Ato janë me formim në drejtësi dhe prej disa vitesh kanë ofruar ndihmë ligjore falas në mënyrë informale në qytetin e Kamzës për banorët e tij dhe komunitete të tjera. Përmes aktivizmit ligjor të qendrës “Kujri” duam që t’i japim jetë drejtësisë në ligj diku duke kërkuar zbatimin dhe diku duke kërkuar ndryshimin e tij. Termin “Kujri” e kemi huazuar nga Kanuni i Lekë Dukagjinit. “Kujria” nënkuptont
e një hapësirë të përbashkët të katundit, në të cilën “pêma e landa e vûme në kujri, âsht e atij, qi e kà vû, porse kokrrat i han kush të mundet pà muejtë me i ndalë aj qi e kà vû”. Për ne në këtë koncept futen si të barabartë gratë, punëtorët, të papunët, fëmijët, komunitetet e të gjithë ata që kanë nevojë për të drejtën. Drejtësia për aq sa ekziston, duhet t’u përkasë të gjithëve. Qendra do të fokusohet kryesisht në të drejtat dhe liritë themelore të njeriut, me fokus primar ato sociale, kulturore dhe ekonomike. Rëndësi do të kenë çështjet mjedisore dhe ato të lidhura me proceset vendimmarrëse të qeverisjes lokale, të transparencës dhe konsultimeve publike. Kamza, si realitet i ri urban, me zhvillim të vrullshëm demografik, i renditur në 5 qytetet më të mëdha, dhe me shumë pak avokatë që funksionojnë me seli në qytet ka shumë nevojë për qendra ligjore të cilat lehtësojnë dhe i ndërmjetësojnë qytetarët me institucionet, ligjin dhe drejtësinë. Kushti i saj informal, gjendja e saj e përhershme mes “të jashtëligjshmes” dhe procesit të pafund “të legalizimit”, nevojës së madhe të qytetarëve për të pasur akses të barabartë në ligj përballë institucioneve shtetërore na vënë përpara domosdoshmërisë për të formalizuar shërbimet ligjore që janë ofruar deri tani nga Qendra e Paraligjoreve dhe për ta çuar në një nivel tjetër aktivizmin tonë ligjor. Kujrija do të ushtrojë aktivitetin e saj në qendrën e Grupit Ata.
