05/25/2026
ယောကာကွယ်ရေးတပ် - YDF မှ မိဘပြည်သူများထံ အသိပေးတိုက်တွန်းချက်
မေလ (၂၅)ရက် ၊ ၂၀၂၆ခုနှစ်
လွန်ခဲ့သော ရက်ပိုင်းမှစ၍ စစ်ကော်မရှင်သည် ယောဒေသ တောင်ပိုင်းနှင့် ချင်းပြည် တောင်ပိုင်းသို့ စစ်အင်အား ထောင်ချီဖြင့် အလုံးအရင်း ထိုးစစ်ဆင်ဝင်ရောက်နေပြီး လေကြောင်းတိုက်ခိုက်မှုများနှင့် လက်နက်ကြီး တိုက်ခိုက်မှုများလည်း တောက်လျှောက် ပြုလုပ်နေပါသည်။ ရှေ့တန်းစစ်မျက်နှာပြင်များတွင် ယောကာကွယ်ရေးတပ်-YDF အပါအဝင် မဟာမိတ် ပူးပေါင်းတပ်များသည် စစ်ကော်မရှင် စစ်ကြောင်းများနှင့် အပြင်းအထန် တိုက်ပွဲဖြစ်ပွားနေပြီး မိမိတို့ဘက်မှ အင်အားအလုံးအရင်းနှင့် ဆက်လက်ခုခံတိုက်ပွဲဆင်နွှဲလျက်ရှိကြောင်း ဦးစွာအသိပေးအပ်ပါသည်။ သို့ဖြစ်ပါ၍ မိဘပြည်သူများအနေဖြင့် ဘေးကင်းလုံခြုံရေးအတွက် အောက်ပါ ဆောင်ရန်/ရှောင်ရန် အချက်များကို အထူးဂရုပြု၍ ပူးပေါင်းပါဝင်ပေးကြပါရန် လေးနက်စွာ တိုက်တွန်းနှိုးဆော်အပ်ပါသည်။
၁။ လက်ရှိ ယောဒေသအတွင်းတွင် စစ်ကော်မရှင်၏ ဖက်ဆစ်အကြမ်းဖက်စစ်ကြောင်းများသည် မြို့ရွာများအတွင်း ဝင်ရောက်ပြီး ပြည်သူများအား ဖမ်းဆီး၍ လူသားဒိုင်းအဖြစ် မတရားအသုံးပြုခြင်း၊ လူငယ်အမျိုးသားများအား အတင်းအကြပ် ဖမ်းဆီးစစ်မှုထမ်းခိုင်းခြင်းနှင့် အမျိုးသမီးများအား အဓမ္မပြုကျင့်ခြင်း စသည့် စစ်ရာဇဝတ်မှုများ ကျူးလွန်နေသည်ကို စိတ်မကောင်းစွာ တွေ့မြင်၊ ကြားသိနေရပါသည်။ သို့ဖြစ်ပါ၍ မိဘ ပြည်သူများအနေဖြင့် လုံခြုံဘေးကင်းရာနေရာများသို့ အမြန်ဆုံး ပြောင်းရွှေ့နေထိုင်ကြရန် အလေးအနက် အသိပေးတိုက်တွန်းလိုပါသည်။
၂။ လက်ရှိကာလတိုက်ပွဲများတွင် စစ်ကော်မရှင်၏ အကြမ်းဖက် ဖက်ဆစ်တပ်သည် လေကြောင်းများ နှင့် လက်နက်ကြီးများဖြင့် စစ်ရေးပစ်မှတ် ၊ အရပ်သားပစ်မှတ် မခွဲခြားဘဲ လူမဆန်စွာ ရမ်းကားပစ်ခက်မှုများကို နေ့စဉ်ရက်ဆက် ကျူးလွန်နေသည်များကို တွေ့ရှိရသောကြောင့် မိဘပြည်သူများအနေဖြင့် လုံခြုံရာအရပ်တွင် ဗုံးခိုကျင်း၊ ကတုတ်ကျင်းများ၊ သဲအိတ်များကို ကြိုတင်ပြင်ဆင်ထားကြရန်နှင့် အန္တရာယ်ရှိသော အခြေအနေများကို မျက်ခြေမပြတ်စောင့်ကြည့်ပြီး သတိပြုနေထိုင်ကြရန် အသိပေးတိုက်တွန်းလိုပါသည်။
၃။ မိဘပြည်သူများ၏ အသက်အန္တရာယ်လုံခြုံရေးအတွက် ယောကာကွယ်ရေးတပ် - YDF မှ လိုအပ်၍ထုတ်ပြန်သော စစ်ရေးသတိပေးချက်များ ၊ လမ်းကြောင်းပိတ်ဆို့မူများကို ပူးပေါင်းဆောင်ရွက်ပေးကြရန်နှင့် စစ်မြေပြင် သတင်းအချက်အလက်များကိုလည်း အချိန်နှင့် တပြေးညီ နားစွင့်ထားကြပါရန် လေးနက်စွာတိုက်တွန်းလိုပါသည်။ မိဘပြည်သူများအနေဖြင့် ကျန်းမာရေး ကဲ့သို့သော အရေးပေါ် ကိစ္စရပ်များကြောင့် ခရီးသွားလာရန် မဖြစ်မနေ လိုအပ်လာပါကလည်း သက်ဆိုင်ရာတာဝန်ရှိသူများ၏ အကြံပြုမှုကို ရယူပြီးမှသာ သွားလာကြပါရန် အကြံပြုတိုက်တွန်းလိုပါသည်။
၄။ ယောကာကွယ်ရေးတပ် - YDF အနေဖြင့် တော်လှန်ရေးစတင်ချိန်မှစ၍ ဒေသအသီးသီးတွင် ကျရာတာဝန်ထမ်းဆောင်ခဲ့သလို ယခု အရေးကြီးလာချိန်တွင်လည်း မဟာမိတ်ပူးပေါင်းတပ်များနှင့် အတူ ရွပ်ရွပ်ချွန်ချွန်ဖြင့် စုပေါင်းတော်လှန်လျက်ရှိပြီး မိမိဒေသအတွက် ရဲဝံ့စွာ အသက်ပေးကာကွယ်လျက်ရှိပါသည်။ တော်လှန်ရေးစတင်ချိန်မှ ယနေ့ထိတိုင် တိုက်ပွဲဝင်နေကြသော စစ်သည်အပေါင်းနှင့် ပေးဆပ်ကူညီနေကြသော မိဘပြည်သူများကို အစဉ်လေးစားဂုဏ်ပြုလျက်ရှိပြီး အာဏာရှင်စနစ် ဆုံးခန်းတိုင်သည်အထိ တော်လှန်ရေးတွင် နိုင်ရာတာဝန်ထမ်းဆောင်ပြီး အတူတကွ ရပ်တည်ကြပါရန် တိုက်တွန်းနှိုးဆော်အပ်ပါသည်။ ယောကာကွယ်ရေးတပ်-YDF မှလည်း မတရားသော အာဏာရှင်စနစ်ကို ဆန့်ကျင်ဖို့ ဆန္ဒရှိသော စစ်သည်၊ ပြည်သူ အပေါင်းတို့ကို ထပ်လောင်းဂုဏ်ပြုအပ်ပြီး စိတ်တူကိုယ်တူ ရပ်တည် သွားမည်ဖြစ်ကြောင်း လေးနက်စွာ ကတိပြုအပ်ပါသည်။
“ ယောမြေ ယောလူထု အမြန်ဆုံး လွတ်လပ်ငြိမ်းချမ်းနိုင်ပါစေ ”
#ဗဟိုစစ်ရုံးချုပ်
#ယောကာကွယ်ရေးတပ်_YDF
