Shoqata e Otorinolaringologeve dhe Kirurgeve te kokes dhe qafes te Kosoves

08/09/2026

FJALA PËRSHËNDETËSE E DR. ARSIM ELEZAJT, DREJTOR I KLINIKËS SË ORL ME RASTIN E HAPJES SË KONGRESIT BALLKANIK

Në ceremoninë hapëse të Kongresit të 14-të Ballkanik të Otorinolaringologjisë, të pranishmit i përshëndeti edhe Drejtori i Klinikës së ORL-së në Prishtinë, Dr. Arsim Elezaj.

Në fjalën e tij, Dr. Elezaj theksoi se Kongresi bashkoi profesionistët shëndetësorë rreth një misioni të përbashkët: avancimit të njohurive shkencore, përmirësimit të kujdesit ndaj pacientëve dhe forcimit të bashkëpunimit profesional në rajon dhe më gjerë.

Ai vlerësoi rëndësinë e shkëmbimit të përvojave, arritjeve shkencore dhe ideve inovative ndërmjet ekspertëve, klinicistëve, studiuesve dhe profesionistëve të rinj, duke nënvizuar kontributin e tyre në zhvillimin e mëtejshëm të otorinolaringologjisë.

Në përmbyllje, Dr. Elezaj falënderoi ligjëruesit, pjesëmarrësit, Komitetin Organizativ, sponsorët dhe institucionet mbështetëse, ndërsa i ftoi të gjithë të angazhoheshin aktivisht në sesionet shkencore dhe në krijimin e bashkëpunimeve të reja profesionale e miqësive afatgjata.

07/08/2026

Prof. Dr. Tomislav Baudoin përshëndeti Kongresin e 14-të Ballkanik të ORL-së në emër të Konfederatës Evropiane

Në Ceremoninë Hapëse të Kongresit të 14-të Ballkanik të Otorinolaringologjisë dhe Kirurgjisë së Kokës dhe Qafës, pjesëmarrësve iu drejtua me një fjalë përshëndetëse Prof. Dr. Tomislav Baudoin, President i Konfederatës Evropiane të Shoqatave të Otorinolaringologjisë dhe Kirurgjisë së Kokës dhe Qafës (CEORL-HNS).

Gjersa ky kongres ishte edhe takim i përbashkët me këtë organizatë, në fjalën e tij, Prof. Baudoin prezantoi misionin dhe rolin e Konfederatës Evropiane, e cila bashkon 46 shoqata kombëtare të ORL-së dhe përfaqëson një komunitet prej rreth 40,000 specialistësh dhe specializantësh në mbarë Evropën. Ai theksoi rëndësinë e standardizimit të edukimit dhe praktikës klinike, mbështetjes së kërkimit shkencor dhe forcimit të bashkëpunimit ndërmjet profesionistëve të ORL-së.

Një moment i veçantë i mesazhit të tij ishte vlerësimi se Shoqata e Otorinolaringologëve dhe Kirurgëve të Kokës dhe Qafës e Kosovës tashmë është pjesë e plotë e familjes evropiane të ORL-së, duke kontribuar në forcimin e bashkëpunimit rajonal dhe evropian.

Ai shprehu gjithashtu krenarinë për partneritetin e ngushtë ndërmjet Konfederatës Evropiane dhe Shoqatës Ballkanike të ORL-së, duke i uruar Kongresit sukses të plotë dhe pjesëmarrësve një përvojë të frytshme shkencore dhe profesionale.

30/07/2026

Në ceremoninë hapëse të Kongresit të 14-të Ballkanik të ORL & Kirurgjisë së Kokës dhe Qafës, nënkryetarja e Odës së Mjekëve të Kosovës, Prof. Dr. Kreshnike Dedushi Hoti, përshëndeti pjesëmarrësit në emër të OMK-së, duke theksuar rëndësinë e këtij kongresi si një prej ngjarjeve më të rëndësishme shkencore dhe profesionale në rajon.

Ajo vlerësoi se organizimi i kongresit në Prishtinë dëshmon rolin gjithnjë e më të rëndësishëm të Kosovës në bashkëpunimin mjekësor evropian, ndërsa nënvizoi se partneriteti mes Odës së Mjekëve të Kosovës, Shoqatës së ORL-së së Kosovës, Shoqatës Ballkanike të ORL-së dhe partnerëve evropianë është dëshmi se shkenca dhe profesionalizmi tejkalojnë çdo kufi.

Prof. Dedushi Hoti riafirmoi përkushtimin e OMK-së për mbështetjen e edukimit të vazhdueshëm profesional të mjekëve dhe të aktiviteteve shkencore, duke shprehur mirënjohje për të gjithë organizatorët, komitetet dhe partnerët ndërkombëtarë që kontribuan në realizimin e këtij kongresi.

27/07/2026

📸 Rikthehuni në momentet më të bukura të Kongresit të 14-të Ballkanik të ORL & KKQ

Ju ftojmë të shfletoni galerinë me fotografi e cila sjell në një vend atmosferën e jashtëzakonshme të këtij kongresi, nga Ceremonia Solemne e Hapjes, sesionet shkencore përgjatë tri ditëve, diskutimet dhe shkëmbimi i përvojave profesionale, deri te Mbrëmja Gala, që forcuan miqësinë dhe bashkëpunimin ndërmjet kolegëve nga i gjithë rajoni dhe më gjerë.

https://orl-ks.org/gallery/

24/07/2026

Me rastin e fillimit të Kongresit të 14-të Ballkanik të ORL dhe Kirurgjisë së Kokës dhe Qafës, Kryetari i Kongresit, Dr. Dugagjin Spanca, njëherit edhe Kryetar i Shoqatës së ORL-së dhe Kirurgjisë së Kokës dhe Qafës të Kosovës, mbajti fjalimin e mirëseardhjes në Ceremoninë e Hapjes, duke theksuar rëndësinë e bashkëpunimit shkencor, partneritetit rajonal dhe përkushtimit të përbashkët të komunitetit të ORL-së për avancimin e kujdesit ndaj pacientëve.

Në fjalën e tij, Dr. Spanca nënvizoi se ky Kongres është shumë më tepër se një takim shkencor. Ky takim është platformë që bashkon profesionistë nga i gjithë rajoni dhe më gjerë për të shkëmbyer njohuri, për të forcuar miqësitë profesionale dhe për të frymëzuar gjeneratat e reja të specialistëve të ORL-së.

Ai shprehu mirënjohjen e tij të sinqertë për të gjithë ligjëruesit, panelistët, moderatorët, sponsorët, anëtarët e Komitetit Organizues dhe partnerët organizativë, si dhe për të gjithë pjesëmarrësit që, me praninë dhe kontributin e tyre, e bënë të mundur organizimin e këtij eventi të rëndësishëm shkencor.

Njëkohësisht, ai vlerësoi rolin aktiv dhe kontributin e vazhdueshëm të komunitetit të ORL-së së Kosovës në kuadër të Shoqatës Ballkanike të ORL-së.

Këtu po ndajmë një pjesë të fjalës së Kryetarit të Kongresit, ku theksoi se së bashku me të gjithë pjesëmarrësit do të vazhdojmë të avancojmë profesionin tonë, të forcojmë bashkëpunimin rajonal dhe ndërkombëtar, si dhe të përmirësojmë kujdesin ndaj pacientëve tanë.

16/07/2026

Falënderim për Sponsorët Tanë!

Përmbyllja me sukses e Kongresit të 14-të Ballkanik të Otorinolaringologjisë dhe Kirurgjisë së Kokës dhe Qafës nuk do të ishte e mundur pa mbështetjen e çmuar të partnerëve dhe sponsorëve tanë.

Shoqata e Otorinolaringologëve të Kosovës shpreh falënderimet më të sinqerta për besimin, partneritetin dhe kontributin e tyre në realizimin e një ngjarjeje shkencore që mblodhi qindra profesionistë dhe ekspertë nga rajoni dhe bota.

Kontributi i partnerëve dhe sponsorëve është gjithashtu investim në avancimin e edukimit të vazhdueshëm mjekësor, promovimin e bashkëpunimit ndërkombëtar dhe zhvillimin profesional të komunitetit tonë.

Faleminderit për besimin dhe partneritetin tuaj!

Shpresojmë që ky bashkëpunim i suksesshëm të vazhdojë edhe në aktivitetet tona të ardhshme.

Me mirënjohje të përzemërt,
Shoqata e Otorinolaringologëve dhe Kirurgëve të Kokës dhe Qafës të Kosovës

10/07/2026

✨ Një ngjarje që do të mbetet gjatë në kujtesë

Ky video-kolazh sjell disa nga çastet më të veçanta të Kongresit të 14-të Ballkanik të ORL & Kirurgjisë së Kokës dhe Qafës, nga Ceremonia Solemne e Hapjes deri te Mbrëmja Gala.

Fjalimet frymëzuese të bashkëorganizatorëve të Kongresit dhe mysafirëve tanë ndërkombëtarë, ndarja e mirënjohjeve dhe çmimeve, si dhe atmosfera e ngrohtë e programit social, pasqyrojnë frymën e bashkëpunimit, miqësisë dhe përkushtimit ndaj avancimit të ORL-së në rajon dhe më gjerë.

Mezi presim te takohemi në aktivitetet tona tjera!

07/07/2026

U PËRMBYLL ME SUKSES KONGRESI I 14-të BALLKANIK I OTORINOLARINGOLOGJISË DHE KIRURGJISË SË KOKËS DHE QAFËS

Pas tre ditësh të mbushura me shkëmbim të dijes, diskutime profesionale dhe bashkëpunim ndërkombëtar, me sukses të plotë u përmbyll Kongresi i 14-të Ballkanik i Otorinolaringologjisë dhe Kirurgjisë së Kokës dhe Qafës, i organizuar për herë të parë në Kosovë, nga 11 deri 13 Qershor.

Ky kongres mblodhi në Prishtinë mbi 400 pjesëmarrës, rreth 50 ligjërues të ftuar ndërkombëtarë, si dhe dhjetëra prezantues të tjerë nga vendi, rajoni dhe bota, duke e shndërruar Kosovën në qendrën ballkanike të shkencës dhe bashkëpunimit profesional në fushën e ORL-së dhe Kirurgjisë së Kokës dhe Qafës.

Ceremonia solemne e hapjes, e udhëhequr nga Kryetari i Kongresit, Dr. Dugagjin Spanca, u nderua me pjesëmarrjen dhe fjalimet e drejtuesve të institucioneve kryesore të sektorit shëndetësor, duke dëshmuar rëndësinë që kjo ngjarje kishte për komunitetin profesional dhe institucionet e vendit.

Programi shkencor treditor ofroi ligjërata të nivelit të lartë, sesione shkencore, diskutime interaktive dhe prezantime të arritjeve më të fundit në otorinolaringologji dhe kirurgjinë e kokës dhe qafës.

Krahas pjesës shkencore, në kuadër të kongresit u zhvilluan edhe Mbledhja e Asamblesë së Shoqatës Ballkanike të ORL dhe KKQ dhe Takimi i Bordit Drejtues të Shoqatës Ballkanike, ndërsa i tërë Kongresi u përcoll edhe me një program të pasur social, i cili kulmoi me Mbrëmjen Gala, duke forcuar edhe më tej miqësinë dhe bashkëpunimin ndërmjet kolegëve nga shumë vende të Ballkanit dhe Evropës.

Përpos që u vlerësua si një sukses i madh në tërësi, Kongresi ishte edhe dëshmi e kapaciteteve profesionale dhe organizative të Kosovës për të pritur ngjarje shkencore të standardeve më të larta ndërkombëtare, duke kontribuar njëkohësisht në avancimin e shkencës, edukimit të vazhdueshëm dhe bashkëpunimit rajonal.

Shoqata e Otorinolaringologjisë dhe Kirurgjisë së Kokës dhe Qafës e Kosovës shpreh mirënjohjen më të thellë për të gjithë ligjëruesit, pjesëmarrësit, moderatorët, sponsorët, partnerët institucionalë, Këshillin e Studentëve të FM-së, si dhe partnerin organizativ Staffassist, të cilët me përkushtimin dhe mbështetjen e tyre e bënë të mundur realizimin e një kongresi të paharrueshëm.

Gjatë ditëve në vazhdim do të shkruajmë më në hollësi për secilën pjesë të Kongresit.

🙏 Faleminderit të gjithëve që ish*t pjesë e këtij kapitulli të rëndësishëm në historinë e ORL-së ballkanike.

16/06/2026

Specialisti i njohur turk i otorinolaringologjisë dhe kirurgjisë së kokës dhe qafës nga Bursa, Prof. Dr. Ibrahim Hizalan:

Kongresi në Prishtinë bashkoi ekspertët më të mirë nga rajoni dhe përtej

iu ofron shërbimin e p...