05/07/2026
ထိုင်းနိုင်ငံ မယ့်ဟောင်ဆောင်တွင် “KARENNI BY BLACK KING BK” ဟု မှုတ်ဆေးဖြင့် စာရေးသားမှုအပေါ် ကရင်နီလူထု စိုးရိမ်ပူပန်မှုမြင့်တက်ကာ ဝေဖန်ပြစ်တင်နေကြ
ဇူလိုင် ၅ ရက်၊ ၂၀၂၆ ခုနှစ်
ထိုင်း-မြန်မာနယ်စပ် မယ်ဟောင်ဆောင်ခရိုင်အတွင်းရှိ ထင်ရှားသော ခရီးသွားဆွဲဆောင်မှုနေရာတစ်ခုဖြစ်သည့် ဒွိုင်စံဖာ ရှုခင်းသာ (Doi San Fah Viewpoint) တွင် လူမဲ့ကမ်းမဲ့ မှုတ်ဆေးဖြင့် စာရေးသားခဲ့သည့် လုပ်ရပ်တစ်ခုကြောင့် ထိုင်းနိုင်ငံရောက် ကရင်နီရွှေ့ပြောင်းလုပ်သားများနှင့် မိဘပြည်သူများအကြား ပြင်းထန်စွာ စိုးရိမ်ပူပန်မှုများ ဖြစ်ပေါ်လျက်ရှိကြောင်း သိရသည်။
ယနေ့ ဇူလိုင်လ ၅ ရက်နေ့ မနက်အစောပိုင်းတွင် အဆိုပါ ဒွိုင်စံဖာ ရှုခင်းသာလမ်းဘေး လုံခြုံရေးတံတိုင်း ကွန်ကရစ်နံရံပေါ်၌ “KARENNI BY BLACK KING BK” ဟု မှုတ်ဆေးအမည်းဖြင့် အက္ခရာအကြီးကြီး ရေးသားထားသည်ကို လူမှုကွန်ရက်စာမျက်နှာများတွင် စတင်တွေ့ရှိခဲ့ရခြင်း ဖြစ်သည်။
မယ်ဟောင်ဆောင်ခရိုင်သည် မြန်မာနိုင်ငံ ကရင်နီ (ကယား) ပြည်နယ်နှင့် နယ်နိမိတ်ချင်း ထိစပ်နေပြီး စစ်ဘေးရှောင်များနှင့် ရွှေ့ပြောင်းလုပ်သား အများအပြား ခိုလှုံလုပ်ကိုင်ရာ အရေးပါသော နယ်စပ်ဒေသတစ်ခု ဖြစ်သည်။ ဒွိုင်စံဖာ ရှုခင်းသာ (Doi San Fah Viewpoint) သည် သဘာဝတောင်တန်း အလှအပများနှင့် တိမ်ပင်လယ်များကို ရှုစားနိုင်သဖြင့် ထိုင်းနိုင်ငံသားများနှင့် နိုင်ငံတကာခရီးသွားများအကြား အထူးရေပန်းစားသည့် ထိန်းသိမ်းစောင့်ရှောက်ထားသော သဘာဝနယ်မြေတစ်ခု ဖြစ်သည်။
ယခုကဲ့သို့ အများပြည်သူနှင့် သက်ဆိုင်သည့် နေရာတွင် စည်းမဲ့ကမ်းမဲ့ စာရေးသားမှုအပေါ် ထိုင်းနိုင်ငံရောက် ကရင်နီမိဘပြည်သူများနှင့် မြန်မာရွှေ့ပြောင်းလုပ်သားများက အလွန်အမင်း မကျေမနပ်ဖြစ်ကာ ပြင်းပြင်းထန်ထန် ပြစ်တင်ဝေဖန်နေကြသည်။
လူမှုကွန်ရက်ပေါ်တွင် ကရင်နီဒေသခံတစ်ဦးက ဒေါသတကြီးဖြင့် “ လက်ကမြင်းတာလား @ ပြဿနာရှာတာလား။ ဒီနေ့ ဇူလိုင်လ ၅ ရက်နေ့ မနက်အစောပိုင်းမှာ မယ်ဟောင်ဆောင် ဒွိုင်စံဖာ ရှုခင်းသာ (Doi San Fah Viewpoint) မှာ မှုတ်ဆေးနဲ့ KARENNI BY BLACK KING BK ဆိုပြီး ရေးသွားပါတယ်။ ခုချိန် နယ်စပ်ဒေသမှာ စီမံချက်တွေနဲ့ တင်းကြပ်နေတဲ့ကာလ ခုလို စည်းမဲ့ကမ်းမဲ့ သောက်လက်ကမြင်းတာဟာ ကရင်နီကနေ ပြောင်းရွှေ့နေထိုင် အလုပ်လုပ်ကိုင်နေသူတွေကို ထိခိုက်စေပါတယ်၊ ကရင်နီ ဂုဏ်သိက္ခာကျစေပါတယ်” ဟု ရေးသားကာ အပြစ်တင်ထားသည်။
လက်ရှိအချိန်တွင် ထိုင်းနိုင်ငံ အာဏာပိုင်များအနေဖြင့် နယ်စပ်ဒေသလုံခြုံရေးနှင့် တရားမဝင်ရွှေ့ပြောင်းနေထိုင်သူများအပေါ် စီမံချက်များချမှတ်ကာ စစ်ဆေးမှုများ အထူးတင်းကြပ်ထားသည့် ကာလဖြစ်သည်။ ထိုသို့သော အခြေအနေမျိုးတွင် ယခုကဲ့သို့ စည်းကမ်းမဲ့သည့် ရမ်းကားမှုများကြောင့် ထိုင်းအာဏာပိုင်များ၏ မျက်စိဒေါက်ထောက်ကြည့်ခြင်းကို ခံရနိုင်ပြီး၊ အခြေချနေထိုင် အလုပ်လုပ်ကိုင်နေကြသည့် အပြစ်မဲ့ ကရင်နီလူထုအပေါ် သက်ရောက်မှုများ ရှိလာမည်ကို အားလုံးက စိုးရိမ်နေကြခြင်း ဖြစ်သည်။
အဆိုပါကိစ္စနှင့် ပတ်သက်၍ ထိုင်းရောက် မြန်မာပြည်ဖွားများက မိမိတို့ အခြေချခိုလှုံရာ အိမ်ရှင်နိုင်ငံ၏ ဥပဒေနှင့် စည်းကမ်းများကို လေးစားလိုက်နာရန် လိုအပ်ကြောင်း အချင်းချင်း သတိပေးလျက်ရှိကြပြီး “လက်ဘေးသေးပေါက် အုတ်နံရံမြင် စာရေး စည်းမရှိ ကမ်းမရှိ လုပ်ရပ်မျိုးတွေနဲ့ သူများနိုင်ငံမှာ ပြဿနာမရှာကြပါနဲ့” ဟု တိုက်တွန်းနှိုးဆော်ကာ မိမိတို့လူမျိုး၏ ဂုဏ်သိက္ခာကို ထိန်းသိမ်းကြရန် လူမှုကွန်ရက်များတွင် ကျယ်ကျယ်ပြန့်ပြန့် သတိပေး ပြောဆိုနေကြကြောင်း သတင်းရရှိသည်။
#ရှမ်းပြည်နယ်မှပဲ့တင်သံများ
