11/06/2026
📢 Reagim publik nga Miranda Rira për Mbro Lumin Shkumbin nga Ndotjet - Librazhd:
''Nuk është vetëm Zvërneci, Narta, Pish-Poro, Manastiri dhe shumë mrekulli të tjera natyrore që po betonizohen, zhduken apo shëmtohen nga dora e njeriut.
SHKUMBINI, lumi i 4-rt më i gjatë në Shqipëri pas Drinit, Vjosës dhe Semanit po shkatërrohet në mënyrën më agresive, me gërryerjen e shtratit të lumit nga firmat e ndërtimit të Korridorit VIII. Jo vetëm kaq, por gjithë materialet e tuneleve i hedhin pa e çarë kokën në lumë. Kanë ndryshuar pothuajse plotësisht rrjedhën e lumit, duke prishur luginën e bukur me lule të verdha në hyrje të Librazhdit, duke prishur qindra katarakte dhe plazhe të vogla që fillojnë nga Mokra ku rrjedh ky lumë e deri në grykëderdhjen e Vilë-Bashtovës në detin Adriatik.
Për përfitimet e tyre kolosale me numra 10-12 shifrorë, firmat e ndërtimit e kanë kthyer këtë aks në një çernobil të vërtetë dhe katastrofë mjedisore sidomos për ne që e bëjmë shpesh atë rrugë.
Shkumbini nuk ka vetëm bukuri natyrore, por edhe historike, edhe kulturore sepse e ndan vendin në dy zona gjuhësore, gegë dhe toskë.
Lumi krijon shtratin e vet të cilin për babëzinë e tyre këta po e shkatërrojnë plotësisht por koha vjen dhe lumi do t'i marrë përpara ashtu siç ndodhi edhe para pak muajsh ku për shkak se gërryen lumin nga Qukësi në Dragostunjë, rruga e vjetër dhe e re u shemb e gjithë juglindja nga Korça në Tiranë u bllokua.
Duhet të ngrihet gjithë komuniteti i zonave ku kalon lumi, për këtë padrejtësi, shkatërrim masiv, katastrofë mjedisore apokaliptike🥹 që po i bëhet Shkumbinit.
Nëse nuk ngremë zërin, këta janë gati që arat, shtëpitë, e pronat e fshatarëve t'i prishin, t'i tjetërsojnë e kinse në emër të zhvillimit të vazhdojnë me shkatërrimin total të Shkumbinit, aq sa ne dhe të tjerët kur të kalojmë në atë zonë të themi: Na ishte dikur Shkumbini 🙄'', - përfundon Miranda në reflektimin e saj.
