04/08/2025
د اطلاعاتو او کلتور رياست او دوران ښوونيزې اکاډمۍ ترمنځ د علمي همکاريو هوکړه ليک لاسليک شو.
د پکتيکا اطلاعاتو او کلتور رياست اړوند، ځوانانو چارو آمريت او دوران ښوونيزې اکاډمۍ ترمنځ بې وزلو ځوانانو ته د زده کړو زمينې برابرولو په موخه د علمي همکاريو هوکړه ليک لاسليک شو.
د ځوانانو چارو آمر محمد ذاکر ناياب وويل؛ د ياد هوکړه ليک له مخې به دوران ښوونيزې اکاډمۍ ته په څلورو (انګلېسي ژبې، کمپيوټر زده کړو، ويناوالي فن او ماشوم روزنې) څانګو کې (۴۰) تنه بې وزله ماشومان او ځوانان په پنځوس سلنې تخفيف ور معرفي کوي او د زده کړو زمينه به ورته برابروي.
نوموړي له ياد ښوونیز مرکز څخه د مننې تر څنګ وويل؛ په ټول توان سره به د خپلې ټولنې لپاره په ښوونيزو او علمي برخو کې کار کوي او خپلې هڅې به دوامدارې ساتي.
د دوران ښوونيزې اکاډمۍ مسؤل مدیر اکبرخان ريحان له اطلاعاتو او کلتور رياست مننه وکړه، چې د بې وزلو ماشومانو او ځوانانو په برخه کې يې خپلې هڅې روانې ساتلې دي.
نوموړي زياته کړه؛ له ټولو را معرفي شويو ماشومانو او ځوانانو سره به په زده کړو کې پوره همکار وي.
د يادونې ده، چې ياد هوکړه ليک د دوه اړخيزو همکاريو پر بنسټ لاسليک شوی دی.
پکتيکا اطلاعاتو او کلتور رياست
۱۴ زمری ۱۴۰۴
