ATA

07/07/2026

Bashkia çimenton Flamingot

Ditën e sotme, konstatuam se punonjës të bashkisë Kamëz kishin fshirë në një mënyrë tepër të dukshme muralen urbane. Fjalët ende duken, duke qenë se fshirja e tyre ndjek gjurmët e shkronjave, ndërsa flamingot jo më. E pritshme që për Bashkinë Kamëz, ashtu si edhe për Bashkinë Tiranë, flamingot të jenë gjallesa të shfaqura në Shqipëri me ardhjen në pushtet të Kryeministrit Rama dhe rrjedhimisht duhet të shfaqen vetëm në profilin e tij në rrjete sociale. Për këta pushtetarë vendorë edhe flamingot burojnë nga Rama teksa çdo gjë që buron nga qytetarët konsiderohet ose si kërcënim ose duhet kërcënuar. Mirëpo, ironia qëndronte te fakti që fjalët dhe gjallesat e pikturuara ishin fshirë duke përdorur çimento, i njëjti element që ka shkatërruar hapësirat publike në Tiranë, i njëjti që ka shkatërruar shtëpitë në Paskuqan, 5-Maji, Astir e shumë qytete të tjera, i njëjti që rrezikon të shkatërrojë Zvërnecin, e njëjta mendje e ashpër çimentimi që po shkatërron Shqipërinë. Bashkia, teksa çimenton shenjën, nuk kupton që përforcon gjurmën e revolucionit flamingo, i cili ka shënjuar e lënë gjurmë përgjithmonë në jetën politike të shoqërisë sonë. Ndaj çdo ditë në protestë!

07/07/2026

Ditën e djeshme, përgjatë shëtitores së liqenit të Paskuqanit, bashkë me një grup aktivistësh, artistësh dhe qytetarësh shkruam në përmasa të mëdha “Tokë, Ujë, Liri” përreth një tufe flamingosh. Ndërkohë që protesta e përditshme për rrëzimin e qeverisë dhe mbrojten e pasurive të përbashkëta vazhdon në Tiranë, bashkë me aktivistë e artistë menduam zgjerimin e aksioneve simbolike edhe në qytetin e Kamzës. Kjo si një mënyrë për ta reflektuar sa më fort frymën e kësaj lëvizje popullore edhe në këtë qytet.

Fjalët “Tokë, Ujë, Liri” qëndrojnë njëlloj si për qytetin e Kamzës, ku ende banorët e saj trajtohen në ligjërimin publik si njerëz të pa denjë për Tokën, ashtu edhe për banorët e Rrjollit, Zvërnecit, Zall-Gjoçajt, e shumë komuniteteve të tjera të vërsulura nga kapitali grabitqar vendas dhe i huaj. Si në Kamëz, ashtu si kudo në Shqipëri, ku njerëzit kanë një marrëdhënie të domosdoshme jetese me tokën, kjo tokë dhe uji kërcënohen vazhdimisht t’u merren me dhunë dhe t’u jepen kompanive private me të gjithë mbështetjen shtetërore.

Tashmë që një praktikë e tillë privimi e qytetarëve nga toka, uji dhe burimet natyrore është kthyer në një strategji kombëtare e mbështetur nga ligji për investimet strategjike, ripërcaktimi i zonave të mbrojtura dhe ligji për zonat e mbrojtura, ndër të tjerë, qytetarët po ndihen gjithnjë e më shumë të shtyrë përtej gardheve, të dhunuar dhe të shtyrë drejt një jete zori e jo jete të lirë. Thirrja për të pasur qasje në tokë dhe ujë, dhe që kjo qasje të njihet e garantohet me ligj është ndoshta kërkesa më e rëndësishme e kësaj lëvizje qytetare që ka mbërthyer të gjithë shoqërinë shqiptare.

Kamza në protestë.

Mirënjohje zemre për artistët dhe aktivistët që na u bashkuan, për Citizens për raportimin dhe Valentina Bonizzi për dokumentimin.

07/07/2026

07/07/2026

14/04/2026

Teksa fotografi Thomas Krempke po përgatit çeljen e ekspozitës
'Ëndërr' në Prishtinë, më 23 prill, te hapësira Hani 2 Robertëve, ju rikujtojmë që sot dhe nesër janë dy ditët e fundit të ekspozitës së tij në Kamëz.

Oraret: 17.00-20.00 ose me takim duke na shkruar në rrjetet tona sociale apo në numrin e telefonit +355 68 677 4680

07/04/2026

Ju rikujtojmë që ekspozita fotografike ‘ËNDËRR’ e fotografit Thomas Krempke do të qëndrojë e hapur deri më datë 16 prill, pranë hapësirës sonë në Kamëz.

*Oraret e vizitave: Nga e hëna në të premte, ora 17.00 - 20.00

Gazeta me dizajn nga Trivet Paja jepet si dhuratë pjesë e ekspozitës, bashkë me kartolinat

Ju mirëpresim!