27/05/2026
Të nderuar besimtarë !
Në këtë festë të madhe të Kurban Bajramit, ju përcjellim urimet më të sinqerta për paqe, shëndet, begati dhe harmoni në çdo familje. Kjo ditë e shenjtë na rikujton vlerën e sakrificës, besimit të palëkundur dhe dashurisë për njëri-tjetrin.
Kurban Bajrami është një thirrje për mëshirë, falje dhe solidaritet, për të qenë më pranë familjes, fqinjit dhe çdo zemre që ka nevojë për ngrohtësi e mbështetje. Le të mbushen sofrat tona me bereqet dhe zemrat tona me mirësi e dritë shpirtërore.
Allahu i Madhëruar thotë në Kuranin Famëlartë:
“O ju që besuat! Përkuluni dhe bëni sexhde, adhurojeni Zotin tuaj dhe bëni vepra të mira, që të shpëtoni.”
(Sure El-Haxh, 22:77)
Dhe po ashtu:
“Te Allahu nuk arrin as mishi e as gjaku i tyre, por tek Ai arrin devotshmëria juaj.”
(Sure El-Haxh, 22:37)
Le të jetë kjo festë një mundësi për të forcuar besimin, për të falur njëri-tjetrin dhe për të shtuar dashurinë e respektin mes nesh. Urojmë që çdo lutje, sakrificë dhe vepër e mirë të pranohet nga Allahu i Plotfuqishëm.
Allahu sjelltë paqe në zemrat tona dhe mirësi në jetën e secilit prej nesh.
Gëzuar dhe për shumë mot Kurban Bajramin!
