01/06/2026
REAGIM PUBLIK
Zvërneci nuk është për sh*tje. Zvërneci nuk është pronë private. Zvërneci është pasuri kombëtare.
Me shqetësim të thellë po ndjekim zhvillimet e fundit në këtë zonë, si dhe përplasjet që kanë lindur mes qytetarëve që kërkojnë të mbrojnë një nga thesaret më të çmuara natyrore të vendit dhe interesave që synojnë të ndryshojnë përgjithmonë karakterin e saj.
Si organizatë e shoqërisë civile, ne besojmë se askush nuk duhet të pengohet, të frikësohet apo të përballet me forcë për shkak se mbron një pasuri që i përket të gjithë shqiptarëve. E drejta për të protestuar, për të ngritur pyetje dhe për të kërkuar transparencë nuk është privilegj. Është një e drejtë themelore demokratike.
Nuk mund të flasim për zhvillim kur qytetarët ndihen të përjashtuar nga vendimmarrja. Nuk mund të flasim për interes publik kur mungon dialogu. Nuk mund të flasim për demokraci kur zëri qytetar shihet si problem dhe jo si vlerë.
Zvërneci është një nga ato vende që nuk mund të zëvendësohen. Nëse humbet karakteri i tij natyror dhe historik, ai nuk rikthehet më. Prandaj mbrojtja e tij nuk është vetëm detyrë e banorëve të zonës apo e ambientalistëve. Është përgjegjësi e çdo shqiptari që beson se trashëgimia kombëtare duhet ruajtur.
Shoqata “Sebastia” shpreh solidaritetin e saj me çdo qytetar që në mënyrë paqësore kërkon transparencë, llogaridhënie dhe mbrojtjen e interesit publik. U bëjmë thirrje institucioneve që të dëgjojnë qytetarët, të garantojnë të drejtat kushtetuese dhe të sigurojnë që çdo vendim për Zvërnecin të merret me transparencë të plotë dhe në respekt të ligjit.
Historia do të na gjykojë jo për atë që ndërtuam, por për atë që lejuam të shkatërrohej.
Sot nuk po mbrohet vetëm Zvërneci.
Sot po mbrohet e drejta e qytetarëve për t’u dëgjuar.
Sot po mbrohet interesi publik.
Sot po mbrohet një pjesë e Shqipërisë.
🇦🇱🌿 Pasuritë kombëtare mbrohen. Nuk negociohen.
