Forumi Ekonomik Mbare Shqiptar

21/08/2026

Zhvillimet e fundit në Kosovë, veçanërisht debatet publike mbi cilësinë dhe përbërjen e disa produkteve ushqimore vendore, si dhe trajtimi i përgjithësuar i prodhuesve, kanë nxitur reagimin e Forumit Ekonomik Mbarëshqiptar (FEMSH).

FEMSH vlerëson se kjo nuk është një çështje vetëm e Kosovës, por një fenomen që prek të gjithë hapësirën ekonomike mbarëshqiptare, pasi lidhet drejtpërdrejt me sigurinë e konsumatorit, besimin te prodhuesit vendor dhe qëndrueshmërinë e ekonomive tona.

FEMSH përshëndet reagimin e shpejtë dhe parimor të Aleancës Kosovare të Bizneseve (AKB), e cila ka dëshmuar vazhdimisht se është një hap përpara në evidentimin e problematikave dhe në mbrojtjen e interesave të ligjshme të prodhuesve vendorë.
Siguria ushqimore dhe e drejta e konsumatorit për informacion të saktë janë detyrime ligjore dhe institucionale që duhet të zbatohen pa përjashtim. Çdo prodhues që shkel ligjin dhe cenon sigurinë e konsumatorit duhet të identifikohet dhe të mbajë përgjegjësi individuale, në përputhje me legjislacionin në fuqi dhe shkeljet individuale nuk duhet të përgjithësohen dhe të cenojnë reputacionin e sektorit të prodhimit.

Prodhuesit që investojnë në standarde, procese të kontrolluara, certifikime dhe respektimin e kërkesave ligjore përballen me kosto të konsiderueshme për të garantuar cilësinë dhe sigurinë e produkteve. Kur praktikat e paligjshme të një prodhuesi shndërrohen në gjykim ndaj gjithë sektorit të prodhimit, dëmtohen pikërisht ata që veprojnë në përputhje me ligjin.

Në këtë kuadër, FEMSH vlerëson se nevojitet një platformë strategjike e mbështetur në tri drejtime të qarta: një vlerësim i plotë dhe objektiv i sipërmarrjes prodhuese sipas sektorëve, për të verifikuar standardet dhe protokollet e prodhimit; forcimi i reagimit të prodhuesve të ndershëm dhe i shoqatave të tyre ndaj operatorëve që nuk i përmbushin këto standarde; si dhe kontrolli i barabartë e transparenca nga institucionet për produktet vendore dhe ato të importuara. Për çdo mospërputhje duhet të mbajë përgjegjësi subjekti konkret, pa dëmtuar reputacionin e sektorit të prodhimit.

Mbrojtja e konsumatorit dhe mbrojtja e prodhimit vendor nuk jane interesa të kundërta. Përkundrazi, prodhuesi që respekton ligjin dhe standardet është aleati i parë i konsumatorit. Të dyja interesat mbështeten mbi të njëjtin parim: rregulla të qarta, zbatim të barabartë dhe institucione që veprojnë me përgjegjësi.

FEMSH thekson se kjo çështje shkon përtej një sektori ose një tregu të vetëm. Në kushtet kur ekonomitë e hapsirës mbarëshqiptare po përballen me deficit tregtar dhe me varësi të lartë nga importet, sipërmarrja prodhuese dhe eksportuese duhet të inkurajohet dhe forcimi i kapaciteteve vendore është me rendësi të konsiderohet një interes thelbësor i përbashkët ekonomik mbarëshqiptar. Çdo kapacitet prodhues që dobësohet ose largohet nga tregu krijon më shumë hapësirë për importet dhe cenon qëndrueshmërinë ekonomike.

FEMSH mbështet pa rezervë kontrollet, transparencën dhe zbatimin e ligjit. Njëkohësisht, kërkon që komunikimi institucional dhe publik të jetë i bazuar në fakte, të jetë proporcional dhe i përgjegjshëm, duke shmangur përgjithësimet që dëmtojnë besimin te prodhuesit që përmbushin kërkesat ligjore. FEMSH mbetet i angazhuar të kontribuojë në një dialog të strukturuar ndërmjet institucioneve, dhomave të tregtisë, shoqatave të prodhuesve dhe përfaqësuesve të konsumatorëve, duke nisur nga problematikat e shfaqura në Kosovë dhe duke e shtrirë këtë qasje në tërë hapësirën ekonomike mbarëshqiptare.

20/07/2026

Deklarata e Forumit Ekonomik Mbarëshqiptar për Partneritetin Qeveri–Biznes

RUGOVË – Bordi Drejtues i Forumit Ekonomik Mbarëshqiptar (FEMSH), gjatë një mbledhjeje të rëndësishme të mbajtur më 12 korrik 2026 në Rugovë, ka adresuar me shqetësim ngërçin që po mban peng integrimin e plotë ekonomik të rajonit

16/07/2026

DEKLARATË PËR MEDIA‼️

Forumi Ekonomik Mbarëshqiptar (FEMSH), kërkon partneritet të ri ndërmjet qeverive dhe sektorit privat për ndërtimin e një Hapësire të Përbashkët Ekonomike Rajonale.

13/07/2026

Bordi Drejtues i FEMSH vijon përgatitjet për Forumin Ekonomik për Zhvillim dhe Integrim 2026

Më 12 korrik 2026, në Rugovë të Pejës, u zhvillua mbledhja e Bordit Drejtues të Forumit Ekonomik Mbarë Shqiptar (FEMSH), e drejtuar nga Kryetari i Forumit, z. Besim Beqaj, me pjesëmarrjen e anëtarëve të Bordit..

Në qendër të diskutimeve ishte vijimi i përgatitjeve për organizimin e Forumit Ekonomik për Zhvillim dhe Integrim, i planifikuar të zhvillohet më 23 tetor 2026 në Tiranë, si një platformë e rëndësishme dialogu dhe bashkëpunimi ndërmjet aktorëve ekonomikë, institucionalë dhe akademikë nga të gjitha trevat shqiptare.

Anëtarët e Bordit diskutuan mbi avancimin e punës lidhur me konceptin dhe programin e aktivitetit, identifikimin e panelistëve dhe pjesëmarrësve, si dhe aspektet organizative dhe logjistike të nevojshme për realizimin me sukses të forumit. Gjithashtu, u përcaktuan hapat e mëtejshëm dhe detyrat prioritare për periudhën në vijim, me synim sigurimin e një aktiviteti me ndikim të gjerë në forcimin e bashkëpunimit ekonomik mbarëshqiptar dhe promovimin e integrimit rajonal.

Gjatë mbledhjes u diskutuan gjithashtu zhvillimet e fundit ekonomike në rajon dhe rëndësia e koordinimit të përbashkët për adresimin e sfidave dhe shfrytëzimin e mundësive të reja për komunitetin e biznesit shqiptar.

Forumi Ekonomik Mbarë Shqiptar mbetet i angazhuar për të kontribuar në ndërtimin e urave të bashkëpunimit ekonomik dhe institucional, duke promovuar iniciativa që nxisin zhvillimin e qëndrueshëm dhe integrimin ekonomik të hapësirës mbarëshqiptare.

04/06/2026

FEMSH në 20-vjetorin e OEMVP-së – Vlerësime për kontributin në zhvillimin ekonomik dhe bashkëpunimin rajonal.

Forumi Ekonomik Mbarë Shqiptar (FEMSH) mori pjesë në ceremoninë solemne të organizuar me rastin e 20-vjetorit të themelimit të Odës Ekonomike të Maqedonisë Veri-Perëndimore (OEMVP), një institucion që prej dy dekadash ka luajtur një rol të rëndësishëm në përfaqësimin e interesave të biznesit dhe promovimin e zhvillimit ekonomik në rajon.

FEMSH u përfaqësua në këtë aktivitet nga Kryetari i Bordit Drejtues, z. Besim Beqaj, si dhe nga anëtarët e Bordit Drejtues z. Nagib Fejzi, z. Nebi Hoxha, z. Mendi Qyra dhe z. Xhemail Dauti, duke dëshmuar angazhimin e vazhdueshëm të Forumit për forcimin e bashkëpunimit ekonomik dhe institucional në hapësirën mbarëshqiptare.

Një moment i veçantë i ceremonisë ishte vlerësimi me Çmimin e Mirënjohjes i Kryetarit të FEMSH, z. Besim Beqaj, si dhe për z. Nikolin Jaka dhe z. Agim Shahini, të cilët u nderuan për kontributin e tyre në zhvillimin e bashkëpunimit ekonomik, promovimin e sipërmarrjes dhe forcimin e lidhjeve ndërmjet komuniteteve të biznesit në rajon.

Ky jubile shërbeu si një moment reflektimi mbi rrugëtimin 20-vjeçar të OEMVP-së, por edhe si një mundësi për të riafirmuar rëndësinë e bashkëpunimit, dialogut dhe partneriteteve strategjike në funksion të zhvillimit ekonomik dhe integrimit të mëtejshëm të biznesit shqiptar.

Forumi Ekonomik Mbarë Shqiptar uron Odën Ekonomike të Maqedonisë Veri-Perëndimore për këtë përvjetor të rëndësishëm dhe i dëshiron suksese të mëtejshme në misionin e saj në shërbim të komunitetit të biznesit dhe zhvillimit ekonomik të rajonit.

27/05/2026

Forumi Ekonomik Mbarë Shqiptar uron të gjithë besimtarët myslimanë me rastin e Kurban Bajramit.

Urojmë që kjo festë t’ju sjellë paqe, shëndet, begati dhe harmoni në familjet tuaja.
Le të shërbejë kjo festë si një moment reflektimi, solidariteti dhe afrimi mes njerëzve, duke forcuar vlerat e humanizmit, bashkëpunimit dhe respektit të ndërsjellë.

Me urimet më të mira!

Kryetari i FEMSH
Besim Beqaj

23/04/2026

Forumi Ekonomik Mbarë Shqiptar (FEMSH) është një organizatë jofitimprurëse, e regjistruar si person juridik me Vendim të Gjykatës së Rrethit Gjyqësor Tiranë. FEMSH synon të krijojë një strukturë lobuese që kontribuon në përmirësimin, zhvillimin dhe bashkimin ekonomik në hapësirën mbarëshqiptare.

Veprimtaria e FEMSH është e shtrirë në Shqipëri, Kosovë dhe Maqedoninë e Veriut dhe fokusohet në mbrojtjen e interesave të sipërmarrjes rajonale, promovimin e ideve ekonomike liberale, si dhe në lehtësimin e barrierave që bizneset hasin në shkëmbimet tregtare. Nëpërmjet iniciativave të saj, FEMSH synon të nxisë modele bashkëpunimi ekonomik që kontribuojnë në zhvillimin e një ekonomie komplementare në rajon.

Kryetari i FEMSH, z. Besim Beqaj, është një ekonomist me përvojë të gjerë akademike, institucionale dhe në sektorin privat. Ai ka mbajtur funksione të rëndësishme si Kryetar i Odës Ekonomike të Kosovës, ministër në disa dikastere të Qeverisë së Kosovës dhe deputet në Kuvendin e Kosovës. Gjithashtu, është themelues i Horizon School në Kosovë dhe aktiv në fushën e konsulencës për zhvillimin ekonomik dhe politikat publike.

22/04/2026

22/04/2026

"Kriza e çmimeve të karburanteve – biznesi kërkon ndërhyrje të menjëhershme"

Në kuadër të konferencës së përbashkët për shtyp, Forumi Ekonomik Mbarë Shqiptar (FEMSH), në bashkëpunim me Dhomën e Tregtisë dhe Industrisë Tiranë dhe Aleancën Kosovare të Bizneseve (AKB), së bashku me shoqata të biznesit, ngritën shqetësimin mbi rritjen e çmimeve të karburanteve dhe ndikimin e saj në ekonomi.
Kryetari i FEMSH, z. Besim Beqaj, theksoi se rritja e vazhdueshme e çmimeve përbën një rrezik serioz për konkurrueshmërinë e ekonomisë dhe stabilitetin e tregut, duke ndikuar drejtpërdrejt në sektorët kryesorë si transporti, prodhimi, bujqësia dhe shërbimet.
Ai bëri thirrje për ndërhyrje të menjëhershme dhe të koordinuar nga qeveritë në Shqipëri dhe Kosovë, duke nënvizuar nevojën për masa konkrete dhe të matshme për të përballuar situatën.
KËRKESAT KRYESORE TË BIZNESIT
Rishikim i përkohshëm i barrës fiskale mbi karburantet, në përputhje me praktikat e BE-së
Transparencë të plotë në formimin e çmimit
Forcim të kontrollit dhe konkurrencës së ndershme në treg
Mbështetje për sektorët më të ekspozuar, si transporti, bujqësia dhe industria
Masa strukturore afatgjata, përfshirë rezervat strategjike dhe energjinë alternative
Dialog të institucionalizuar qeveri–biznes
Në përfundim, përfaqësuesit e biznesit theksuan se mungesa e reagimit të shpejtë rrezikon të përkeqësojë më tej situatën ekonomike, duke kërkuar angazhim të menjëhershëm nga institucionet përkatëse.

“Beqaj: Çmimet e karburanteve po godasin ekonominë, kërkojmë ndërhyrje urgjente”

22/04/2026

"Kriza e çmimeve të karburanteve, rrezik real për ekonominë. Biznesi kërkon ndërhyrje të menjëhershme nga institucionet shtetërore."

Kjo nismë vjen nga Forumi Ekonomik Mbarë Shqiptar (FEMSH), në bashkëpunim me Dhomën e Tregtisë dhe Industrisë Tiranë dhe Aleancën Kosovare të Bizneseve (AKB) –në bashkëpunim me disa shoqata biznesi; si një zë i përbashkët i biznesit që kërkon veprim të menjëhershëm.
Kërkesat tona ndaj qeverive
Në emër të komunitetit të biznesit, ne kërkojmë masa të menjëhershme, konkrete dhe të matshme për të përballuar këtë situatë:

1. Rishikim të përkohshëm dhe fleksibël të barrës fiskale
Struktura aktuale e çmimit përmban një peshë të lartë taksash. Nevojitet ndërhyrje e targetuar për stabilizimin e tregut, në përputhje me praktikat e vendeve të Bashkimit Evropian.
2. Transparencë të plotë në formimin e çmimit
• publikim periodik i strukturës së çmimit;
• qartësim i faktorëve ndikues (çmimet në tregjet ndërkombëtare, taksat, akciza, etj).
3. Forcim të kontrollit dhe konkurrencës së ndershme
• monitorim aktiv i operatorëve;
• hetim i rasteve të mundshme të abuzimit;
• luftë kundër informalitetit.
4. Mbështetje për sektorët më të ekspozuar
Transporti, bujqësia, industria prodhuese, sherbimet dhe turizmi kërkojnë masa konkrete lehtësuese për të ruajtur konkurrueshmërinë.
5. Masa strukturore afatmesme dhe afatgjata
• krijimi i rezervave strategjike të naftës;
• diversifikimi i burimeve të energjisë;
• investime në energji alternative dhe eficiencë energjetike.
6. Dialog i institucionalizuar qeveri–biznes
Kërkohet një dialog i hapur, i rregullt dhe funksional për hartimin e politikave efektive dhe të zbatueshme.

🤝 Përfaqësuesit e organizatave të biznesit:
 Forumi Ekonomik Mbarëshqiptar (FEMSH)
 Dhoma e Tregtisë dhe Industrisë Tiranë
 Aleanca Kosovare e Bizneseve (AKB)
 Shoqata e Ndërtuesve
 Këshilli i Agrobiznesit Shqiptar (KASH)
 Shoqata Kombëtare e Transportit të Udhëtarëve të Shqipërisë
 Shoqata Shqiptare e Turizmit
 Shoqata e Industrisë Ushqimore Shqiptare
 Shoqata e Industrisë së Përpunimit të Qumështit
 Shoqata e Bimëve Medicinale
 PRO-Eksport Albania
 Shoqata e Grave Profesioniste, Afariste dhe Zejtare