Federata Skitare e Kosovës

03/10/2026

Federata Skitare e Kosovës në takimet Vjeshtore 2026 të FIS

Federata Skitare e Kosovës përmbylli pjesëmarrjen në "FIS Autumn Meetings 2026" në Gjenevë, një javë e rëndësishme takimesh, diskutimesh dhe bashkëpunimi brenda familjes ndërkombëtare të sporteve të borës.

Kosova u përfaqësua nga Presidenti Milaim Kelmendi, Sekretarja e Përgjithshme Luljeta Reçica, Nënkryetarja Besforta Topalli Grajçevci, Anëtarja e Bordit Genta Domi Hoxha dhe Koordinatori i Projekteve Selim Maloku.

Gjatë këtyre ditëve, delegacioni zhvilloi takime bilaterale me federata të tjera kombëtare, takime me drejtues dhe udhëheqës të projekteve të FIS, si dhe mori pjesë në FIS Summit dhe në takimet e nënkomiteteve.

Një pjesë e rëndësishme e vizitës ishin edhe takimet me Presidentin e FIS, Dr. Alexander Ospelt, dhe Sekretarin e Përgjithshëm Urs Lehmann, me fokus në forcimin e bashkëpunimit dhe krijimin e mundësive të reja për zhvillimin e sporteve të borës në Kosovë.

Federata gjithashtu mori pjesë në aktivitetet e SES, Small Evolving Ski Nations, ku paraqiti interesimin dhe aplikimin për anëtarësim, si një hap i rëndësishëm drejt bashkëpunimit më të afërt me federatat e vendeve në zhvillim.

Pjesëmarrja në Gjenevë vazhdon angazhimin e Federatës Skitare të Kosovës për të forcuar pozitën e Kosovës brenda FIS, për të krijuar partneritete të reja dhe për të sjellë më shumë mundësi për sportistët dhe sportet e borës në vend.

30/09/2026

Presidenti i Federatës Skitare të Kosovës, z. Milaim Kelmendi, zhvilloi një takim me Presidentin e ri të Federatës Ndërkombëtare të Skijimit dhe Snowboardit (FIS), z. Alexander Ospelt.
Në një takim miqësor dhe shumë pozitiv, u diskutua për të ardhmen e sporteve të borës në Kosovë dhe për thellimin e bashkëpunimit ndërmjet FSK-së dhe FIS.

-Të dy presidentët shprehën gatishmërinë për një bashkëpunim të afërt, me fokus në zhvillimin e sportistëve të rinj, rritjen e numrit të garuesve, ngritjen e nivelit të garave dhe krijimin e më shumë mundësive për gjeneratat e reja në Kosovë.

Për Federatën Skitare të Kosovës, mbështetja dhe bashkëpunimi me FIS është shumë i rëndësishëm për zhvillimin e mëtejshëm të sporteve të borës në vend dhe për një përfaqësim sa më të mirë të Kosovës në arenën ndërkombëtare.

Zhvillimi i sporteve të borës në vende të vogla dhe në rritje si Kosova ndihmon edhe në zgjerimin e familjes ndërkombëtare të FIS, duke sjellë më shumë sportistë, më shumë vende dhe më shumë mundësi në sportin botëror.

Së bashku për zhvillimin e sporteve të borës në Kosovë dhe për një të ardhme më të fortë në skenën ndërkombëtare.

12/09/2026

Një lajm i shkëlqyer për skitarinë e Kosovës nga Japonia!

Delegacioni i Federatës Skitare të Kosovës, i përfaqësuar nga Prof. Bujar Turjaka, Nënkryetar, dhe z. Muhamet Dresha, anëtar i Bordit Ekzekutiv, po merr pjesë në takimin e FIS Children’s Races Organizers Committee, FIS CROC.

Gjatë takimit u prezantua gara jonë ndërkombëtare për fëmijë, Dardania Cup, e cila u pranua zyrtarisht si anëtare kandidate e FIS CROC. Ky është një hap shumë i rëndësishëm drejt anëtarësimit të plotë dhe një vlerësim i punës së bërë ndër vite për zhvillimin e kësaj gare në Kosovë.

Një tjetër lajm i madh është përfshirja e Kosovës në propozimin për ta mirëpritur takimin e FIS CROC në vitin 2029, me Dardania Cup dhe Arxhenën si nikoqire.

Nga Kosova në Japoni, po ndërtojmë lidhje të reja dhe po hapim dyer për brezat e ardhshëm të skitarisë sonë 🇽🇰⛷️

12/06/2026

🇽🇰⛷️ Federata e Skijimit e Kosovës në Kongresin e 57-të të FIS në Beograd

Federata e Skijimit e Kosovës mori pjesë në Kongresin e 57-të Ndërkombëtar të Federatës Botërore të Skijimit dhe Snowboardit (FIS), i mbajtur nga 9–11 qershor 2026 në Beograd, Serbi. Kongresi i FIS përfaqëson organin më të lartë vendimmarrës të federatës ndërkombëtare, ku delegatë nga federatat kombëtare anëtare diskutojnë dhe votojnë për çështjet më të rëndësishme që ndikojnë në të ardhmen e sporteve dimërore në nivel global.

Delegacioni i Federatës së Skijimit të Kosovës përbëhej nga:

• Luljeta Reçica – Sekretare e Përgjithshme
• Muhamet Dresha – Anëtar i Bordit Ekzekutiv
• Selim Maloku – Delegat

Gjatë Asamblesë së Përgjithshme, delegatët morën pjesë në proceset e votimit për një sërë vendimesh me rëndësi strategjike për FIS, përfshirë zgjedhjen e Presidentit të FIS, ku President i ri u zgjodh z.Alexander Ospelt, dhe anëtarëve të Këshillit të FIS (FIS Council), si dhe çështje të tjera që lidhen me zhvillimin e sporteve të skijimit dhe snowboardit në nivel ndërkombëtar.

Në kuadër të Kongresit, delegacioni ynë mori pjesë edhe në FIS Gala Dinner, një mbrëmje tradicionale që bashkon përfaqësuesit e federatave kombëtare, drejtuesit e FIS dhe partnerët ndërkombëtarë të sporteve dimërore, duke krijuar mundësi për shkëmbim përvojash dhe forcim të bashkëpunimit ndërmjet federatave.

Pjesëmarrja në këtë ngjarje të rëndësishme konfirmon angazhimin e vazhdueshëm të Federatës së Skijimit të Kosovës për të përfaqësuar interesat e sportistëve tanë në arenën ndërkombëtare dhe për të kontribuar aktivisht në proceset vendimmarrëse të familjes së madhe të FIS.

🇽🇰🎿

05/05/2026

Në kuadër të Takimeve Pranverore të Komitetit Teknik të Federatës Ndërkombëtare të Skijimit (FIS), të mbajtura në Portorož, Slloveni, u zhvilluan diskutime të rëndësishme mbi drejtimet strategjike dhe zhvillimin e sporteve dimërore.

Gjatë këtyre takimeve, Presidenti i Federatës Skitare të Kosovës z.Milaim Kelmendi u takua me Presidentin e FIS, z.Johan Eliasch, ku u theksua rëndësia e bashkëpunimit ndërkombëtar, përfaqësimit aktiv dhe mbështetjes së vazhdueshme për zhvillimin e skijimit në Kosovë.

Ky angazhim konfirmon përkushtimin për avancimin e standardeve, fuqizimin e kapaciteteve dhe rritjen e prezencës së Kosovës në arenën ndërkombëtare të sporteve dimërore.

Federata Skitare e Kosoves , tani më nuk është vetëm pjesëmarrje, por është zë, është vizion, është rrugëtim drejt rritjes dhe njohjes globale.
———————————————
Within the framework of the FIS Technical Committee Spring Meetings held in Portorož, Slovenia, important discussions took place regarding strategic directions and the development of winter sports.

During these meetings, President of the Ski Federation of Kosovo Mr.Milaim Kelmendi met with the FIS President, Mr.Johan Eliasch, emphasizing the importance of international cooperation, active representation, and continued support for the development of skiing in Kosovo.

This engagement reaffirms the commitment to advancing standards, strengthening capacities, and increasing Kosovo’s presence in the international winter sports arena.

The Ski Federation of Kosovo is no longer just about participation; it is a voice, a vision, and a journey toward growth and global recognition.

31/03/2026

Skitaret e kategorive të reja të Kosovës në garën prestigjioze “Pinocchio Sugli Sci” në Abetone, Itali

Tre skitare të reja nga Kosova përfaqësuan vendin tonë në edicionin e 43-të të garës ndërkombëtare të skijimit alpin për fëmijë “Pinocchio Sugli Sci”, e cila u zhvillua në Abetone të Italisë, një nga garat më prestigjioze në botë për kategoritë e reja.

Në këtë aktivitet me konkurrencë shumë të fortë ndërkombëtare morën pjesë skitaret tona:

⛷ Amea Shala
⛷ Lea Ana Sokoli
⛷ Liza Xhambazi

Garat u zhvilluan në disiplinat GS dhe SL, ku skitaret tona treguan paraqitje shumë të mira dhe luftuan fort në pistë përballë një konkurrencë të nivelit shumë të lartë nga vende të ndryshme të botës.

Edhe pse këtë herë nuk arritën të përfundojnë të gjitha garat, pjesëmarrja në një event kaq prestigjioz përbën një eksperiencë shumë të vlefshme për zhvillimin dhe përgatitjen sportive të skitareve tona të reja.

Federata Skitare e Kosovës i përgëzon sportistet për përkushtimin dhe guximin e treguar në pistë dhe u dëshiron suksese në garat e ardhshme.

Ky përfaqësim është një hap i rëndësishëm në rrugën drejt zhvillimit dhe rritjes së nivelit të skijimit alpin në Kosovë.

25/03/2026

- Kampionati i Kosovës në Skijim Alpin - GS & SL - Kategoritë e Vjetra
Arxhena, Brod | 21 Mars 2026

Në pistat e homologuara nga FIS në Qendrën e Skijimit “Arxhena” në Brod, u zhvillua Kampionati i Kosovës në Skijim Alpin në disiplinat Giant Slalom (GS) dhe Slalom (SL) për kategoritë U18 - U30.

Garat u zhvilluan në kushte shumë të mira atmosferike dhe me organizim të suksesshëm, ku sportistët tanë treguan nivel të lartë gare dhe performanca të shkëlqyera.

🥇 Fituesit sipas kategorive:

U18 - Meshkuj
🏆 Ajdar Haruni

U21 - Femra
🏆 Lirika Deva

U21 - Meshkuj
🏆 Andi Pupovci

U30 - Femra
🏆 Kiana Kryeziu

U30 - Meshkuj
🏆 Klos Vokshi

Federata e Skijimit e Kosovës përgëzon të gjithë garuesit për paraqitjen dhe përkushtimin e tyre, si dhe falënderon trajnerët, klubet dhe ekipin organizativ për realizimin e suksesshëm të kësaj gare.

23/03/2026

19/03/2026

Dy fitore radhazi për Lirika Devën! 🇽🇰

Sportistja jonë Lirika Deva ka shkëlqyer në garat e fundit të FIS të mbajtura në Borovets, Bullgari, duke fituar dy medalje të arta në disiplinën e Slalomit (SL), një sukses i jashtëzakonshëm në dy ditë radhazi!

Me performancë të nivelit të lartë dhe dominim në pistë, Lirika arriti të ngjitet në vendin e parë në të dy garat, duke dëshmuar formë të shkëlqyer dhe progres të vazhdueshëm në skenën ndërkombëtare.

Ky është një rezultat shumë i rëndësishëm për sportisten tonë dhe për Federatën Skitare të Kosovës, duke na bërë krenarë dhe duke dëshmuar potencialin e madh që kemi në skijimin alpin.

Urime Lirika! 💙❄️