Shoqata Ryder Albania është një organizatë jofitimprurëse me qëllim ofrimin e shërbimit të kujdesit paliativ në shtëpi për personat që vuajnë nga sëmundje kërcënuese për jetën, të moshuarit me sëmundje kronike dhe familjarët e tyre. Shoqata Ryder Albania (SHRA) është një organizatë jofitimprurëse e themeluar ne vitin1993, me qëllim ofrimin e shërbimit të kujdesit paliativ falas në shtëpi për personat që vuajnë nga sëmundje kërcënuese për jetën, të moshuarit me sëmundje kronike dhe familjarët e tyre. Kujdesi paliativ është kujdesi i ofruar nga një ekip multidisiplinar në një moment kur sëmundja e pacientit nuk i përgjigjet më trajtimit kurativ dhe qëllimi i trajtimit është qetësimi, lehtësimi dhe një kualitet më të mirë të jetës në fazën e fundit të saj. SHRA ka një përvojë 28 vjeçare në fushën e kujdesit paliativ dhe ofron falas kujdes dhe asistencë mjekësore, psikologjike dhe social-ekonomike për të sëmurët dhe familjarët e tyre, nëpërmjet dy ekipeve multidisiplinare në Tiranë, Durrës dhe rrethinat e tyre.Ka filluar aktivitetin e saj me një ekip të vogël prej 2 mjekësh dhe 1 infermiere ndërsa aktualisht ka 21 anëtarë .Ekipi Tiranës është krijuar në vitin 1993 dhe përbëhet nga një ekip prej 15 anëtarësh (mjekë, infermierë, punonjës socialë ,kujdestarë dhe staf mbështetës) ekipi i Durrësit është krijuar në vitin 1996 aktualisht përbëhet nga 6 anëtarë (mjekë, infermierë dhe punonjëse sociale). SHRA i ofron shërbim rreth 110 pacientëve terminalë në ditë, përkatësisht rreth 60 pacientë në Tiranë ,50 pacientë në Durrës dhe 90 të moshuarve të vetmuar dhe me probleme social ekonomike. Numri i përfituesve në një vit është rreth 600 pacientë. Numri total i pacientëve që kanë përfituar shërbim nga Nëntori 1993 deri në Maj 2021 është rreth 9700 pacientë (5000 në Tiranë dhe 4700 në Durrës.) , nga të cilët rreth 50% janë të moshuar dhe rreth 30000 familjarë. Vizitat në banesë kryhen me një frekuencë nga 2-3 herë në javë dhe kanë për qëllim qetësimin e dhimbjes dhe simptomave të tjera të sëmundjes, menaxhimin e medikamenteve, sigurimin e pajisjeve dhe materialeve mjekësore, mjekimin e plagëve, kujdesin dhe përshtashmërinë e mjedisit për pacientin, këshillimin dhe mbështetjen e familjarëve, edukimin dhe trajnimin e tyre në lidhje me sëmundjen dhe nevojat e pacientit, lehtësimin dhe adresimin e nevojave psikosociale , ekonomike dhe emocionale të të sëmurit dhe familjarëve etj. Krahas asistencës/shërbimit në shtëpi, ndër vite, SHRA ka kontribuar në krijimin e kuadrit normativ të kujdesit paliativ , dokumenteve të rëndësishme për zhvillimin dhe integrimin e shërbimit paliativ në sistemin publik të kujdesit shëndetësor. Disa nga më kryesoret janë ligji i kujdesit paliativ dhe aktet nënligjore, standardet e shërbimit, protokollet klinike, udhërrëfyesi për mënyrën e ofrimit të shërbimit etj. Gjithashtu SHRA ka luajtur një rol të rendësishëm në ngritjen e kapaciteteve të profesionistëve të shëndetit si (mjekë, infermierë, punonjës socialë, psikologë) në fushën e kujdesit paliativ si dhe në përmirësimin e kurrikulës në fakultetin e shkencave sociale, mjekësisë dhe infermierisë.
