09/03/2026
Organizata te shoqerise Civile, anëtarë dhe kontributorët e Rrjetit PRISMA shpallin publikisht bashkimin e tyre për të ndërmarrë një nismë advokimi për ndryshime ligjore në Ligjin Nr. 7703, datë 11.05.1993 “Për Sigurimet Shoqërore në Republikën e Shqipërisë”, me qëllim përmirësimin e mbrojtjes sociale për gratë dhe adresimin e pabarazive strukturore që ato përballen në tregun e punës dhe në sistemin e sigurimeve shoqërore.
Çështjet kryesore të identifikuara janë:
• mosnjohja e punës së papaguar të kujdesit si periudhë sigurimi;
• mungesa e dispozitave që adresojnë pabarazitë gjinore në përfshirjen në skemat e sigurimeve shoqërore;
• mbështetja shumë e kufizuar për nënat me shumë fëmijë dhe për gratë me shkëputje nga tregu i punës për arsye kujdesi;
• përjashtimi i shumë grave që punojnë në bujqësi, ekonomi familjare ose sektorë informalë.
Ndryshimet e propozuara nuk janë thjesht amendime teknike, por një hap strategjik drejt garantimit të barazisë gjinore dhe drejt një sistemi më të drejtë të mbrojtjes sociale. Integrimi i këtyre dispozitave do të kontribuojë në përmirësimin e mirëqenies së grave dhe familjeve dhe në zhvillimin social dhe ekonomik të vendit.
- Për të gjitha gratë dhe vajzat
