07/24/2026
पानी परिरहेको बेला रेनकोट ओढेर उकालो बाटो हुँदै स्कुलतर्फ हिँडिरहेका तीन बालिकाको १७ सेकेन्डको भिडियो अहिले सामाजिक सञ्जालमा व्यापक रूपमा भाइरल बनेको छ।
गुलाबी, हरियो र पहेँलो रेनकोट लगाएका तीन बालिकालाई भिडियोमा आफ्नै सुरमा उकालो चढ्दै गरेको देखिन्छ। भिडियो खिच्ने व्यक्तिले "हलो साथी हो, ओ! छाता ओढेका साथीहरू" भनेर बोलाए पनि उनीहरू नरोकी आफ्नो बाटो लागिरहन्छन्। बीचमा मोटरसाइकल चालकसँग गरिएको छोटो संवादपछि भिडियो सकिन्छ।
दुई दिनअघि फेसबुकमा सार्वजनिक गरिएको उक्त भिडियोले आज बिहानसम्म २ करोड २० लाखभन्दा बढी भ्युज, ७ लाख ५० हजारभन्दा बढी रियाक्सन, ९ हजारभन्दा बढी कमेन्ट र ४ हजार ६ सयभन्दा बढी शेयर प्राप्त गरिसकेको छ।
✅ रोल्पाको सुर्पालमा खिचिएको भिडियो
भाइरल भिडियो रोल्पाको रुन्टीगढी गाउँपालिका–४, सुर्पालमा खिचिएको हो। स्थानीय लोकेन्द्र पुन (फेसबुकमा ‘लोकेन पुन’) ले टंक सुपारी स्मृति प्रतीक्षालयबाट यो दृश्य कैद गरेका थिए।
दिदीलाई बस चढाउन प्रतीक्षालयमा बसेका बेला झरीमा प्लास्टिकको रेनकोट ओढेर स्कुलतर्फ हिँडिरहेका बालिकाहरू देखेपछि उनले भिडियो खिचेर फेसबुकमा पोस्ट गरेका थिए।
✅ तीनै जना स्कुल जाने बालिका
भिडियोमा देखिएका तीनै जना बालिका सुर्पालस्थित एडभान्स चाइल्ड केयर सेन्टरमा अध्ययनरत छन्। उनीहरूमध्ये दुई जना एउटै घरका हुन् भने अर्की छिमेकी हुन्। उनीहरू दैनिक सँगै स्कुल आउने–जाने गर्छन्।
सामाजिक सञ्जाल प्रयोगकर्ताको अनुरोधपछि लोकेन्द्र पुनले उनीहरूको अनुहार देखिने अर्को भिडियो पनि सार्वजनिक गरेका छन्। तर बालिकाहरूले धेरै कुरा नगरी अघिल्लोजस्तै आफ्नै सुरमा स्कुलतर्फ लागेको उनले बताएका छन्।
✅ क्रेडिटबिनै भिडियो प्रयोग भएको गुनासो
लोकेन्द्र पुनका अनुसार उनको भिडियो धेरैले डाउनलोड गरेर फेसबुक र टिकटकमा पुनः पोस्ट गरेका छन्। कतिपयले एआई प्रयोग गरेर नयाँ संस्करणसमेत बनाएका छन्। भिडियो लोकप्रिय भएकोमा खुसी भए पनि धेरैले क्रेडिट नदिई आफ्नै सामग्रीजस्तो प्रस्तुत गरेकोमा भने उनले दुःख व्यक्त गरेका छन्।
post
