03/06/2026
Ushqimi si gjuha e përbashkët e Ballkanit
Premiera e filmit dokumentar dhe hapja e ekspozitës fotografike në Shkodër
Ushqimi shpesh na lidh pikërisht atëherë kur gjithçka tjetër duket se na ndan.
Qendra për Zhvillimin e Fotografisë nga Beogradi, Serbi, dhe IRSH nga Shkodra, Shqipëri, do të organizojnë ngjarjen përmbyllëse të projektit artistik rajonal Frames of Flavours të premten, më 5 qershor 2026, duke filluar nga ora 11:00, në Bibliotekën Marin Barleti në Shkodër.
Programi do të përfshijë premierën e një filmi dokumentar, të ndjekur nga hapja zyrtare e ekspozitës fotografike.
Në diskutim do të marrin pjesë mentorët e projektit Aleksandra Petrushevska, artiste vizuale dhe profesoreshë në International Balkan University në Shkup, Zvezdan Mančić, president i Qendrës për Zhvillimin e Fotografisë dhe drejtor i Festivalit Ndërkombëtar të Fotografisë Vizualizator në Beograd, si dhe Senad Xhexhovi, artist vizual i njohur shqiptar, dizajner grafik dhe pedagog nga Shkodra, i cili ligjëron Art Grafik dhe Dizajn Grafik në Universitetin e Shkodrës “Luigj Gurakuqi”.
Në diskutim do të marrë pjesë edhe Blendi Dibra, drejtor i IRSH-së, partnerit shqiptar të projektit dhe bashkëorganizator i ngjarjes përmbyllëse në Shkodër.
Ekspozita Frames of Flavours paraqet një përzgjedhje punësh që shqyrtojnë se si ushqimi formëson marrëdhëniet mes njerëzve, identitetin dhe kujtesën kulturore. Fokusi i saj nuk është vetëm te gatimet, por te njerëzit, ritualet, atmosferat dhe marrëdhëniet që krijohen rreth ushqimit — nga përgatitja e zahireve dhe drekat familjare deri te puna në fshat, ndarja e recetave dhe momentet e mbledhjes rreth tryezës.
“Frames of Flavours” zbatohet në kuadër të Programit të Mbështetjes Financiare për Organizatat e Shoqërisë Civile (FSTP), të cilin e zbaton Agjencia e Demokracisë Lokale – LDA Subotica në bashkëpunim me Fondacionin Novi Sad – Kryeqyteti Evropian i Kulturës, koordinator i projektit “District of Reconciliation”, i bashkëfinancuar nga Bashkimi Evropian përmes Programit IPA III për mbështetjen e shoqërisë civile dhe medias në Ballkanin Perëndimor.
