05/10/2026
Սիրելի՛ մանկավարժներ,
սիրելի՛ «Ալենյան լույսի ջահակիրներ»։
Մանկավարժի աշխատանքի ամենագեղեցիկ պահերից մեկն այն է, երբ երեկ դեռ իր ուժերին չհավատացող երեխան այսօր ասում է՝ «Ես կարող եմ»։ Այդ երկու բառերի հետևում Ձեր համբերությունն է, Ձեր նվիրումը, երբեմն էլ՝ այն հավատը, որ Դուք ունեցել եք երեխայի հանդեպ, երբ նա դեռ չէր հավատում ինքն իրեն։
Այսօր որպես «Ալեն Մարգարյան» բարեգործական ՀԿ-ի հիմնադիր և որպես մեծ ընթերցասեր, կրթության առաջամարտիկ, երիտասարդ բայց ՄԵԾ մանկավարժ Ալեն Մարգարյանի մայր՝ սրտանց շնորհավորում եմ Ձեր մասնագիտական տոնը։
Ալենը մեծ սեր ուներ կրթության, գրքի և մարդու մտքի զարգացման հանդեպ։ Նա ասում էր․ «Կյանքի իմաստը վաղվա օրվա ավելի լավը լինելու հավատի մեջ է»։
Սիրելի՛ մանկավարժներ, հենց Դուք այդ ավելի լավ վաղվա օրը ստեղծում, հենց Ձեր ուսերին է դրված մեր հասարակության ամենածանր ու պատասխանատու բեռը։
Այսօր առանձնահատուկ ջերմությամբ ուզում եմ դիմել «Ալենյան լույսի ջահակիր» մանկավարժներին։
Շնորհակալ եմ, որ երեխաներին առաջնորդում եք դեպի գիրքը, օգնում նրանց սիրել ընթերցանությունը, շնորհակալ եմ, որ Ալենի անունը կապում եք ապրող գաղափարի հետ՝ կրթվել, ստեղծել և աշխարհին օգտակար լինել։
Ինձ՝ որպես Ալենի մայր, անչափ թանկ է տեսնել, թե ինչպես է նրա սերը գրքի ու գիտելիքի հանդեպ շարունակվում երեխաների մեջ՝ նաև Ձեր շնորհիվ։ Յուրաքանչյուր երեխա, որ հետաքրքրությամբ բացում է գիրքը, յուրաքանչյուր պատանի, որ համարձակվում է երազել ու սովորել, նոր իմաստ է տալիս մեր ճանապարհին։
«Ալենյան լույսի ջահակիր» անունը կրելով՝ Դուք այդ լույսը հասցնում եք նոր սրտերի։ Եվ որքան շատ երեխաներ սկսեն սիրել գիտելիքը, այնքան ավելի ամուր կլինի մեր երկրի ապագան։
Մաղթում եմ Ձեզ առողջություն, ուժ և Ձեր աշխատանքի արժանի գնահատանք։ Թող Ձեր կողքին լինեն մարդիկ, որոնք հոգատարությամբ կվերաբերվեն նաև Ձեզ։ Թող Ձեր աշակերտների առաջընթացը հաճախ հիշեցնի, թե որքան անհրաժեշտ ու արժեքավոր է Ձեր գործը։
Շնորհավոր Ձեր տոնը, սիրելի՛ մանկավարժներ։
Թող Ալենյան լույսը շարունակի ապրել Ձեր աշակերտների մտքերում, նրանց ընտրություններում և նրանց բարի գործերում։