09/07/2026
FTESË
Të dashur bashkëfshatarë, miq dhe bij e bija të Holtasit, kudo që jetoni!
Me gëzim dhe respekt të veçantë, ju ftojmë të bëheni pjesë e festës tradicionale “Dita e Gogës”, e cila do të zhvillohet më 20 gusht, në fshatin Holtas, Njësia Administrative Poroçan, Bashkia Gramsh.
Kjo festë lind nga dëshira e sinqertë e Kryesisë së fshatit dhe e gjithë komunitetit për ta kthyer “Ditën e Gogës” në një traditë të bukur të përvitshme, në një ditë që bashkon zemrat, afron brezat dhe forcon lidhjet tona me vendlindjen.
Le të jetë kjo një ditë rikthimi në rrënjë, një ditë përqafimesh, kujtimesh dhe emocionesh, ku fëmijët, të rinjtë, prindërit e gjyshërit të mblidhen rreth së njëjtës vatër, duke nderuar historinë, traditat dhe vlerat që na kanë formuar si komunitet.
Në këtë ditë të shënuar, secili është i lirë ta festojë sipas dëshirës së zemrës së tij: me familjen, me miqtë, me lagjen apo me fisin. Mjafton të jemi bashkë, sepse prania e secilit është vlera më e madhe e kësaj feste.
Një thirrje të veçantë ua drejtojmë të rinjve të Holtasit. Ju jeni e ardhmja e këtij komuniteti. Ejani të njihni më mirë vendlindjen e prindërve dhe gjyshërve tuaj, të ruani traditat dhe t’i përcillni ato brezave që do të vijnë. Vetëm kështu trashëgimia jonë do të jetojë përherë.
Sot në Holtas kemi mbetur më pak për të festuar, por me ardhjen tuaj do të bëhemi shumë. Rrugët do të mbushen me jetë, oborret me zëra, ndërsa zemrat me gëzim. Çdo hap që do të hidhni drejt vendlindjes do të jetë një shenjë dashurie dhe respekti për tokën që na rriti.
Ne besojmë fort se, me njerëzit fisnikë që ka nxjerrë Holtasi ndër vite dhe me bekimin e Zotit, do të organizojmë një festë të bukur, dinjitoze dhe të paharrueshme, që do të mbetet gjatë në kujtesën e secilit prej nesh.
Holtasi ju pret me dyert dhe zemrën hapur. Ejani të festojmë së bashku, të kujtojmë të shkuarën, të jetojmë të tashmen dhe të ndërtojmë traditën e së ardhmes.
Për çdo informacion, mund të kontaktoni në:
📞 +355 68 528 4845
Mirë se vini në Holtas! Mirë se vini në “Ditën e Gogës”!
Me respekt,
Kryesia e Fshatit Holtas
Kryetari
Shkëlqim Çekrezi
