14/04/2023
كل عام نبذرو الماكلة بقيمة 572 مليون دينار😱😱
فلوسنا ملوحة في كدس #زبلة داير بيه ذبان الخريف 🪰 و نموس 🦟 #الصيف و مع كل نسمة تهب تفوح ريحة خامرة تخنق 🥴 .
حسب الوكالة الوطنية للتصرف في النفايات، 2.6 مليون طن زبلة تخرج من ديارنا كل عام، وين 63% منها متكونة من مواد عضوية كيما: ماكلة طايبة, خبز🥖, غلة🍉🍋 , لحم 🥩 و دجاج.🍗
لكن الحاجة الي تفرح 🤩 ليوم إنو الزبلة هذي ولينا نجموا نستغلوها و ننتجوا منها طاقة💡 😁
وهكاكة تولي الزبلة إلي ماشية للمصبات الطاقة أولى باها 💡
كيفاش؟
نحولوا الزبلة العضوية كيما قشور الغلة و الخضرة، قشور لعظم و فضلة الماكل , المشخشخة بالكربون و نستخرجوا منها الطاقة إلي تنجم تكون حرارة, ضوء ولا وقود حيوي (Biocarburant) نجموا نخدموا بيه المطورات (Moteurs).
وحسب الجودة متاعو نجموا نعوضو بيه #البترول 🏗 و (Gaz naturel) 🏭 والفحم الحجري(Charbon) إلي يتسماو #طاقات غيرمتجددة خاتريجي نهار ويوفاو عكس الطاقات المتجددة كيما الطاقة الشمسية و طاقة الريح و طاقة الكتلة الحيوية(Biomasse).
و هكا نكونوا :
✅ حلينا مشكلة التصرف في الزبلة و نخفو المصبات.
✅ صنعنا طاقة نظيفة متجددة ونقصنا من حرق الفحم، البترول و الغاز و نقصنا من انبعاثات الغازات إلي يخليوا كل عام يجينا أسخن ملي قبلو كيما ، #الميثان وغيرهم والي نسميوهم الغازات الدفيئة (gaz à effet de serre)
و أحنا معلينا كان نفرزوا زبلتنا ونستحفظوا على #فلوسنا 💵, نشريوا على قد حاجتنا و نقصوا من #التبذير و كان عنا جنينة ولا حتى محابس نجمو نستغلوا الزبلة العضوية كيما القهوة, قشور لعظم و الخضرة 🥕🫑 و الغلة 🍊🍐 ونعملوهم #غبار للنباتات. 🌿
كل مرة نحكيولكم على حل من الحلول لمشكل النفايات في بلادنا .
كان عندكم des astuces / Bonnes pratiques تعملوهم باش نقصو من زبلتنا ونخفو المصبات شاركونا بيه في كومانتير. 👇👇
Journalist : Syrine Jouini
ا BLUE TN هو وسيلة إعلام مستقلة ، معملين عليكم تعاونونا بالبرتاج و الكومانتير على صفحاتنا باش إنجموا نكملو نودوكم بالمعلومات اللي تهمكم . 🙏🙏
Subscribe to our magazine: www.bluetunisia.com
Instagram:
