12/08/2026
د افغانستان د سوداګرۍ او پانګونې خونې د اجرائیه کمېټې یوولسمه فوقالعاده ناسته ترسره شوه.
چهارشنبه، د زمري ۲۱مه، ۱۴۰۵
د افغانستان د سوداګرۍ او پانګونې خونې د اجرائیه کمېټې یوولسمه فوقالعاده ناسته د خونې کورني مدیریت پر پیاوړتیا، د مشرتابه بنسټونو ترمنځ د همغږۍ او انسجام پر زياتوالی، د خصوصي سکټور د خدمتونو ښه والي او پراختیا پر سر د بحث سربېره د زمري ۲۴مې نېټې د افغانستان اسلامي امارت د بریا ورځې په مراسمو کې د خونې د ونډې اخېستنې لپاره د اړین چمتووالي د ارزونې په موخه، د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي په مشرۍ د عمومي ریاست په دفتر کې ترسره شوه.
په دې ناسته کې د پالیسۍ او له دولت سره د اړیکو مرستیال ښاغلي الحاج میراجان سلیمانخېل، سوداګریز مرستیال ښاغلي الحاج ګلبهار حبیبي، د ولایتي چارو مرستیال ښاغلي الحاج فیضاحمد خوافي، د تولیداتو او کورنیو محصولاتو د ملاتړ مرستیال ښاغلي الحاج عبدالنافع بارکزي، د خدماتو مرستیال ښاغلي الحاج عنایتالله صدیقزي، د سټراټيژیکو اړیکو د چارو مرستیال ښاغلي مجیبالرحمن شېرزاد او د خونې د مدیره پلاوي د دارالانشاء رئیس ښاغلي الحاج ذبیحالله عمرخېل ګډون کړی و.
د ناستې په پیل کې د خونې عمومي رئیس ښاغلي الحاج سید کریم هاشمي د خونې د کورني، مدیریتي او اجرائیوي چارو اړوند پر اتو اساسي محورونو خبرې وکړې. د کاري ظرفیت لوړول، د کورنیو چارو اصلاح او ښهوالی، د مدیره پلاوي د مسؤلیتونو او دندو بیا کتنه او وېش، د مشرتابه شورا، اجرائیه کمېټې، مدیره پلاوي او عامل پلاوي ترمنځ د همغږۍ پیاوړتیا، د کاري او اجرائیوي پرېکړو ارزونه، د زمري ۲۴مې د افغانستان اسلامي امارت د بریا ورځې په مراسمو کې د خونې اغېزناکه ونډه، خصوصي سکټور ته د اداري او تخنیکي خدمتونو ښهوالی او د هر ډول چلند یا اقدام پر وړاندې، چې د دغې ادارې له اصولو او مشروع ګټو سره په ټکر کې وي، د خونې د اداري موقف، اعتبار او حیثیت ساتل په دې ناسته کې د بحث له مهمو موضوعاتو څخه وو.
د خونې عمومي رئیس په خپلو خبرو کې وویل: «زموږ مسؤلیت یوازې د ورځنیو چارو پر مخ بیولو پورې محدود نه دی؛ بلکې زموږ دنده ده، چې د سالم مدیریت، پر وخت پرېکړو، اغېزناکې همغږۍ او منظمې پلانجوړونې له لارې د افغانستان خصوصي سکټور د سوداګرۍ، پانګونې، تولید، کارموندنې او سالمو او دوامدارو فعالیتونو د ودې زمینه برابره کړو.»
ښاغلي هاشمي د زمري د ۲۴مې مراسمو په اړه، چې د اسلامي امارت د بریا ورځ ده، د خونې او خصوصي سکټور هر اړخیز چمتووالي ته په اشارې وویل، چې د خونې عمومي رئیس او مرستیالانو له لوري د دوی له شخصي مالي شتمنیو څخه ۴۵۰ زره افغانۍ د یادو مراسمو د چمتووالي او ترسره کولو اړوند د یوې برخې لګښتونو او اړتیاوو د تأمین لپاره ځانګړې شوي دي.
نوموړي همدارنګه د مراسمو اړوند پروګرامونو پر تنظیم، له اړوندو مسؤلینو سره پر لازمې همغږۍ، د مېلمنو پر بلنې، د خصوصي سکټور د استازو پر فعال حضور او ګډون، د پروګرام پر منظم او ترتیب، د رسنیز پوښښ پر برابرولو، د پیغامونو پر چمتوو کولو او د نورو اړینو ترتیباتو پر بشپړولو ټینګار وکړ.
ورپسې د خونې د مدیره پلاوي د دارالانشاء رئیس ښاغلي الحاج ذبیحالله عمرخېل د اجرائیه کمېټې د یوولسمې فوقالعاده ناستې اجنډا غړو ته وړاندې کړه.
وروسته د خونې د ولایتي چارو مرستیال ښاغلي الحاج فیضاحمد خوافي د ولایتي خونو د عوایدو او لګښتونو راپور د ناستې غړو ته وړاندې کړ. همدارنګه د خونې مالي او اداري مرستیال او د عامل پلاوي د ریاست سرپرست ښاغلي زینالله حسني د عامل پلاوي د فعالیتونو او ترسره شوو اجرااتو راپور وړاندې کړ.
د ناستې په وروستۍ برخه کې د اجرائیه کمېټې غړو د خونې د فعالیتونو د پرمخبیولو په برخه کې د مدیره پلاوي د فعالې ونډې، د زمري په ۲۴مه د افغانستان اسلامي امارت د بریا ورځې د مراسمو ترسره کولو څرنګوالي، د تشکیلاتي جوړښت او د کارکوونکو شمېر، د ولایتي دفترونو د عوایدو او لګښتونو، د عامل پلاوي د وړاندیزونو او نورو مهمو اداري او اجرائیوي موضوعاتو په اړه هر اړخیز بحث او نظرونه شریک کړل.
د مطرح شوو موضوعاتو له هر اړخیزې ارزونې وروسته، د خونې اړوند کورنۍ همغږۍ د پیاوړتیا، د خدمتونو کیفیت او اغېزناکتیا د لوړولو، د اداري پروسو د ښهوالي او د افغانستان د سوداګرۍ او پانګونې خونې د پروګرامونو او فعالیتونو د لا ښه پرمخ بیولو په موخه لازمې پرېکړې وشوې.
