08/01/2026
Letër e hapur:
Për ata që ironizojnë nga zyrat me kondicioner
Sapo pashë një postim në këtë portal që ironizonte një mjet të ushtrisë gjatë një incidenti në zonat e përmbytura. Si ish-ushtarak, nuk mund të hesht, jo për veten time, por për ata djem e vajza që sot janë në mes të ujit, ashtu siç isha unë dikur.
Është e rëndësishme që publiku të kuptojë diçka: Ky mjet që shihni të anuar apo të bllokuar, nuk ka ngecur në ndonjë kafe të Tiranës. Ai ka ngecur duke tentuar të shkojë aty ku mjetet tuaja luksoze nuk afrohen dot, aty ku frika mbyt guximin dhe ku njerëzit e thjeshtë presin me sy nga qielli për një dorë që t'i nxjerrë nga shtëpia.
Kam qenë vetë në Shkodër kur qyteti ishte nën pushtetin e ujit. Kam qëndruar një javë pa hequr çizmet, i lagur deri në kockë, ditë e natë duke evakuuar banorë. Kam thyer edhe hundën në një operacion shpëtimi dhe, ashtu si kolegët e mi, nuk kam kërkuar as faleminderit e as shpërblim. E kemi bërë sepse betimi ndaj atij flamuri dhe këtij populli nuk është lojë portalesh.
Ushtria Shqiptare është e para që shkon në zjarre kur mali digjet, e para në borë kur fshatrat bllokohen, dhe e para në gërmadha kur toka dridhet. Ata janë heronjtë e heshtur që nuk kanë kohë të bëjnë "selfie" apo të kurojnë imazhin, sepse janë të zënë duke shpëtuar jetë.
Përpara se të ironizoni një mjet të bllokuar në detyrë, mendoni për ata djem që po kalojnë natën në të ftohtë që ju të flini të qetë. Respekti dhe mirënjohja janë minimumi që mund t'u japim. Baltën nga uniforma ata e lajnë me ujë, por juve nuk ua lan dot asnjë postim cinizmin që keni për njerëzit e sakrificës.
Me respekt për çdo ushtarak në terren,
Një ish-shok armësh.🖋🤝
