28/07/2026
အတိုင်းထက်လွန် ပေးဆပ်ခဲ့ကြတဲ့ ရဲဘော်တွေရဲ့ ဘဝအသစ်အတွက် သရုပ်ဆောင် မင်းမော်ကွန်း ရဲ့ "မွေးနေ့လက်ဆောင်" ကမ်ပိန်းကတဆင့် ရရှိလာတဲ့ ပြည်သူတွေရဲ့ မေတ္တာနဲ့ အလှူငွေများကို ရဲဘော်များအတွက် အားဖြည့်ပေးနိုင်ခဲ့ပါပြီ။
တိုက်ပွဲအတွင်းမှာ နိုင်ငံနဲ့ ပြည်သူအတွက် ကိုယ်လက်အင်္ဂါ စွန့်လွှတ်ခဲ့ရတဲ့ ရဲဘော်တွေရဲ့ စိတ်ဓာတ်က ဘယ်တော့မှ ကျရှုံးမှာ မဟုတ်ပါဘူး။ အခု ရရှိလာတဲ့ ခြေတုတွေက ရဲဘော်တွေ မားမားမတ်မတ် ပြန်လည်ရပ်တည်နိုင်ဖို့အတွက် အကြီးမားဆုံး အားဖြည့်မှုတခု ဖြစ်စေခဲ့ပါတယ်။
မိဘပြည်သူများရဲ့ ပါဝင်ပံ့ပိုးမှုကြောင့် "မွေးနေ့လက်ဆောင်" ကမ်ပိန်းမှ စုစုပေါင်း ရန်ပုံငွေ (၆၃၈,၈၅၃,၅၆၉) ကျပ် ရရှိခဲ့ပြီး၊ ရခိုင်ပြည်တွင်းရှိ ခြေ/လက်တု တပ်ဆင်ရေးစင်တာ တည်ထောင်ရန်အတွက် (၅၇,၇၆၃,၅၁၇) ကျပ် ကို မတည်လှူဒါန်းနိုင်ခဲ့ပါတယ်။ ဒါ့အပြင် ခြေတုတပ်ဆင်ရန် ခရီးစရိတ် လိုအပ်နေတဲ့ အညာ၊ ကရင်နီ နှင့် ရခိုင်ဒေသမှ ရဲဘော် (၃၁)ဦး အတွက် ခရီးစရိတ်များ ကူညီထောက်ပံ့ပေးနိုင်ခဲ့ပါတယ်။
ခြေတုတပ်ဆင်ခြင်း လုပ်ငန်းစဥ်အတွက် ရဲဘော် (၁၁၁) ဦး ကို ခြေတုတပ်ဆင်ပေးနိုင်ခဲ့ပြီး၊ ခြေတုတပ်ဆင်ခြင်း လုပ်ငန်းစဉ် အဆင်ပြေချောမွေ့ဖို့အတွက် ကျွမ်းကျင်ပညာရှင်များဖြင့် ဆက်လက် ဆောင်ရွက်လျက် ရှိပါတယ်။
ရဲဘော်များအားလုံး စိတ်ရောကိုယ်ပါ ကျန်းမာကြံ့ခိုင်စွာဖြင့် ရှေ့ဆက်နိုင်ပါစေကြောင်း ဆုမွန်ကောင်းတောင်းရင်း၊ သရုပ်ဆောင် မင်းမော်ကွန်း ရဲ့ 'မွေးနေ့လက်ဆောင်' ကမ်ပိန်းမှာ တက်ကြွစွာ ပါဝင်ကူညီပေးခဲ့ကြတဲ့ တဦးတယောက်ချင်းစီတိုင်း နဲ့ ပရိသတ်ပြည်သူများအားလုံးကို လှိုက်လှဲစွာ ကျေးဇူးတင်ရှိကြောင်း မှတ်တမ်းတင် ဖော်ပြအပ်ပါတယ်။
#မွေးနေ့လက်ဆောင်ကမ်ပိန်း
#မင်းမော်ကွန်း
