24/06/2026
Ftesë për një mbrëmje kushtuar regjisorit legjendar Thoma Milaj
Ditën e enjte, më 25 qershor 2026, në orën 19:00, në Galeria e Arteve Sarandë, do të zhvillohet një aktivitet i veçantë artistik dhe përkujtimor kushtuar regjisorit legjendar të Estradës Profesioniste të Sarandës, Thoma Milaj.
I konceptuar dhe realizuar nga regjisori Vangjel Agora , aktiviteti do të sjellë para publikut materiale të rralla, kujtime, dëshmi dhe momente artistike të përgatitura posaçërisht për këtë rast, duke krijuar një mozaik të pasur mbi jetën dhe veprën e një prej figurave më të spikatura të artit skenik sarandiot.
Mbrëmja pritet të jetë një homazh i denjë për artistin që la gjurmë të pashlyeshme në historinë e Estradës Profesioniste të Sarandës. Përmes materialeve filmike, kujtimeve dhe interpretimeve artistike, spektatorët do të kenë mundësinë të rikthehen në kohë dhe të përjetojnë emocionet që ka përcjellë arti i tij ndër vite.
Në këtë aktivitet do të marrin pjesë dhe do të performojnë artistë, këngëtarë dhe instrumentistë të njohur, të cilët do ta bëjnë këtë mbrëmje një buqetë të bukur emocionesh, kujtimesh dhe vlerash artistike.
Ju ftojmë të bëheni pjesë e kësaj mbrëmjeje të veçantë, për të nderuar së bashku figurën e Thoma Milaj dhe kontributin e tij të çmuar në kulturën dhe artin e qytetit të Sarandës.
Mirë se vini më 25 qershor 2026, ora 19:00, në Galerinë e Arteve Sarandë!
