08/08/2026
DEKLARATË PUBLIKE
Qëndrimi i “New Bridges” (Ura të Reja) dhe “The Youth of Ura” (Të Rinjtë e Urës) për ruajtjen e Bashkisë Dimal.
New Bridges dhe The Youth of Ura shprehin qëndrimin e tyre të qartë kundër propozimit për shkrirjen e Bashkisë Dimal.
New Bridges dhe The Youth of Ura janë organizata të shoqërisë civile që kanë dalë nga komuniteti lokal për të adresuar nevojat lokale. Puna jonë është fokusuar në fuqizimin dhe pjesëmarrjen e të rinjve, angazhimin qytetar, vendimmarrjen lokale, mbrojtjen e mjedisit dhe zhvillimin e komunitetit.
Prej vitesh jemi të angazhuar në komunitetin e Dimalit, duke ndërtuar një marrëdhënie të drejtpërdrejtë me të rinjtë, komunitetin, Bashkinë Dimal dhe institucionet vendore.
Përvoja jonë na ka ndihmuar të krijojmë një kuptim të thellë të bashkisë, nevojave dhe potencialit të saj. Kjo përvojë gjithashtu na ka treguar rëndësinë që ka një pushtet vendor funksional, i afërt me qytetarët dhe që njeh nga afër nevojat e komunitetit
Bazuar në kuptimin e thellë të Bashkisë Dimal, anëve të saj të forta dhe nevojave, si dhe mundësive të saj për të siguruar zhvillimin social-ekonomik të territorit, ne vlerësojmë se Baskia Dimal plotëson të gjithë kriteret demografike, ekonomike, funksionale, territoriale dhe historike për të vazhduar të funksionojë si njësi më vete e vetëqeverisjes vendore.
Edhe të dhënat e paraqitura në Raportin Përfundimtar të ekspertëve të Komisionit për Reformën Territoriale tregojnë se Bashkia Dimal është një njësi që MUND të funksionojë më vete. Treguesit e funksionalitetit, performancës ekonomike dhe kapacitetit investues dëshmojnë potencialin e saj për të vijuar zhvillimin si bashki më vete. Në indeksin e Performanscës Ekonomike, bashkia Dimal renditet e 26-ta ndër 61 bashki, duke u pozicionuar edhe përpara bashkisë Berat, e cila renditet e 28-ta.
Po aq i rëndësishëm është argumenti demografik. Dimali nuk është një territor me popullsi në tkurrje. Përkundrazi, të dhënat tregojnë një dinamikë pozitive demografike. Në këto kushte, ne vlerësojmë se largimi i vendimmarrjes dhe i funksioneve administrative nga territori mund të prodhojë efektin e kundërt: të dobësojë lidhjen e qytetarëve me institucionet vendore dhe, në perspektivë, të ndikojë negativisht në zhvillimin dhe qëndrueshmërinë e komunitetit.
Dimali ka gjithashtu një profil të qartë ekonomik dhe zhvillimor. Bujqësia dhe prodhimi bujqësor përbëjnë një pjesë të rëndësishme të ekonomisë së zonës, krahas bizneseve dhe sipërmarrjeve lokale. Menaxhimi dhe zhvillimi i këtyre burimeve kërkon institucione vendore që njohin territorin, nevojat dhe potencialin e tij dhe që janë pranë komunitetit.
Në të njëjtën kohë, Dimali ka krijuar dhe konsoliduar identitetin e tij territorial. Emri i tij lidhet me qytetin antik të Dimalit dhe me një trashëgimi historike e kulturore që përbën një vlerë jo vetëm për komunitetin, por për të gjithë zonën. Identiteti lokal, historia dhe lidhja e komunitetit me territorin duhet të jenë pjesë e vlerësimit të çdo ndryshimi të kufijve administrativë.
Për ne, një element thelbësor mbetet përfaqësimi demokratik dhe ruajtja e vendimmarrjes sa më pranë qytetarëve. Ky është edhe një nga parimet themelore të Kartës Evropiane të Vetëqeverisjes Vendore. Një bashki me kryetarin dhe këshillin e saj të zgjedhur u jep qytetarëve mundësi më të drejtpërdrejta për përfaqësim, pjesëmarrje, kërkesë llogarie dhe ndikim mbi vendimet që prekin komunitetin e tyre. Ky është një parim që duhet forcuar dhe jo dobësuar.
Shqetësimi ynë nuk lidhet vetëm me rezultatin e propozuar, por edhe me mënyrën se si po zhvillohet ky proces. Një reformë që ndryshon kufijtë administrativë dhe prek drejtpërdrejt identitetin e komuniteteve, përfaqësimin politik, vendimmarrjen lokale dhe mënyrën e ofrimit të shërbimeve nuk mund të realizohet pa një konsultim të gjerë, transparent dhe kuptimplotë me qytetarët, organizatat e shoqërisë civile, biznesin, akademinë dhe institucionet vendore. Konsultimi nuk duhet të jetë vetëm një hap procedural i reformës, por një proces ku qëndrimet, argumentet dhe shqetësimet e komuniteteve të prekura reflektohen realisht në vendimmarrjen përfundimtare.
Ne mbështesim reforma që forcojnë qeverisjen vendore, përmirësojnë shërbimet dhe krijojnë më shumë mundësi zhvillimi për komunitetet. Por në rastin e Dimalit, vlerësojmë se zgjidhja nuk është shkrirja e bashkisë. Zgjidhja është fuqizimi i saj, investimi në kapacitetet vendore dhe shfrytëzimi i potencialit ekonomik, bujqësor, njerëzor dhe historik të territorit.
Për këto arsye, New Bridges dhe The Youth of Ura kundërshtojnë shkrirjen e Bashkisë Dimal dhe kërkojnë që ajo të vijojë të funksionojë si njësi më vete e vetëqeverisjes vendore.
Dimali ka identitetin, komunitetin, ekonominë dhe potencialin për të vazhduar përpara si bashki më vete. Ajo që duhet të forcojmë është zhvillimi dhe vetëqeverisja lokale, jo t'i largojmë ato nga qytetarët.
