09/07/2026
Inspektorati Qendror i Punës – ndryshim emri apo reformë reale?
Me vendimin e datës 30 qershor 2026, Këshilli i Ministrave miratoi krijimin e Inspektoratit Qendror të Punës (IQP), nëpërmjet ristrukturimit të Inspektoratit Shtetëror të Punës dhe Shërbimeve Shoqërore.
Çdo reformë që synon mbrojtjen e të drejtave të punëmarrësve është e mirëpritur. Por pyetja që shtrohet është: a ndryshon vetëm emri, apo edhe mënyra se si zbatohet ligji?
Sot, Inspektorati i Punës ka humbur besimin e një pjese të organizatave sindikale dhe qytetarëve. Në shumë raste, shkeljet në sektorin publik kanë mbetur pa reagimin e duhur, ndërsa kontrollet dhe masat administrative janë përqendruar kryesisht tek sektori privat.
Shqetësimi ynë mbetet fakti se edhe Inspektorati Qendror i Punës do të vazhdojë të jetë në varësi të ministrisë përgjegjëse për punën. Kjo varësi ngre dyshime të arsyeshme mbi pavarësinë e tij, veçanërisht kur objekt i kontrollit janë vetë institucionet shtetërore.
SPAKMSH ka mbrojtur prej vitesh qëndrimin se Inspektorati i Punës duhet të jetë një institucion i pavarur, me autonomi funksionale dhe vendimmarrëse, në mënyrë që ligji të zbatohet njësoj për çdo punëdhënës, publik apo privat.
Gjithashtu, organizimi i ri nuk parashikon mekanizma të qartë bashkëpunimi me organizatat sindikale, të cilat janë partnerët kryesorë në mbrojtjen e të drejtave të punëmarrësve.
Reforma e vërtetë nuk matet me ndryshimin e emrit të institucionit, por me pavarësinë, profesionalizmin, transparencën dhe besimin që ai fiton tek punëmarrësit dhe qytetarët.
SPAKMSH do të vijojë të kontribuojë me propozime konkrete për një Inspektorat të Punës vërtet të pavarur, në shërbim të punëmarrësve dhe shtetit të së drejtës.
President i SPAKMSH
Julian Kazazi
.org
