12/01/2026
വിവാഹാഘോഷം വിളയൂർ ബഡ്സ് സ്കൂളിലെ കുട്ടികൾക്കൊപ്പം ആഘോഷിച്ച് നവദമ്പതികൾ...
വിളയൂർ: നിക്കാഹും അതിനോടനുബന്ധിച്ചുള്ള മറ്റു ചടങ്ങുകളും കഴിഞ്ഞ് നവദമ്പതികൾ ആദ്യമെത്തിയത് വിളയൂർ ബഡ്സ് സ്കൂളിൽ.
ഇൻകാസ് ദുബൈ പാലക്കാട് ജില്ലാ കമ്മിറ്റി ട്രഷററും, യുഎഇ വിളയൂർ പഞ്ചായത്ത് പ്രവാസി കൂട്ടായ്മ നിലാവിൻ്റെ പ്രസിഡണ്ടും ആയ നിസാർ പാലൊളിക്കുളമ്പിൻ്റെ മകൻ അജിനാസും, അജിനാസിൻ്റെ ഭാര്യയായ ഷിബിലയുമാണ് വിളയൂർ ബഡ്സ് സ്കൂളിലെ കുട്ടികളോടൊപ്പം അവരിൽ ഒരാളായി തങ്ങളുടെ വിവാഹാഘോഷം ആഘോഷിച്ചത്. വിവാഹ തിരക്കുകളെല്ലാം കഴിഞ്ഞ് വധൂവരന്മാരുടെ ആദ്യ തീരുമാനം വിളയൂർ പേരടിയൂരിൽ പ്രവർത്തിക്കുന്ന ബഡ്സ് സ്കൂളിൽ കഴിയുന്ന കുട്ടികളെ കാണുകയെന്നതായിരുന്നു. ഭിന്നശേഷിക്കാരായ കുട്ടികൾക്ക് തങ്ങളുടെ വിവാഹദിനത്തിൻ്റ അന്നുള്ള പാർട്ടിയിൽ പങ്കെടുക്കാൻ കഴിഞ്ഞിരുന്നില്ല. അത് മനസ്സിലാക്കിക്കൊണ്ട് അവർക്ക് മാത്രമായൊരു ചടങ്ങ് സംഘടിപ്പിക്കുകയായിരുന്നു. സ്കൂളിൽ എത്തിയ വധൂവരന്മാരെ ടീച്ചർമാരും കുട്ടികളും ചേർന്ന് സ്വീകരിച്ചു.
അപ്രതീക്ഷിതമായി തങ്ങളെ കാണാൻ വന്ന മണവാളനെയും മണവാട്ടിയെയും കണ്ടതിൻ്റെ അമ്പരപ്പിലായിരുന്നു കുരുന്നുകള്‍. ഇതോടെ ടീച്ചർ കുട്ടികളെ കാര്യം ധരിപ്പിച്ചു. നിങ്ങളെ കാണാന്‍ എത്തിയതാണെന്നറിയിച്ചതോടെ ആവേശത്തിലായ കുരുന്നുകള്‍ മംഗളാശംസകള്‍ നേര്‍ന്നു. വിവാഹാഘോഷം കുട്ടികൾക്കൊപ്പം ആഘോഷിക്കാന്‍ കഴിഞ്ഞതില്‍ ഏറെ സന്തോഷമുണ്ടെന്ന് ഇരുവരും പ്രതികരിച്ചു.
ബഡ്സ് സ്കൂളിലെ കുരുന്നുകൾക്ക് ബിരിയാണിയും ഏര്‍പ്പാടാക്കിയിരുന്നു. ആതിഥേയര്‍ക്കൊപ്പം ഫോട്ടോയെടുത്തും ഭക്ഷണം കഴിച്ചും വിവാഹാഘോഷം എന്നും മധുരമുള്ള ഓര്‍മയാക്കിയാണ് ഇരുവരും വീട്ടിലേക്ക് യാത്ര തിരിച്ചത്.
ചടങ്ങിൽ വിളയൂർ ഗ്രാമ പഞ്ചായത്ത് പ്രസിഡണ്ട് നീലടി സുധാകരൻ, ജില്ലാ പഞ്ചായത്ത് മെമ്പർ ഇസ്മായിൽ വിളയൂർ, പഞ്ചായത്ത് ഭരണസമിതി അംഗങ്ങളായ ഹുസൈൻ കണ്ടേങ്കാവ്, മുഹമ്മദ് റാഫി എന്നിവരും കുഞ്ഞാപ്പ ഹാജി, സൽമാൻ വിളയൂർ, ഹബീബ് എന്നിവരും സന്നിഹിതരായിരുന്നു...
