05/02/2026
E LE’O I AI SE AFĀ E ONO A’AFIA AI SAMOA I LENEI TAIMI
Tusia: Pesetā Tusiga Taofiga
Ua saunoa manino le afioga i le Fa’auluuluga o le Ofisa o Va’aitau a Samoa iā ‘Afa’ese Dr. Luteru Tuvale, e le’o i ai se afā, o fa’amauina e ono a’afia ai Samoa i se taimi lata mai.
E ui i le tulaga loulouā o suiga ma’ale’ale o le tau, i le tetele o timuga ma le malosi o matagi, peita’i o se tala fiafia i le atunu’u, ina ua fa’ailoa manino e ‘Afa’ese, e leai se tulaga e fa’apopoleina ai.
Sa malosi le savili i le fa’ai’uga o le vaiaso peita’i ua suiga mālie ina ua amata mai i lenei vaiaso, ma ua māui atu fo’i vaitafe aemaise o le sousou o le gataifale i le mālolosi o galu fatio’o.
Fa’ailoa e ‘Afa’ese, o fetaiā’iga o savili o le Pasefika i Mātū o Samoa lea na a’afia ai tatou i matagi mālolosi ma le timu e to fa’ata’uta’u, peita’i o ia fetaiā’iga o savili ua aga’i atu nei i le itu i Saute o Samoa, ma ua va’aia ai le mou mālie atu o ia uiga loulouā o le tau.
O le silasila a le Ofisa o Va’aitau, i le tolu vaiaso na mālosi ai le pālalasi o timuga, ua utu ai le ‘ele’ele, afai ae toe pa’ū se isi timu i lenei vaiaso atoa, o le ā telē se avanoa e a’afia ai Samoa i ni lologa.
E ui ua suiga mālie le tau, peita’i e le’i fa’alēāogaina lapata’iga ma fautuaga, o lona uiga e ono i ai se avanoa e a’afia ai Samoa, auā o Fepuari iā Mati o lo’o fa’atulagaina, e po’ia gofie ai tatou i afā ma matagi mālolosi.
O lo’o tumau pea le tu’uālalo a le Ofisa o Va’aitau mo le atunu’u lautele, ina ia utagia fautuaga o lo’o avatu, e malu puipuia mai ai soifua i le ono lamatia ona o suiga ogaoga o le tau mai lea taimi i lea taimi.
