Njerez te Humbur - Missing People Albania

22/03/2026

Episodi i plotë:

E Diela Shqiptare, programi më popullor në të gjitha familjet shqiptare, vjen çdo të diel. Një program i cili përfshin një fashë orari maratonë, prej 6 orësh...

22/03/2026

Anile gjen familjen biologjike pas 44 vitesh
22 Mars 2026 – Aniles iu deshën 44 vite për të parë fytyrën e nënës së saj biologjike, jo përballë, por përmes një fotografie. Një përqafim që e kishte ëndërruar për vite me radhë nuk ndodhi kurrë. Në vend të tij, ajo takoi të motrën, Mondën, një nga katër fëmijët e tjerë që nëna e saj Florida kishte lënë në këtë botë.
“Erdha shumë vonë…” – ishin fjalët e Aniles mes lotësh, kur mësoi se nëna biologjike ishte ndarë nga jeta vetëm 11 muaj më parë. Një peng i madh që do ta shoqërojë gjatë, por që zbutet disi nga fakti se sot ajo e di që nuk është më vetëm.
Momenti më prekës erdhi kur Monda tregoi se nëna e tyre e kishte kërkuar gjatë gjithë jetës. Ajo kujton se në fëmijëri udhëtonin shpesh drejt Vlorës dhe ndaleshin në Shtëpinë e Foshnjës, pa e kuptuar atëherë arsyen e atyre vizitave. Sot, ajo histori mori kuptim.
Florida kishte mbetur shtatzënë nga një lidhje jashtëmartesore dhe për të fshehur ngjarjen, familjarët e dërguan nga Berati në Lushnje, ku më 12 shkurt 1982 lindi Anilen. U detyrua ta linte aty dhe një vit më vonë u martua, duke krijuar një familje tjetër. Askush nuk mund ta dijë çfarë ka përjetuar ajo nënë që la pas një pjesë të vetes.
Anile u adoptua në moshën 2-vjeçare nga një çift në zonën e Finiqit, në Sarandë. Prindërit adoptues i dhanë dashuri, por jeta nuk ishte e lehtë. Varfëria, bullizmi dhe pamundësia për ta mbrojtur e bënë fëmijërinë e saj të vështirë. Në moshën 11-vjeçare ajo përjetoi abuzim nga një person i afërt me familjen, një histori që u detyrua ta mbante në heshtje për shkak të frikës.
Pa mbushur ende 13 vjeç, u largua drejt Greqisë për të punuar, por edhe atje u përball me situata të vështira dhe abuzime. Më pas shkoi në Itali, ku pas shumë sfidash dhe sakrificash, arriti të ndërtojë një jetë më të qëndrueshme dhe të krijojë familjen e saj.
Humbja e prindërve birësues ishte një tjetër goditje e rëndë. Dyshimet për origjinën e saj nuk u shuan kurrë, të ushqyera nga fjalët e të tjerëve dhe nga një ndjesi e brendshme që e shtynte të kërkonte të vërtetën. Me kalimin e viteve, ajo kureshtje u kthye në mall dhe në dëshirë për të njohur nënën që e solli në jetë.
Sot tek “Ka një mesazh për ty”, ajo nuk arriti t’i japë përqafimin që kishte imagjinuar për vite me radhë. Por mësoi emrin e saj dhe zbuloi se kishte një familje që nuk e kishte njohur kurrë më parë. U lumturua sepse ngjashmëria me të ëmën ishte e mahnitshme dhe sa herë do shohë veten në pasqyrë do ketë ndjesinë sikur është përballë saj...
Kjo është një histori e dhimbshme, por edhe një thirrje e qartë për të gjithë ata që ndodhen në të njëjtën dilemë: kërkoni rrënjët tuaja sa jeni në kohë.
📩 Na shkruani në inbox
📧 [email protected]

10/03/2026

Opinion nga Blendi Fevziu, emisioni politik më i ndjekur dhe më i preferuar në ekranet shqiptare. Arena e politikës shqiptare që prej 31 Gushtit 1997. Koment...

18/11/2025

E Diela Shqiptare, programi më popullor në të gjitha familjet shqiptare, vjen çdo të diel. Një program i cili përfshin një fashë orari maratonë, prej 6 orësh...

15/11/2025

Rukija gjen vajzën e braktisur Lindën pas 29 vitesh, adoptuar në Francë.

19 Tetor 2025 – Pas 29 vitesh vuajtje shpirtërore, Rukija gjen vajzën të cilën u detyrua t’a braktisë në maternitet. Lajmi i shumëpritur, bën që nënës t’i bjerë të fikët në studio. E birësuar në Francë, vajza ruan ende të njëjtin emër që i vuri e ëma: Linda. Takimi i parë mes tyre ka qenë ndoshta dita e parë e lumturisë për Rukijen e cila ka kaluar një jetë tejet të vështirë mes varfërisë e dhunës në familje.
Rukija ka lindur e ka jetuar në Funarës të Librazhdit në një familje me shumë anëtarë, në një vend që vetëm shtëpi nuk mund të quhej pasi shiu dhe i ftohti futej brenda dhe buka mungonte thuajse përherë. Nga një lidhje e shkurtër që pati, mbeti shtatëzënë dhe e mbajti të fshehtë pasi e kishte vendosur që fëmijën të mos e rriste në ato kushte ku nuk do mbijetonte dot. Në prill të vitit 1996, ajo sjell në jetë Lindën në maternitetin e Librazhdit. Firmosi që për vajzën të kujdesej shteti dhe kështu Linda e vogël përfundoi në shtëpi fëmije dhe Rukija nuk e mori vesh më kurrë se çfarë ndodhi me të. Ajo thuajse i kishte humbur shpresat se do e gjente të gjallë...
Pa mbushur ende tre vjece, Linda adoptohet nga një çift francez të cilët vijnë dhe e marrin në Shqipëri. Ndoshta Linda nuk do e shihte më kurrë vendlindjen e saj nëse gazetari që e gjeti vendndodhjen e saj në Francë, nuk do e kontaktonte dhe do i thoshte se po kërkohej nga nëna biologjike në programin “Ka një mesazh për ty”. Pas një periudhe disi të gjatë kohore për t’a bindur, me ndihmën edhe të mikeshës së programit, Mimozës që jetonte atje, Linda vendosi që të vijë publikisht në emision. Për t’u ndier më e sigurt, ajo zgjodhi të kishte me vete edhe babain adoptues Filipin, i cili u trondit nga rrëfimi i nënës biologjike të Lindës. Vajza e ka ditur që e vogël që është e adoptuar dhe nuk e ka paragjykuar kurrë nënën biologjike pa e ditur historinë të plotë, të cilën e mësoi pas 29 vitesh....!

Shikoni episodin e plotë në YouTube:
https://www.youtube.com/watch?v=-IuFoEo50F0

Nëse keni histori të ngjashme, na shkruani në inbox në rrjetet tona sociale ose në email: [email protected]

05/06/2025

Erion Dehari gjen nënën biologjike Lutfije Dema pas 46 vitesh

16 Shkurt 2025 – Në 46 vjetorin e tij, Erion Dehari ndërmori një hap të guximshëm për të kërkuar origjinën biologjike. E mesoi kur ishte 18 vjeç në rrethana të pa zakonta që zonja që e kishte lindur mund të quhej Lutfije Dema por nuk arriti t’a vërtetonte kurrë deri më sot.
Një vit më parë, Erioni mori bekimin e nënës adoptuese që të kërkojë nënën biologjike tek “Ka një mesazh për ty”. Pas kërkimeve intensive e një pune të mirëfilltë investigative, u arrit të gjendej nëna biologjike, Lutfije Shkëmbi (Dema) e cila kishte përfunduar thuajse e braktisur në qendrën komunitare “Strehëza” në Tiranë. Problemi qëndronte se pas takimit me gazetarët ajo deklaroi se nuk ka lindur fëmijë në vitin 1979...
Detajet e jetës së saj dukeshin të paqarta dhe herë-herë kontradiktore. Pas ikjes nga jeta të bashkëshortit, Lutfija mbeti e vetme pasi dhe dy fëmijët binjakë që ka patur nga kjo martesë jetojnë në Itali. Me një mirësi e ëmbëlsi që shprehej në portretin dhe fjalët e saj, ajo pranoi që të bëjë analizën e ADN-së për të ndihmuar Erionin, djalin i cili po kërkonte nënën biologjike.
Pak ditë më pas, në studion e programit u paraqitën të dy, Erioni me zemër të ngrirë dhe Lutfija e qetë në pritje të rezultatit. Të gjithë janë habitur nga gatishmëria e saj për t’a pranuar Erionin si djalë biologjik kur ADN-ja vërtetoi shkencërisht atë që pritej: lidhjen nënë e bir. Përqafimi i parë mes tyre, mbase do të shkundë pluhurin e harresës tek Lutfija por për Erionin është rikthim në pikën zero për të ndërtuar një marrdhënie dhe dashuri të munguar...

Update ekskluziv:
Fatkeqësisht, pak ditë pasi Erioni gjeti nënën biologjike Lutfijen, kjo e fundit përfundoi në spital dhe ndërroi jetë. Ironikisht i vetmi person që i’u gjend afër dhe e përcolli në banesën e fundit ishte pikërisht ai, djali që ajo braktisi dikur...

Nëse keni histori të ngjashme, na shkruani në inbox në rrjetet tona sociale ose në email: [email protected]

📺 Ndiqni emisionin e plotë në YouTube:
🔗 https://www.youtube.com/watch?v=aMzZiFXn9Z8

05/06/2025

Erjon Ruka gjen nënën biologjike Marina pas 44 vitesh dhe takon vëllain Mishel!

28 Prill 2024 – Erjoni ishte vetëm 13 vjeç kur rastësisht nga një letër e fshehur në dollapin e rrobave mësoi se ishte i adoptuar. Shumë vite më vonë, kur ndërroi jetë babai që e rriti, e vërtetoi plotësisht nga një çertifikatë e vjetër se emri i tij ishte ndryshuar nga Rikbert në Erjon dhe kjo vulosi faktin se ishte i adoptuar. Ndër vite kishte krijuar përshtypjen e gabuar se emri i lindjes ishte bashkim i emrave të prindërve biologjikë, Rikard dhe Berta.
Ai nuk e pyeti kurrë nënën adoptuese se çfarë dinte rreth origjinës së tij por priste momentin e duhur që të niste kërkimet. Megjithse i rritur dhe baba i tre vajzave, ai ndoshta nuk do e merrte ende guximin që të dilte publikisht e të ndante historinë e tij, nëse nuk do ishte bashkëshortja Evisi ajo e cila bëri hapin e parë. U vu në kontakt me “Ka një mesazh për ty” dhe dha ato të dhëna që diheshin: emrin Rikbert e datëlindjen 6 mars 1980. Nuk kaloi shumë kohë dhe stafi arriti të nxirrte diçka në dritë e madje të kishte rezultate konkrete. Nëna biologjike jetonte dhe quhej Marina. Në pamundësi shëndetësore për të ardhur në studio pas ftesës që mori nga programi, Marina i kërkoi djalit të saj Mishelit që t’a përfaqësonte pasi instikti i saj e çonte vetëm tek një histori. Për herë të parë ajo gjen guximin dhe i tregon Mishelit që 44 vite më parë ishte detyruar që të braktiste një fëmijë në maternitet dhe megjithse i kishin thënë që kishte ndërruar jetë, zemra e saj e ndiente që mund të ishte gjallë. E duke menduar këtë gjë, ajo dëshironte që të mos ishte një braktisje e dytë duke mos u përballur me të.
E kështu ndodhi. Misheli e dëgjoi gjithë rrëfimin e jetës së vëllait të tij ende të panjohur derisa në një moment u gjendën përballë njëri – tjetrit. Erjoni mësoi lajmin e shumëpritur se nëna jeton dhe e pret t’a takojë por kënaqësinë e përqafimit të parë me gjakun e tij e pati me vëllain Mishel. Pas 44 vitesh ai gjeti nënën biologjike dhe bashkoi dy familje në një.

Nëse keni histori të ngjashme, na shkruani në inbox në rrjetet tona sociale ose në email: [email protected]

📺 Ndiqni emisionin e plotë në YouTube:
🔗 https://www.youtube.com/watch?v=vWE6ho-_DXE

05/06/2025

Zgjidhet dilema 50 vjeçare, Kledi gjen nënë biologjike Shpresën!
1 Janar 2024 – Para pak kohësh, një zonjë me emrin Edlira me banim në qytetin e Fierit, rrëfeu një histori familjare sa të dhimbshme po aq edhe misterioze. Ajo mendonte se kishte gjetur vëllain për të cilin mjekët thanë se vdiq në spital fiks 50 vite më parë. Njohja e Edlirës me Kledin ka qenë krejt rastësore, kur ky i fundit, në rolin e teknikut të sobës ka shkuar në shtëpinë e zonjës. Gjatë bisedës, pasi mori vesh se zotëria ishte i adoptuar dhe se kishte lindur në Urën Vajgurore, asaj i’u kujtua një ngjarje e vjetër ku prindërve Arqile e Drita Mataj i’u tha se djali i tyre i porsalindur kishte ndërruar jetë në spital. Megjithse vëllai i Edlirës kishte lindur më 24 mars 1973 në Çiflig të Urës Vajgurore dhe kishte ndërruar jetë pas disa ditësh dhe Kledi e kishte datëlindjen më 4 korrik 1974, kjo nuk e pengoi Edlirën që të dilte në konkluzionin se ai mund të ishte vëllai i saj. Ajo pretendon se gjyshja i kishte treguar në momentet e fundit të jetës se “vëllai jeton, ndaj kërkoje” por këtë histori ajo nuk e kishte ndarë kurrë me askënd e madje nuk kishte dëshmitarë që t’a vërtetonin. E megjithatë, konfuzioni dhe euforia e Edlirës që ndiente se kishte gjetur vëllain që nuk e kishte njohur kurrë dhe dëshira e një djali të adoptuar si Kledi për të gjetur nënën e familjen biologjike, i bëri ata të frekuentohen rregullisht e të kenë hyrje – dalje edhe në familjet e tyre për një vit. Por dëshira nuk është fakt dhe faktet duhen provuar. Kjo i solli tek “Ka një mesazh për ty” që të investigonin më tej e të vërtetonin përfundimisht nëse i përkisnin të njëjtit gjak. Stafi intervistoi të gjitha palët, kërkoi e gjeti dokumentat dhe ballafaqoi faktet. Në skenë doli Shpresa Dervishi, një zonjë e cila jetonte e vetmuar në një konvikt të qytetit të Beratit. E lindur në Pogradec, edhe ajo kishte qenë një fëmijë i braktisur që nuk e dinte se kush ishte nëna e saj biologjike pasi ishte rritur nëpër disa jetimore dhe askush nuk ishte interesuar kurrë për të. Ajo e pranoi menjëherë se nga një marrdhënie e pa kurorëzuar kishte patur një djalë të quajtur Kledi Dervishi i lindur më 4 korrik 1974 në maternitetin e Urës Vajgurore. Për shkak të kushteve të vështira ishte detyruar që t’a braktiste në Shtëpinë e Fëmijës në Shkodër e më pas i kishin thënë se ishte adoptuar. Faktet flisnin qartë, dokumentat përputheshin plotesisht me identitetin e ri të Kledi Mukës, përpos ngjashmërisë fizike mes tij dhe Shpresës që ishte e dukshme. Ndryshe nga vajza e tyre, prindërit e Edlirës nuk ishin shumë entuziastë për çeljen e kësaj plage të vjetër sepse ata ishin të bindur se djali i tyre kishte ndërruar jetë në spital vite më parë. Shpresa Dervishi nga ana tjetër ishte e bindur se Kledi Muka ishte djali i saj që kishte braktisur dikur. Kledi ishte mes dy zjarresh dhe e vetmja mënyrë për të nxjerrë në dritë të vërtetën ishte testi i ADN-së. Ekspertët e Forensic Center Albania morën kampione ADN-je të Kledit për t’i krahasuar me ato të dy kandidateve për “nëna”, të zonjës Drita nga Ura Vajgurore dhe të Shpresës nga Berati. Hapja e zarfit me rezultatet e testeve në studion e “Ka një mesazh për ty” ishte pika kulminante e kësaj historie. Kledi Muka nxitoi të përqafojë menjëherë zonjën Shpresa Dervishi fill pasi ekspertët lexuan emrin e saj si nëna biologjike, tashmë e vërtetuar shkencërisht. 50 vite u përmblodhën në një moment që tashmë do shërbejë si dita e parë e një marrdhënie të munguar nënë e bir... Edlira i’u bashkua e pezmatuar përqafimit të tyre pasi nuk e priste këtë rezultat por së paku, mësoi një të vërtetë. E trajtoi për një vit si vëlla e tashmë Kledin do e ketë edhe mik. Dyshimi i saj vuri në lëvizje një mekanizëm të madh investigimi dhe u dha përgjigje konkrete tre familjeve.

Nëse keni histori të ngjashme, na shkruani në inbox në rrjetet tona sociale ose në email: [email protected]

Linku i emisionit ne YouTube: https://www.youtube.com/watch?v=paowutSfIYo