17/06/2026
ÇFARË NDODHI NË PARLAMENTIN EUROPIAN DHE PSE KA RËNDËSI PËR SHQIPËRINË?
Në ditët e fundit, protesta për Vjosë–Nartë, Zvërnec dhe zonat e mbrojtura nuk mbeti më vetëm në sheshet e Shqipërisë.
Ajo mbërriti edhe në Parlamentin Europian.
Parlamenti Europian votoi rezolutën për raportin e Komisionit Europian mbi Shqipërinë. Ky është një dokument i rëndësishëm politik, sepse lidhet me mënyrën se si vendi ynë po ecën drejt anëtarësimit në Bashkimin Europian.
Në këtë rezolutë, Parlamenti Europian shprehu shqetësim serioz për zhvillimet në zonën e mbrojtur Vjosë–Nartë dhe kërkoi që Shqipëria të ndalojë procedurat e reja të lejeve, punimet ndërtimore dhe ndërhyrjet zhvillimore në zonat e mbrojtura, derisa ligji shqiptar për zonat e mbrojtura të jetë në përputhje të plotë me standardet europiane të mbrojtjes së natyrës.
Kjo nuk është një gjë e vogël.
Do të thotë se ajo që qytetarët po thonë prej ditësh në shesh - se zhvillimi nuk mund të ecë përpara duke dobësuar mbrojtjen e natyrës, duke shmangur transparencën dhe duke përjashtuar komunitetet, tashmë është dëgjuar edhe në nivel europian.
Është e rëndësishme të sqarohet diçka.
Një amendament tjetër, më i ashpër në gjuhë dhe me emra konkretë politikë, nuk kaloi. Kryeministri zgjodhi të festojë pikërisht atë pjesë.
Por kjo nuk e ndryshon faktin kryesor: Parlamenti Europian nuk tha “vazhdoni”. Parlamenti Europian kërkoi kujdes, ndalim të ndërhyrjeve të reja në zonat e mbrojtura dhe përputhje me standardet europiane.
Pra, çështja nuk u mbyll.
Përkundrazi, u ngrit në një nivel tjetër.
Kjo është arsyeja pse protesta ka rëndësi.
Sepse qytetarët që dolën në shesh nuk kërkuan luks politik. Kërkuan gjëra bazike për çdo demokraci europiane:
transparencë,
dokumente,
Vlerësim të Ndikimit në Mjedis,
konsultim real publik,
mbrojtje të zonave natyrore,
dhe rregulla që vlejnë njësoj për të gjithë.
Këto nuk janë kërkesa ekstreme.
Këto janë standarde europiane.
Për javë me radhë, qytetarët janë quajtur budallenj, të manipuluar, të huaj, ekstremistë, fashistë, agjentë, pjesë e “luftës hibride”.
Por sot është më e qartë se kurrë: qytetarët e këtij vendi nuk janë armiq të Shqipërisë.
Ata po mbronin një Shqipëri europiane.
Një Shqipëri ku zhvillimi nuk bëhet në errësirë.
Një Shqipëri ku zonat e mbrojtura nuk trajtohen si tokë bosh për projekte private.
Një Shqipëri ku dokumentet publikohen para gardheve.
Një Shqipëri ku natyra, ligji dhe qytetari nuk janë pengesa për zhvillimin, por themeli i tij.
Ky moment është historik jo sepse një institucion europian na “shpëtoi”.
Është historik sepse zëri i qytetarëve shqiptarë u dëgjua.
Dhe kur qytetarët dëgjohen, demokracia merr frymë.
🦩
