.

🎹 Dy fjalë për Nicola Pio Nasca:

Nicola Pio Nasca është një pianist italian nga Trani, i cili ka kapërcyer kufijtë e perceptimit tradicional përmes një talenti të jashtëzakonshëm dhe një përkushtimi të palëkundur ndaj artit muzikor. I verbër që nga lindja, ai është bërë i pari në Itali që ka përfunduar studimet e nivelit të parë në piano në Konservatorin “Niccolò Piccinni” të Barit, duke u diplomuar me rezultate të shkëlqyera. 

Në moshën 22-vjeçare, Nicola ka arritur suksese ndërkombëtare, duke fituar çmime prestigjioze si “Crescendo International Music Competition” në New York dhe duke performuar në skena të njohura si Carnegie Hall dhe Katedralja e Shën Patrikut. Aktualisht, ai vazhdon studimet e nivelit të dytë në piano dhe ndjek paralelisht vitin e katërt në Fakultetin e Jurisprudencës në Universitetin e Barit. 

Nicola është një shembull frymëzues i fuqisë së vullnetit dhe pasionit për muzikën, duke dëshmuar se talenti dhe përkushtimi mund të tejkalojnë çdo pengesë.

19/03/2025

LETËR E HAPUR

DREJTUAR:Ministres së Shëndetësisë dhe Mbrojtjes Sociale, znj. Albana Koçiu
: Zëvendësministres znj. Denada Seferi

Hartuar nga Këshilli Kombëtar i Shoqatës së të Verbërve të Shqipërisë dhe miratuar unanimisht.

E nderuar znj. Ministre,

Me këtë letër, Këshilli Kombëtar i Shoqatës së të Verbërve të Shqipërisë shpreh indinjatën dhe shqetësimin e thellë për braktisjen totale të shtetit ndaj personave të verbër në Shqipëri. Politikat tuaja kanë çuar në një diskriminim sistematik, duke shkelur hapur Kushtetutën dhe detyrimet ligjore të qeverisë për të garantuar shërbimet e posaçme që janë jetike për të verbërit.
Për vite me radhë, qeveria ka eliminuar çdo shërbim të posaçëm për të verbërit, ka mohuar të drejtat e garantuara me ligj dhe ka lënë pa financim shërbimet që më parë ishin funksionale. Të verbërit në Shqipëri nuk përfitojnë asnjë shërbim specifik që u garanton një jetë të pavarur dhe të dinjitetshme.
Kushtetuta ka përcaktuar qartë se të gjithë qytetarët janë të barabartë para ligjit dhe se shteti ka detyrimin të sigurojë mbështetje të drejtpërdrejtë për kategoritë më të cenueshme. Ligji nr. 93/2014 “Për përfshirjen dhe aksesueshmërinë e personave me aftësi të kufizuara” e përforcon këtë detyrim, duke përcaktuar qartë përgjegjësitë e shtetit për të garantuar shërbime të specializuara për personat me aftësi të kufizuara, përfshirë të verbërit.
Në nenin 5, pika 2, thuhet: “Politikat shtetërore mbështetin personat me aftësi të kufizuara që të kenë akses në të gjitha sferat e jetës.”
Në nenin 11 të të njëjtit ligj thuhet: “Nevojat për asistencë dhe mbështetje mbulohen nga Buxheti i Shtetit, dhe fondet planifikohen nga ministria përgjegjëse në koordinim me ministritë e linjës.”
Në vend që të zbatoni këtë detyrim ligjor, ju keni zgjedhur të zhdukni çdo formë mbështetjeje shtetërore dhe t’i hidhni përgjegjësitë tek pushteti vendor dhe organizata të ndryshme jofitimprurëse. Kjo është një manipulim dhe një shmangie e qëllimshme nga përgjegjësia qeveritare.
E nderuar znj. Ministre,
Ajo që po ndodh nuk është thjesht një mungesë vëmendjeje është një diskriminim institucional dhe një akt i pastër neglizhence ndaj një kategorie qytetarësh që kanë nevojë për mbështetje reale.
Shteti shqiptar ka transferuar përgjegjësinë për ofrimin e shërbimeve tek bashkitë, duke justifikuar mungesën e veprimit me faktin se fondet për shërbimet e posaçme do të menaxhohen nga Fondi Social. Ky është një mashtrim politik dhe një skemë burokratike që nuk bën gjë tjetër veçse largon shtetin nga përgjegjësitë e tij kushtetuese.
Nëpërmjet Ligjit nr. 93/2014, Ligjit nr. 121/2016 dhe akteve të tjera nënligjore, qeveria juaj ka kapur plotësisht sistemin e shërbimeve sociale, duke krijuar një monopol të organizatave të caktuara për personat me aftësi të kufizuara. Në pikat 7 dhe 8 të nenit 3 të ligjit 93/2014 është përcaktuar se shërbimet për personat me aftësi të kufizuara do të ofrohen nga Organizatat për Personat me Aftësi të Kufizuara.
Nëse analizojmë plotësisht Ligjin nr. 93/2014, Ligjin nr. 121/2016 dhe aktet e tjera nënligjore, është krijuar një bazë ligjore e konsoliduar, sipas së cilës OJQ-të për personat me aftësi të kufizuara kanë hapësirën e plotë për të qenë aktorë përcaktues në ofrimin dhe financimin e shërbimeve. të cilat kanë përfituar financime të vazhdueshme, ndërsa ne, si përfaqësues të ligjshëm të të verbërve, jemi përjashtuar plotësisht nga vendimmarrja dhe financimi.
Ky nuk është vetëm një diskriminim i hapur, por edhe një skemë klienteliste, që i ka kthyer shërbimet për personat me aftësi të kufizuara në një mjet biznesi për disa grupe të interesit.
Kjo qasje ka shkaktuar kolaps total të shërbimeve për të verbërit. Në asnjë qark të vendit nuk ofrohet asnjë shërbim i specializuar për të verbërit, ndonëse ligjet i parashikojnë ato qartë.
Pse Qendra Kombëtare e Rehabilitimit të të Verbërve (QKRV) nuk mund të ofrojë shërbimet përmes Fondit Social?
1. QKRV është institucion kombëtar dhe nuk mund të financohet përmes mekanizmave vendorë, të cilët varen nga vullneti i pushtetit lokal dhe jo nga një strategji e unifikuar shtetërore.
2. Fondi Social nuk garanton financim të qëndrueshëm, por është një mekanizëm konkurues që krijon pasiguri dhe dështime sistematike. Shërbimet e posaçme nuk mund të mbahen në këmbë nga financime sporadike dhe me procedura të tejzgjatura burokratike.
3. Njësitë vendore nuk kanë kapacitetet, burimet njerëzore dhe ekspertizën për të ofruar shërbimet e specializuara për të verbërit. Delegimi i këtyre shërbimeve tek bashkitë është një veprim i qëllimshëm për t’i shpëtuar përgjegjësisë shtetërore.
4. Çdo qark nuk mund të marrë shërbimet te QKRV, sepse nuk ka asnjë strukturë financimi të dedikuar për këtë institucion, duke e lënë atë jashtë funksionit dhe të paaftë për të kryer detyrën e tij.
E nderuar znj. Ministre,
Në këtë situatë këshilli kombëtar i SHVSH kërkon që ju të ndërmerrni hapa të menjëhershëm për të kthyer shërbimet e posaçme në financim të drejtpërdrejtë nga Buxheti i Shtetit.
Duhet të respektohet kuadri ligjor që përfshin:
• Ligjin nr. 8098, datë 28.3.1996 o“Për Statusin e të Verbërit”
• Vendimin nr. 277 të Këshillit të Ministrave, datë 18.06.1997
• Vendimin nr. 643 për financimin e shërbimeve të posaçme për të verbërit, datë 30.09.2004
• Udhëzimin nr. 10, datë 16.05.2005, të Ministrit të Financave për procedurat e pagesave për shërbimet e posaçme
Nëse ministria juaj nuk reflekton dhe nuk rikthen financimin e drejtpërdrejtë të shërbimeve për të verbërit, ne do të jemi të detyruar të ndjekim të gjitha format e rezistencës civile, përfshirë protestat, denoncimet publike dhe paditë ligjore kundër institucioneve përgjegjëse.
Nuk mund të pranojmë më zvarritje, manipulime dhe justifikime boshe. Të verbërit e Shqipërisë nuk janë qytetarë të dorës së dytë dhe nuk do të lejojmë që shteti të na injorojë më tej.
Ky është apeli ynë i fundit për reflektim dhe veprim të menjëhershëm.

Me respekt,

Këshilli Kombëtar i Shoqatës së të Verbërve të Shqipërisë

07/02/2025

Presidenti i Shoqatës së të Verbërve: Shërbimet për Jetesë me Dinjitet Janë Zero!

Presidenti i Shoqatës së të Verbërve të Shqipërisë, Jonit Ferhati, deklaron se personat e verbër në vendin tonë nuk marrin asnjë shërbim për të jetuar me dinjitet. Këtë realitet e konfirmojnë edhe organizatat ndërkombëtare. Reforma e aftësisë së kufizuar është një pseudo-reformë, e cila nuk sjell asnjë përmirësim të prekshëm për këtë kategori. Ndërkohë, pagesat për shkak të verbërisë nuk janë rritur që nga viti 2009, duke lënë mijëra persona në një situatë të vështirë ekonomike.

📽️ Shikoni videon për më shumë detaje! ⬇️

Subscribe:https://www.youtube.com/c/TelevizioniSCAN?sub_confirmation=1WEB: https://scantv.al/Facebook:https://www.facebook.com/televizioniscan/Instagram:http...

03/02/2025

📢 Takimi që konfirmoi një të vërtetë të hidhur: Nuk ka vullnet për të mbështetur të verbrit!

Javën e kaluar u zhvillua një takim formal me Ministrinë e Shëndetësisë dhe Mbrojtjes Sociale, një takim ku, pa asnjë argument të ri dhe pa asnjë vullnet për ndryshim, na u tha sërish e njëjta gjë: Shërbimet për të verbrit nuk do të financohen!

Përtej gjithë bazës ligjore që detyron shtetin të garantojë këto shërbime, përtej faktit se shërbimet sot janë ZERO, përtej realitetit të dhimbshëm ku mijëra persona të verbër në Shqipëri jetojnë pa asnjë mbështetje të specializuar, ministria dhe punonjësit e saj nuk duan të marrin përgjegjësi për të zbatuar atë që ligji e detyron qartë!

🚨 Ky është një refuzim i hapur i të drejtave tona. Ky nuk është një problem buxheti, ky është një problem vullneti politik!
Qendra Kombëtare e Rehabilitimit të të Verbërve, me kapacitetet e saj të jashtëzakonshme, mbetet jashtë funksionit, ndërkohë që në vendet e rajonit qendra të tilla janë shtylla e mbështetjes për komunitetin e verbër.

💡 Tani nuk është më koha për heshtje! Ne, të verbrit, nuk jemi më spektatorë të vendimeve që shkatërrojnë të ardhmen tonë. Do të jemi të gjithë bashkë pjesë e vendimeve historike që do të marrim për dinjitetin tonë dhe për lehtësirat që na takojnë!

⚠️ Askush nuk mund të na mohojë të drejtat tona!

15/01/2025

Për të gjithë ata që janë të interesuar të na kontaktojnë brenda 24 orësh në zë gjithë format që shvsh disponon...

🎼Tingujt e përjetshëm të dy gjigantëve të muzikës klasike, Sergei Rachmaninoff dhe Pyotr Ilyich Tchaikovsky, çelin siparin e një viti magjik në TKOBAP.

🎹Koncerti nr. 3 për piano dhe orkestër i Rachmaninoff-it, një kryevepër që do të emocionojë publikun me ndjeshmërinë dhe fuqinë e saj dramatike, do të interpretohet nga pianisti virtuoz Giovanni Bertolazzi, i cili do të sjellë çdo notë të kësaj vepre në një udhëtim intensiv shpirtëror.

✨Nga ana tjetër, Simfonia nr. 5 e Tchaikovsky-t, një vepër e mbushur me pasion, trishtim dhe triumf, që përshkruan betejën e njeriut me fatin, do të vijë fuqishëm nga Orkestra Simfonike e TKOBAP-së.

🌞🪄Nën drejtimin mjeshtëror të dirigjentit Sergio Alapont, çdo tingull do t’ju ngrohë zemrat këtë mes-janari.

08/01/2025

🎉 8 Janar 1991 - 8 Janar 2025 🎉
📌 34 Vjet Bashkë, Për Të Drejtat dhe Barazinë!

Shoqata e të Verbërve të Shqipërisë (SHVSH) u themelua në këtë ditë historike, më 8 janar 1991, me vizionin për një shoqëri më të drejtë dhe më gjithëpërfshirëse.

👉 Presidentët që udhëhoqën me përkushtim:
• 1991-2018: Dr. Av. Sinan Tafaj i shpallur nga kongresi në 2018 president nderi
• 2018-2024: Av. Ardjan Hysa
• 2024 e në vazhdim: Jonit Ferhati

🌟 Suksese që na bëjnë krenarë:
• Njohja e Statusit të të Verbërve në vitin 1996.
• Shtrirja e shoqatës në të gjithë territorin e Shqipërisë.
• Konceptimi dhe zbatimi i programeve: Advokatia dhe Të jetuarit me dinjitet si të barabartë.
• Krijimi i një qendre që është më e madhja në Ballkan dhe e vetmja e tillë në Shqipëri.
• Zyra të përhershme si pasuri e vetë shoqatës në degë të ndryshme.
• Themelimi i Bibliotekës Kombëtare për të Verbrit, me mbi 4000 libra në audio dhe rreth 1000 libra në Braille.
• Organizimi i mijëra trajnimeve, shpërndarja e pajisjeve tifloteknike dhe ofrimi i shërbimeve për anëtarët tanë.

SHVSH është simbol i fuqisë, i bashkimit dhe i përkushtimit për të jetuar me dinjitet.
Falënderojmë të gjithë ata që kontribuuan dhe vazhdojnë të mbështesin këtë kauzë të shenjtë!

🤝 Së bashku për një të ardhme më të mirë!

10/12/2024

Intervista e Presidentit të SHVSH Z. Jonit Ferhati për emisionin 31 minuta i transmetuar ditën e djeshme datë 9 Dhjetor në pjesën e dytë të emisionit Opinion.
Z. Ferhati foli për vështirësitë që hasin qytetarët e verbër në aksesin në infrastukturë në Tiranë dhe në të gjith vendin.

Ky emision është realizuar nga Qendra për Gazetari cilësore në bashkëpunim me zyrën e marrëdhënjeve publike të U.S. Embassy Tirana

Tirana, qyteti me popullsinë më të madhe në vend, përballet me sfida të mëdha për t'u bërë një qytet më gjithëpërfshirës dhe i aksesueshëm. Infrastruktura e ...