Shoqata Shqiptare e Personave që Jetojnë me HIV/AIDS

31/07/2026

DEKLARATË PËR SHTYP

Shoqata Shqiptare e Personave që Jetojnë me HIV/AIDS shpreh indinjatën dhe shqetësimin e saj të thellë lidhur me rastin e ndodhur në Spitalin Rajonal të Durrësit, ku personel shëndetësor ka bërë publik statusin HIV të një pacienti, si dhe informacione të tjera tepër të ndjeshme mbi gjendjen e tij shëndetësore, të marra gjatë ushtrimit të detyrës dhe nëpërmjet dokumentacionit mjekësor.

Publikimi i statusit HIV dhe i të dhënave të tjera personale, përfshirë informacionin mbi historinë e përdorimit të drogës me injektim, pa pëlqimin e pacientit, përbën një shkelje të rëndë të të drejtave themelore të njeriut, të së drejtës për privatësi dhe konfidencialitet, të legjislacionit shqiptar, si dhe të etikës profesionale që rregullon ushtrimin e profesionit të mjekut dhe të profesionistëve të tjerë të kujdesit shëndetësor.

Ky veprim cenon jo vetëm dinjitetin dhe integritetin e personit të prekur, por dëmton besimin që çdo qytetar duhet të ketë se informacioni që ndan me profesionistët e shëndetësisë do të mbetet konfidencial.
Ligji nr. 9952, datë 14.07.2008 "Për Parandalimin dhe Kontrollin e HIV/AIDS" garanton mbrojtjen e të drejtave të personave që jetojnë me HIV. Në nenin 8, pika 1, shkronja "ç", përcaktohet se: "Personat që jetojnë me HIV/AIDS gëzojnë të drejtën e konfidencialitetit për infektimin e tyre me HIV/AIDS."
Po ashtu, neni 9, pika 5, ndalon shprehimisht: "Bërja publike e emrit, adresës dhe pamjes (imazhit) së personit të infektuar me HIV ose zbulimi i informacionit të një personi të infektuar nga një tjetër, pa miratimin e tij, me përjashtim të rastit të përcaktuar në nenin 29 të këtij ligji."
Ndërsa neni 45 i të njëjtit ligj parashikon se shkelja e nenit 9 përbën kundërvajtje administrative dhe dënohet me gjobë, ndërsa autoriteti përgjegjës për vendosjen dhe ekzekutimin e sanksioneve është Ministria e Shëndetësisë dhe Mirëqenies Sociale.
Rasti përbën gjithashtu shkelje të Ligjit nr. 9887, datë 10.03.2008 "Për Mbrojtjen e të Dhënave Personale", i ndryshuar. Statusi HIV dhe çdo informacion tjetër mbi gjendjen shëndetësore të një individi përbëjnë të dhëna personale të një kategorie të veçantë, të cilat mbrohen me ligj dhe nuk mund të zbulohen apo të përpunohen në kundërshtim me parimet e ligjshmërisë, konfidencialitetit dhe mbrojtjes së privatësisë.
Po kështu, ky veprim bie ndesh me Kartën Shqiptare të të Drejtave të Pacientit, e cila garanton të drejtën për privatësi dhe konfidencialitet, si dhe me Kodin e Etikës dhe Deontologjisë Mjekësore (11.11.2011, U.M.Sh.), që detyron çdo profesionist shëndetësor të ruajë sekretin profesional dhe konfidencialitetin e informacionit të pacientit.
Personat që jetojnë me HIV në Shqipëri kanë luftuar për dekada kundër stigmës, diskriminimit dhe paragjykimeve. Çdo rast i zbulimit të paautorizuar të statusit HIV nuk përfaqëson vetëm një shkelje individuale të ligjit, por rrezikon të zhbëjë progresin e arritur në ndërtimin e besimit ndaj sistemit shëndetësor dhe në promovimin e testimit të hershëm, trajtimit dhe kujdesit.
Publikimi i statusit HIV dhe i historisë së përdorimit të drogës me injektim jo vetëm që ekspozon padrejtësisht një individ ndaj stigmës dhe diskriminimit, por krijon një klimë frike për të gjithë personat që jetojnë me HIV dhe komunitetet kyçe. Veprime të tilla mund të dekurajojnë qytetarët të kryejnë testimin për HIV, të kërkojnë trajtim apo të drejtohen pranë shërbimeve shëndetësore, duke dëmtuar drejtpërdrejt përpjekjet kombëtare për kontrollin e epidemisë dhe mbrojtjen e shëndetit publik. Lufta kundër HIV nuk fitohet vetëm me barna dhe shërbime shëndetësore; ajo fitohet edhe duke mbrojtur dinjitetin, privatësinë dhe të drejtat e çdo personi.

Për këto arsye, Shoqata Shqiptare e Personave që Jetojnë me HIV/AIDS i kërkon:
• Ministrisë së Shëndetësisë dhe Mirëqenies Sociale, në cilësinë e autoritetit përgjegjës sipas nenit 45 të Ligjit nr. 9952/2008, të nisë menjëherë një hetim administrativ të plotë, të identifikojë përgjegjësit dhe të zbatojë sanksionet e parashikuara nga ligji.
• Drejtorisë së Spitalit Rajonal të Durrësit të zhvillojë një hetim administrativ dhe disiplinor, të marrë masat përkatëse ndaj personave përgjegjës dhe të ndërmarrë masa parandaluese.
• Komisionerit për të Drejtën e Informimit dhe Mbrojtjen e të Dhënave Personale të verifikojë shkeljen e legjislacionit për mbrojtjen e të dhënave personale dhe të ushtrojë kompetencat e tij ligjore.
• Urdhrit të Mjekut të Shqipërisë të shqyrtojë përgjegjësinë etike dhe profesionale të personelit të përfshirë.
Të gjitha institucioneve shëndetësore të forcojnë masat për mbrojtjen e konfidencialitetit dhe të zhvillojnë trajnime të detyrueshme për etikën profesionale, mbrojtjen e të dhënave personale dhe të drejtat e pacientëve.
Shoqata shpreh solidaritetin e saj të plotë me personin e prekur dhe rithekson se askush nuk duhet të ekspozohet, stigmatizohet apo diskriminohet për shkak të statusit të tij shëndetësor.
Njëkohësisht, Shoqata shpreh mirënjohjen dhe vlerësimin për punonjësit e Portit të Peshkimit në Durrës, të cilët, me humanizëm, dinjitet dhe ndjenjë të lartë përgjegjësie qytetare, i ofruan ndihmën e parë në një moment vendimtar kur ai ishte lënë pa kujdes.
Veprimi i tyre është një shembull i solidaritetit njerëzor dhe dëshmon se kujdesi, respekti dhe mbështetja për jetën dhe dinjitetin e çdo individi duhet të jenë vlerat që udhëheqin shoqërinë tonë.

Shoqata Shqiptare e Personave që Jetojnë me HIV/AIDS do ta ndjekë nga afër trajtimin institucional të këtij rasti dhe do të kërkojë transparencë të plotë nga autoritetet kompetente.
Nëse konstatohen shkelje të legjislacionit në fuqi, Shoqata do të mbështesë përdorimin e të gjitha mjeteve administrative dhe gjyqësore të parashikuara nga ligji për të garantuar vendosjen e përgjegjësisë dhe mbrojtjen efektive të të drejtave të personave që jetojnë me HIV në Shqipëri.
Shoqata Shqiptare e Personave që Jetojnë me HIV/AIDS
Tiranë, 31 korrik 2026

09/07/2026

🇪🇺 AAPLWHA në Takimin Evropian të HIV Outcomes në Milano

Shoqata Shqiptare e Personave që Jetojnë me HIV/AIDS, si anëtare e iniciativës HIV Outcomes, mori pjesë në takimin evropian të organizuar në Milano, Itali, ku partnerë nga disa vende të Evropës u mblodhën për të diskutuar të ardhmen e politikave për HIV dhe për të forcuar bashkëpunimin ndërmjet iniciativave kombëtare dhe evropiane.
Takimi u fokusua në prioritete të rëndësishme për të ardhmen e përgjigjes ndaj HIV në Evropë, duke përfshirë:
🔹 forcimin e bashkëpunimit ndërmjet vendeve dhe organizatave partnere;
🔹 nevojën për një **Plan të ri të Veprimit të Bashkimit Evropian për HIV/AIDS**, pas më shumë se një dekade nga përfundimi i planit të fundit;
🔹 përditësimin e rekomandimeve politike të **HIV Outcomes**, në përputhje me zhvillimet shkencore dhe sfidat e reja sociale e gjeopolitike;
🔹 rolin gjithnjë e më të rëndësishëm të organizatave komunitare në përmirësimin e rezultateve shëndetësore dhe cilësisë së jetës së personave që jetojnë me HIV.
Në vitin 2026, iniciativa HIV Outcomes shënon 10-vjetorin e saj, duke reflektuar një dekadë bashkëpunimi për politika më të forta, të bazuara në evidencë dhe të orientuara drejt nevojave të njerëzve që jetojnë me HIV.
Për Shoqaten, pjesëmarrja në këtë rrjet evropian është një mundësi për të sjellë përvojën e Shqipërisë në diskutimet ndërkombëtare, por edhe për të përcjellë në vend praktikat më të mira që kontribuojnë në përmirësimin e politikave kombëtare dhe cilësisë së jetës së personave që jetojnë me HIV.
Së bashku me partnerët tanë evropianë, vazhdojmë të punojmë për politika më gjithëpërfshirëse, të bazuara në të drejtat e njeriut dhe në nevojat reale të komunitetit.
Caroline Sabin | Mario Cascio | Chiva | Amanda Ely | Christoph D. Spinner | European AIDS Treatment Group | Nikos Dedes | Fundacja Edukacji Społecznej | Magdalena Ankierstejn-Bartczak | Kevin Moody | marc van der valk | Mariana Mardarescu | National AIDS Trust | Daniel Fluskey | James Cole | Nicoletta Policek | Olimbi Hoxhaj | Mojgan Hessamfar| Dr. Robbie Lawlor | Andrea Zanaglio | Silas Holland | Anjali Radcliffe | Gilead Sciences | MSD | ViiV Healthcare | Maciej Moskwa | Slawomir Ros | Madeleine Peraccini | Lorenza Gulli | Simone Marcotullio | Christophe Van Elewyck | Hiskya Plieger | Gregoriana Tudoran | Tudor Ciubotaru | Claire Beckingham | Giacomo Lazzaro | Sorina Chivu | Inês Terêncio | Olivier Levy

06/07/2026

Asgjë për ne, pa ne: Pse komuniteti është thelbësor për t'i dhënë fund AIDS-it?
Deklarata Politike e Kombeve të Bashkuara për HIV/AIDS 2026 dërgon një mesazh të qartë: Nuk mund të ndërtohen politika efektive për HIV pa pjesëmarrjen kuptimplotë të njerëzve që preken drejtpërdrejt nga epidemia.
Për herë të parë, angazhimet globale vendosin objektiva të qarta për fuqizimin e organizatave komunitare, duke njohur se ato nuk janë vetëm përfituese të politikave, por partnerë të domosdoshëm në hartimin, zbatimin dhe monitorimin e tyre.
Deklarata synon që deri në vitin 2030:
1. Organizatat komunitare të ofrojnë një pjesë të konsiderueshme të shërbimeve të testimit dhe kujdesit.
2. Shumica e programeve të parandalimit për komunitetet më të prekura të udhëhiqen nga vetë komunitetet.
3. Organizatat e komunitetit të kenë një rol të drejtpërdrejtë në monitorimin e politikave, mbrojtjen e të drejtave të njeriut dhe luftën kundër stigmës.
Kjo nuk është rastësi.
Askush nuk i njeh më mirë sfidat, pengesat dhe nevojat e komunitetit sesa vetë njerëzit që i jetojnë ato çdo ditë.
Në Shqipëri, Shoqata Shqiptare e Personave që Jetojnë me HIV/AIDS ka dëshmuar prej vitesh se komuniteti nuk është pjesë e problemit, por ai është pjesë e zgjidhjes.
Përmes advokimit, mbështetjes psikosociale, edukimit, monitorimit të të drejtave të njeriut dhe bashkëpunimit me institucionet, organizatat komunitare kanë kontribuar në ndërtimin e një përgjigjeje më gjithëpërfshirëse dhe më të qëndrueshme ndaj HIV.
Objektivi global t'i japim fund AIDS-it nuk do të arrihet vetëm me politika të hartuara në zyra.
Ai do të arrihet kur njerëzit që jetojnë me HIV, komunitetet më të prekura dhe organizatat e tyre të jenë bashkëautorë të vendimeve që ndikojnë jetën e tyre.
Asgjë për ne, pa ne nuk është vetëm një slogan.
Është një parim i demokracisë, i të drejtave të njeriut dhe i një përgjigjeje efektive ndaj HIV.

03/07/2026

Respektimi, mbrojtja dhe përmbushja e të drejtave të njeriut janë thelbësore për t'i dhënë fund epidemisë së AIDS-it." (Deklarata Politike e OKB-së për HIV/AIDS, 2026)
Pse të drejtat e njeriut janë thelbësore për t'i dhënë fund AIDS-it?
Një nga mesazhet më të forta të Deklaratës Politike të Kombeve të Bashkuara për HIV/AIDS 2026 është se nuk mund t'i japim fund AIDS-it pa mbrojtur të drejtat e njeriut.
Përvoja globale ka treguar se HIV nuk përhapet sepse njerëzit nuk kanë vetëm informacion apo trajtim. Ai vazhdon të ndikojë jetën e njerëzve edhe për shkak të stigmës, diskriminimit, frikës dhe pabarazive që i pengojnë ata të kërkojnë ndihmë në kohë.
Prandaj, Deklarata u bën thirrje vendeve të:
1. Garantojnë që askush të mos diskriminohet për shkak të statusit HIV, gjinisë, orientimit seksual, identitetit gjinor, moshës apo përkatësisë në një komunitet të caktuar.
2. Heqin pengesat ligjore dhe sociale që kufizojnë aksesin në testim, trajtim dhe shërbime parandaluese.
3. Luftojnë stigmën dhe dhunën që prekin personat që jetojnë me HIV dhe komunitetet më të ekspozuara ndaj infeksionit.
4. Sigurojnë që çdo person të ketë akses në drejtësi, informacion dhe mbrojtje efektive të të drejtave të tij.
Për Shoqatën Shqiptare të Personave që Jetojnë me HIV/AIDS, mbrojtja e të drejtave të njeriut nuk është vetëm një parim. Ajo ka qenë misioni ynë që nga dita e krijimit.
Për më shumë se dy dekada kemi punuar për të mbështetur personat që jetojnë me HIV, për të luftuar diskriminimin, për të promovuar politika më gjithëpërfshirëse dhe për të siguruar që zëri i komunitetit të dëgjohet në vendimmarrje.
Sepse kur një person ka frikë të testohet, të kërkojë trajtim apo të flasë për statusin e tij nga frika e paragjykimit, nuk rrezikohet vetëm shëndeti i tij. Rrezikohet edhe suksesi i të gjithë përgjigjes ndaj HIV.
T'i japësh fund AIDS-it nuk do të thotë vetëm të sigurosh barna.
Do të thotë të ndërtosh një shoqëri ku çdo njeri trajtohet me dinjitet, respekt dhe barazi.
Mbrojtja e të drejtave të njeriut nuk është një shtesë e përgjigjes ndaj HIV. Ajo është themeli mbi të cilin ndërtohet një përgjigje e suksesshme.

02/07/2026

Çfarë është Deklarata Politike e Kombeve të Bashkuara për HIV/AIDS 2026 dhe pse ka rëndësi për Shqipërinë?
Në 23 qershor 2026, Asambleja e Përgjithshme e Kombeve të Bashkuara miratoi Deklaratën Politike për HIV/AIDS, duke riafirmuar angazhimin e vendeve anëtare për t'i dhënë fund AIDS-it si kërcënim për shëndetin publik deri në vitin 2030.
Ky dokument nuk është thjesht një deklaratë politike. Ai përfaqëson një angazhim global që udhëzon qeveritë në hartimin e politikave, investimeve dhe veprimeve konkrete për të përshpejtuar përgjigjen ndaj HIV.
Deklarata bazohet në një mesazh të qartë:
Njerëzit duhet të jenë në qendër të përgjigjes ndaj HIV.
Ajo u kërkon vendeve të:
1. Zgjerojnë aksesin në testim, trajtim dhe kujdes cilësor për HIV.
2. Investojnë në parandalim, përfshirë PrEP, vetë-testimin dhe teknologjitë e reja.
3. Luftojnë stigmën, diskriminimin dhe pabarazitë që vazhdojnë të pengojnë aksesin në shërbime.
4. Sigurojnë financim të qëndrueshëm për programet e HIV.
5. Përfshijnë organizatat komunitare dhe personat që jetojnë me HIV në hartimin, zbatimin dhe monitorimin e politikave.
Pavarësisht progresit të madh shkencor, bota ende përballet me sfida serioze. Miliona njerëz nuk kanë akses në trajtim, ndërsa stigma, diskriminimi dhe pabarazitë vazhdojnë të pengojnë arritjen e objektivit Ti japim fund AIDS-it në 2030.
Për Shqipërinë, kjo Deklaratë është një mundësi për të forcuar politikat kombëtare, për të investuar në parandalim dhe për të siguruar që askush të mos mbetet pas.
Shoqata Shqiptare e Personave që Jetojnë me HIV/AIDS do të ndajë gjatë ditëve në vijim një seri postimesh për të shpjeguar se çfarë parashikon kjo Deklaratë dhe si mund të ndikojë ajo në përmirësimin e përgjigjes ndaj HIV në vendin tonë.
Sepse fundi i AIDS-it nuk është vetëm një objektiv global. Është një përgjegjësi e përbashkët.

02/07/2026

Deklarata Politike e Kombeve të Bashkuara për HIV/AIDS 2026: Nga angazhimi global te veprimi konkret në Shqipëri
Në qershor 2026, Shtetet Anëtare të Kombeve të Bashkuara miratuan një Deklaratë të re Politike për HIV/AIDS, duke riafirmuar angazhimin për t'i dhënë fund AIDS-it si kërcënim për shëndetin publik deri në vitin 2030. Deklarata vjen në një moment vendimtar, kur përparimet shkencore janë më të mëdha se kurrë, por pabarazitë, stigma dhe mungesa e investimeve vazhdojnë të pengojnë miliona njerëz të kenë akses në shërbimet që u nevojiten.
Deklarata u bën thirrje të gjitha vendeve të:
✅ Garantojnë akses universal në testim, trajtim dhe kujdes cilësor për HIV.
✅ Zgjerojnë programet moderne të parandalimit, përfshirë PrEP, vetë-testimin dhe teknologjitë inovative.
✅ Luftojnë stigmën, diskriminimin dhe barrierat ligjore që pengojnë aksesin në shërbime.
✅ Sigurojnë financim të qëndrueshëm për përgjigjen ndaj HIV.
✅ Vendosin komunitetet në qendër të politikave, vendimmarrjes dhe monitorimit të programeve.
Shoqata Shqiptare e Personave që Jetojnë me HIV/AIDS e mirëpret këtë deklaratë si një udhërrëfyes të rëndësishëm për pesë vitet e ardhshme dhe beson se angazhimet globale duhet të përkthehen në politika konkrete në nivel kombëtar.
Në Shqipëri, është koha të ndërmerren hapa të qartë për:
1. Përmirësimin e aksesit në shërbimet e parandalimit dhe trajtimit.
2. Integrimin e PrEP në sistemin publik si pjesë e strategjisë kombëtare të parandalimit.
3. Financimin e qëndrueshëm të shërbimeve komunitare dhe njohjen e rolit të organizatave të komunitetit si partnerë të barabartë në përgjigjen ndaj HIV.
4. Përditësimin e kuadrit ligjor dhe politik në përputhje me zhvillimet shkencore dhe angazhimet ndërkombëtare.
5. Eliminimin e stigmës dhe diskriminimit në institucionet shëndetësore, vendin e punës, sistemin arsimor dhe në shoqëri.
6. Investimin në edukim, parandalim, testim të hershëm dhe shërbime të integruara për të gjithë, pa përjashtim.
Në të njëjtën kohë, procesi i integrimit të Shqipërisë në Bashkimin Evropian kërkon politika publike që mbështeten në të drejtat e njeriut, barazinë dhe përfshirjen sociale. Një përgjigje moderne ndaj HIV nuk është vetëm një objektiv shëndetësor; ajo është pjesë e ndërtimit të një shoqërie demokratike, gjithëpërfshirëse dhe në përputhje me standardet evropiane.
Si organizatë e krijuar nga dhe për personat që jetojnë me HIV, ne do të vazhdojmë të kontribuojmë me ekspertizën dhe përvojën tonë për të siguruar që askush të mos mbetet pas.
Fundi i AIDS-it është i mundur.
Por ai do të arrihet vetëm nëse investojmë te njerëzit, mbrojmë të drejtat e tyre dhe dëgjojmë zërin e komuniteteve.
Shoqata mbetet e gatshme të bashkëpunojë me Ministrinë e Shëndetësisë dhe Mirëqenies Sociale, Institutin e Shëndetit Publik, partnerët ndërkombëtarë dhe organizatat e shoqërisë civile për të mbështetur zbatimin e angazhimeve të kësaj Deklarate në Shqipëri. Besojmë se vetëm përmes partneritetit të vërtetë ndërmjet institucioneve, komunitetit dhe partnerëve ndërkombëtarë mund të ndërtojmë një përgjigje të qëndrueshme ndaj HIV dhe të përmbushim objektivin për t'i dhënë fund AIDS-it deri në vitin 2030.
Asgjë për ne, pa ne.

09/06/2026

I founded the Albanian Association of People Living with HIV/AIDS (AUPLHA). The mission was exceptionally clear: to demand access to life-saving medications, to protect the fundamental rights of patients, and to drag the reality of HIV out of the shadows.

09/05/2026

https://youtu.be/RmTrGOfsJoI?si=Fbm49a1iPA0FCtWG

46 likes. "Mbi 20 vjet me HIV! Olimbi Hoxhaj, gruaja që shpëtoi mijëra jetë! "

08/03/2026

On International Women’s Day, we honour the resilience, leadership, and lived experiences of women who have lived with HIV for decades. Their stories challenge stigma and shape the future of HIV advocacy.

03/02/2026