18/07/2026
Ту «БОСС»-ӣ? Ё танҳо ном?
Дар Душанбе наврасе боздошт шуд, ки дар Instagram саҳифаҳои «БОСС» дошт. Дар он ҷо ӯ одамонро таҳқир мекард, дар байни наврасон ҷанҷолу муноқиша ташкил медод. Ҳангоми боздошт аз дасташ корд ёфта шуд.
Ҳамчун мутахассис мегӯям ин ҳолат на танҳо дар бораи як наврас аст. Ин дар бораи ҳазорон ҷавонест, ки худро дар шабака «босс», «қавӣ» ё дигар нишон медиҳанд.
Аммо равоншиносӣ як ҳақиқати оддӣ дорад:
Касе, ки дар дил худро қавӣ ҳис мекунад — ҳеҷ гоҳ дигаронро таҳқир намекунад.
Таҳқир, дағалӣ, тарсондан ин нишонаи қувват нест. Ин фарёди «маро бинед!» аст. Наврасе, ки дар ҳаёти воқеӣ худро дида нашуда ҳис мекунад, дар шабака ниқоби «БОСС»-ро мепӯшад. Ниқоб зебо менамояд лайк меояд, тарс меояд, «эҳтиром» меояд.
Вале ин эҳтироми қалбакист. Ва нархаш гарон:
▪️ Корд мусодира шуд
▪️ Ба волидайн протокол тартиб дода шуд (моддаи 90 КҲМ ҶТ)
▪️ Ном — дар қайди мақомот, ва ин доғ солҳо мемонад
▪️ Ва саволи асосӣ: он «мухлисон»-и саҳифа куҷоянд? Ҳеҷ кадоме аз онҳо ба шӯъбаи милиса наомад.
Қавии ҳақиқӣ он аст, ки худро идора карда метавонад. Ки «не» гуфта метавонад. Ки ба ҷои ниқоб малака месозад, ба ҷои тарсондан эҳтироми ҳақиқӣ ба даст меорад.
Босс будан ин идора кардани худ аст, на тарсондани дигарон.
