10/10/2026
Një moment simbolik dhe emocionues për sportin shqiptar! Në përfundim të edicionit të 10-të të Golden Age Gym Festival, në Les Sables-d’Olonne të Francës, u zhvillua ceremonia tradicionale
e dorëzimit të flamurit, me të cilën Tirana mori zyrtarisht stafetën e organizimit të edicionit të 11-të, në vitin 2028.
Në një ceremoni spektakolare, ku performuan përfaqësuesit e të gjitha vendeve pjesëmarrëse, flamuri i festivalit kaloi nga organizatorët te drejtuesit e Federatës Europiane të Gjimnastikës dhe
më pas iu dorëzua përfaqësuesit të vendit mikpritës të ardhshëm, Presidentit të Komitetit Olimpik Kombëtar Shqiptar, z. Fidel Ylli.
Në fjalën e tij, Presidenti Ylli shprehu mirënjohjen për besimin e dhënë Shqipërisë, duke theksuar se edicioni i vitit 2028 do të jetë një festë e madhe e sportit, miqësisë dhe vlerave olimpike, si dhe një mundësi e shkëlqyer për të promovuar Shqipërinë dhe për të mirëpritur miq e dashamirës të këtij sporti nga e gjithë Europa.
Gjatë ceremonisë, në sallën sportive në Les Sables-d’Olonne, më shumë se 2,000 pjesëmarrës patën mundësinë të njihnin nga afër Shqipërinë përmes prezantimit promovues të përgatitur nga Federata Shqiptare e Gjimnastikës, duke sjellë në vëmendje bukuritë, mikpritjen dhe potencialin e vendit tonë për organizimin e këtij eventi ndërkombëtar.
Golden Age Gym Festival është shumë më tepër se një aktivitet sportiv. Ai promovon aktivitetin fizik në çdo moshë, miqësinë mes popujve, përfshirjen dhe vlerat olimpike, duke krijuar një platformë të veçantë për shkëmbimin kulturor dhe promovimin e vendeve mikpritëse.
Tashmë, përgatitjet për Tiranën 2028 marrin një kuptim të ri. Shqipëria do të ketë mundësinë të tregojë edhe një herë aftësinë e saj për të organizuar aktivitete ndërkombëtare dhe për të përcjellë më të mirën e saj përmes sportit.
