GoleKaab

10/10/2026

, 10 Oktoobar 2026:

Xubnaha kormeerayaasha bulshada rayidka ah ee Somalia Non State Actors, iyagoo adeegsanaya Hindisaha Kormeerka Baarlamaanka ee GoleKaab, ayaa maanta kormeeray kulanka 22-aad ee Kalfadhiga 8-aad ee Golaha Shacabka ee Baarlamaanka 11-aad ee Jamhuuriyadda Federaalka Soomaaliya.

Kulanka ayaa ku furmay kooram dhan 141 Xildhibaan, waxaana shir guddoominayey Guddoomiyaha Golaha Shacabka, H.E. Mudane Cabdulqaadir Maxamed Nuur (Jaamac), oo uu wehelinayey Guddoomiye Ku-xigeenka Labaad ee Golaha Shacabka, H.E. Mudane Cabdullaahi Cumar Abshirow.

Ajendaha kulanka waxaa ku jiray dhammaystirka doodda Akhrinta Labaad ee Hindise-Sharciyeedka Wax-ka-beddelka Sharciga Bangiga Dhexe ee Soomaaliya, Lr. 130, ee soo baxay 22-kii Abriil 2012, iyo soo-jeedinta warbixinta Akhrinta Labaad ee heshiisyada u dhexeeya Soomaaliya iyo Turkiga ee ku saabsan iskaashiga caalamiga ah ee garsoorka.

Toddoba Xildhibaan ayaa ka qaybgalay doodda lagu soo gabagabaynayey hindise-sharciyeedka wax-ka-beddelka Sharciga Bangiga Dhexe, iyagoo su’aalo iyo aragtiyo la wadaagay Guddiga Miisaaniyadda. Sidoo kale, sagaal Xildhibaan ayaa ka qaybgalay doodda warbixinta heshiisyada Soomaaliya iyo Turkiga ee iskaashiga caalamiga ah ee garsoorka.

Intii uu kulanku socday, Xildhibaano dhowr ah ayaa qaatay qodobbo habraac (Points of Order), halka qaar kalena ay ka hadleen arrimo ka baxsan ajendaha, oo ay ku jiraan arrimaha dastuurka iyo ganaaxyada laga jaray gunnooyinka Xildhibaanada, kuwaas oo dhaliyey dood dheeraad ah.

Labada hindise-sharciyeed iyo heshiisba waxaa loo gudbiyey Akhrinta Saddexaad, si loogu tixgeliyo aragtiyaha iyo talooyinka ay Xildhibaanadu ka dhiibteen doodaha.

Gebagebadii, Guddoomiyaha Golaha Shacabka ayaa Xildhibaanada faray inay ku ekaadaan qodobada ku jira ajendaha kulanka, isagoo ka digay in makarafoonka laga damin doono Xildhibaanka ka hadla arrimo aan ajendaha khusayn.

Kulankan ayaa qabsoomay kaddib markii saddex kulan oo isku xigay oo Golaha Shacabka ah ay u qabsoomi waayeen kooram la’aan, taas oo maanta Golaha u suuragelisay inuu dib u bilaabo hawlihiisa kalfadhiga guud.

07/10/2026

, 7 Oktoobar 2026:

Xubnaha Kormeerayaasha Bulshada Rayidka ah ee Somalia Non State Actors, iyagoo adeegsanaya Hindisaha Kormeerka Baarlamaanka ee GoleKaab, ayaa maanta kormeeray kulankii 21-aad ee Kalfadhiga 8-aad ee Golaha Shacabka ee Baarlamaanka Federaalka Soomaaliya.

Kulanka ayaa mar kale u baaqday kooram la’aan, iyadoo ay soo xaadireen 115 Xildhibaan oo keliya, halka 160 Xildhibaan ay ka maqnaayeen kulanka.

Sida uu dhigayo Xeer-hoosaadka Golaha Shacabka, furitaanka kulamada Golaha waxaa loo baahan yahay in ay soo xaadiraan tirada ugu yar ee Xildhibaannada uu Xeer-hoosaadku dhigayo. Xildhibaanadii ka maqnaa kulanka ayaa loo yeeriyey si ay uga soo qaybgalaan.

Guddoomiye Ku-xigeenka Labaad ee Golaha Shacabka, H.E. Mudane Cabdullaahi Cumar Abshir, ayaa sheegay in aysan jirin Xildhibaano fasax rasmi ah ku maqan, isla markaana maqnaanshaha Xildhibaanada lala xisaabtami doono. Waxa uu sidoo kale xusay in Xildhibaanka saddex kulan oo isku xigta ka maqnaada isagoo aan fasax haysan uu wajahayo tallaabo anshaxeed, oo ay ku jirto ganaax lacageed.

Baaqashada kulankan waxay sii kordhinaysaa kulamadii Kalfadhiga 8-aad ee u baaqday kooram la’aan, taasoo muujinaysa walaaca joogtada ah ee ku saabsan xaadiritaanka Xildhibaanada iyo habsami-u-socodka shaqada Baarlamaanka.

04/10/2026

27, September 2026

Xubno ka tirsan Bulshada Rayidka Soomaaliyeed, oo uu hoggaaminayay Somalia Non State Actors, ayaa ka qaybgalay kulan la-tashi ah oo ay Wasaaradda Maaliyadda Xukuumadda Federaalka Soomaaliya la yeelatay ururrada Bulshada Rayidka, kaas oo looga hadlay diyaarinta Miisaaniyadda Qaranka ee 2027.

Kulanka ayaa fursad muhiim ah u ahaa ururrada Bulshada Rayidka inay Wasaaradda Maaliyadda la wadaagaan aragtiyahooda, talooyinkooda iyo mudnaanta ay muhiimka u arkaan in lagu tixgeliyo diyaarinta miisaaniyadda sanadka 2027.

Xubnaha Bulshada Rayidka ayaa soo jeediyay talooyin iyo wax-ku-biirin ballaaran, iyagoo si gaar ah ugu baaqay Dowladda inay kordhiso qoondada miisaaniyadeed ee loo qoondeeyo waxbarashada, caafimaadka iyo Guddiga Xuquuqul Insaanka Soomaaliyeed. Waxaa sidoo kale xoogga la saaray muhiimadda ay leedahay in la xoojiyo maalgelinta qaybahan si ay uga jawaabaan baahiyaha bulshada iyo ilaalinta xuquuqda muwaadiniinta.

Ka-qaybgalka Bulshada Rayidka ee geeddi-socodka miisaaniyadda qaranka ayaa muhiim u ah kor u qaadista isla-xisaabtanka, hufnaanta iyo ka-qaybgalka dadweynaha, iyo in miisaaniyadda qaranku si wanaagsan uga tarjunto baahiyaha iyo mudnaanta bulshada Soomaaliyeed.

28/09/2026

28 Sep 2026: , Hirshabelle State, Soomaaliya

Daladda Bulshada Rayidka Soomaaliyeed ee Somalia Non State Actors ayaa magaalada Jowhar ee Dowlad-goboleedka Hirshabelle ku qabatay Tababar ku saabsan Aqoonta Dijitaalka ah, kaas oo loo qabtay ururrada bulshada rayidka, mutadawiciinta, xubnaha bulshada iyo kooxaha dhalinyarada.

Tababarkan wuxuu ku saleysan yahay natiijooyinka qiimayntii ballaarneyd ee Aqoonta Dijitaalka ah oo ay sameysay GoleKaab Digital Literacy Assessment) oo ay Somalia Non State Actors h**ey u sameysay, taas oo lagu qiimeynayay heerka aqoonta iyo awoodda dijitaalka ah ee ururrada bulshada rayidka, mutadawiciinta iyo xubnaha bulshada, iyo baahiyaha jira.

Ka qaybgalayaashu waxay si firfircoon uga qayb qaateen tababarka oo diiradda lagu saaray badbaadada iyo amniga internet-ka, adeegsiga baraha bulshada ee u doodista (advocacy), iyo helitaanka xogta iyo adeegyada dowladda ee internet-ka.

Tababarkani wuxuu qayb ka yahay geeddi-socodka ballaaran ee xoojinta aqoonta iyo awoodda dijitaalka ah ee ay SONSA ka waddo GoleKaab, iyadoo uu daba socdo Phase Two ee tababarka oo Muqdisho lagu qabtay 20 Agoosto 2026.

28/09/2026

, 28 Sebtembar 2026:

Xubnaha Kormeerayaasha Bulshada Rayidka Soomaaliyeed ee ka socda Somalia Non State Actors, iyagoo adeegsanaya Hindisaha Kormeerka Baarlamaanka ee , ayaa maanta kormeeray kulankii 20-aad ee Kalfadhiga 8-aad ee Golaha Shacabka ee Baarlamaanka Federaalka Soomaaliya, Kalfadhiga 11-aad.

Kulanka ayaa loo baajiyay kooram la’aan, iyadoo ay goobta xaadireen 123 Xildhibaan oo keliya. Kulanka waxaa shir-guddoominayay Guddoomiye Ku-xigeenka Labaad ee Golaha Shacabka, Mudane Cabdullaahi Cumar Abshir, kaas oo Xildhibaanada ku wargeliyay in xubno badan ay ku maqnaayeen deegaanadooda, maadaama ay socdaan diyaar-garowga doorashooyinka goleyaasha deegaanka iyo wakiillada Dowlad-goboleedyada ee la filayo in 30ka Sebtembar 2026 ka dhacaan Hirshabelle iyo Galmudug.

Guddoomiye Ku-xigeenka Labaad ayaa sidoo kale ku dhawaaqay in maalinta Arbacada uusan jiri doonin kulan, iyadoo kulanka xiga loo qorsheeyay 3da Oktoobar 2026.

Baajinta maanta waxay noqotay kulankii afraad ee Kalfadhiga 8-aad ee loo baajiyo kooram la’aan. Maadaama kulankii Arbacada sidoo kale la baajiyay, tirada kulamada uu saameeyay kooram la’aantu waxay noqon doontaa shan (5) kulan.

Kalfadhigii 7-aad ee h**e, GoleKaab wuxuu diiwaangeliyay sagaal kulan oo sidoo kale loo baajiyay xaadiritaan aan ku filnayn.

26/09/2026

26/09/2026

, 26 Sebtembar 2026:

Xubno ka tirsan Kormeerayaasha Bulshada Rayidka Soomaaliyeed ee Somalia Non State Actors, oo loo marayo GoleKaab Parliamentary Monitoring Initiative, ayaa maanta kormeeray kulankii 19-aad ee Kalfadhiga 8-aad ee Golaha Shacabka ee Baarlamaanka Federaalka Soomaaliya. Kulanka waxaa shir-guddoomiyey Guddoomiye Ku-xigeenka Labaad ee Golaha Shacabka, Mudane Cabdullaahi Cumar Abshirow, waxaana kooramku ahaa 141 Xildhibaan.

Mudanayaasha Golaha Shacabka ayaa cod u qaaday Hindise-Sharciyeedka Iskaashiga Garsoorka Caalamiga ah, waxaana oggolaaday 130 Xildhibaan, sagaal ayaa diiday, halka laba Xildhibaan ay ka aamuseen. Hindise-sharciyeedka ayaa sidaas ku ansaxay, waxaana loo gudbiyey Golaha Aqalka Sare.

Sidoo kale, Golaha Shacabka ayaa Akhrinta Labaad marsiiyey Hindise-Sharciyeedka Wax-ka-beddelka Sharciga Bankiga Dhexe ee Soomaaliya, Sharciga Lr. 130 ee soo baxay 22-kii Abriil 2012. Lix Xildhibaan ayaa ka qayb qaatay doodda, waxaana Guddoomiyuhu sheegay in dooda Akhrinta Labaad ay sii socon doonto kulanka xiga.

Ugu dambeyn, Xildhibaanada waxaa loo qeybiyey warbixinta Akhrinta Labaad ee heshiisyada u dhexeeya Soomaaliya iyo Turkiga ee ku saabsan iskaashiga caalamiga ah ee garsoorka.

26/09/2026

BULSHADA RAYIDKA SOOMAALIYEED OO BOOQASHO SHAQO KU TAGAY GOLAHA WAKIILLADA GALMUDUG

Iyadoo qayb ka ah booqashooyinkii shaqo ee field tour ee intii uu socday aqoon-kororsiga ku saabsanaa Ka-qaybgalka iyo Isla-xisaabtanka Hay’adaha Miisaaniyadda ee Sharci-dejinta iyo Fulinta, ayaa xubnaha Xubnah Bulshada Rayidka Soomaaliyeed waxay booqasho ku tageen Xarunta Golaha Wakiillada Dowlad-goboleedka Galmudug ee magaalada Dhuusamareeb. Kulankaan ayaa soo qaban qaabisay daladda Somalia Non State Actors iyado loo maraaya GoleKaab

Xubnaha Bulshada Rayidka ayaa hoolka fadhiyada guud ee Golaha Wakiillada kula yeeshay kulan muhiim ah oo isugu jiray dood-wadaag, su’aalo iyo jawaabo, iyo is-dhaafsi aragtiyo dhinacyo badan leh. Sidoo kale, xubnaha waxaa la siiyey warbixin xog-ogaalnimo ah oo ku saabsan qaab-dhismeedka Golaha Wakiillada, qaybaha uu ka kooban yahay, xafiisyada iyo waaxyaha kala duwan, iyo howlaha iyo mas’uuliyadaha Golaha.

Kulanka waxaa sidoo kale qayb ka ahaa Senator Cabdixaakiin, oo magaalada Dhuusamareeb ku matala Golaha Aqalka Sare ee Galmudug, kaas oo ka qaybgalay booqashada iyo dood-wadaagga dhexmaray Golaha iyo xubnaha Bulshada Rayidka.

Ugu dambeyntii, xubnaha Bulshada Rayidka Soomaaliyeed waxay Golaha Wakiillada Galmudug uga mahadceliyeen sida wanaagsan ee ay ugu diyaarsanaayeen kulanka, su’aalaha, dood-wadaagga iyo wada-xisaabtanka, taas oo fursad u siisay bulshada rayidka ah inay si toos ah uga xog-ogaato howlaha iyo shaqada Golaha.

24/09/2026

, Dowlad-goboleedka Galmudug, Soomaaliya 24 Sebteembar 2026

Iyadoo laga duulaya aqoon-kororsigii ku saabsanaa Ka-qaybgalka iyo Isla-xisaabtanka Hay’adaha Miisaaniyadda ee Sharci-dejinta iyo Fulinta, oo ay soo qabanqaabisay Dalladda Ururrada Bulshada Rayidka Soomaaliyeed ayna hoggaamineysay daladda Somalia Non State Actors ayaa Maanta waxey booqasho shaqo iyo u kuurgalid ah ku tageen xarunta Maamulka Degmada Dhuusamareeb.

Wafdiga waxaa soo dhaweeyey Mayorka ahna Guddoomiyaha Degmada Dhuusamareeb, Mudane Cabdiraxmaan Cali Maxamed (Geedka Qorow), kaas oo xubnaha Bulshada Rayidka uga warbixiyey howlaha maamulka degmada, horumarka laga sameeyey magaalada iyo mashaariicda ka socda.

Xubnaha Bulshada Rayidka ayaa sidoo kale su’aalo iyo dood-wadaag la yeeshay Guddoomiyaha iyo agaasime-waaxeedyada kala duwan ee maamulka degmada, oo ay kamid yihiin Waaxda Maaliyadda iyo Dhaqaalaha, Waaxda Arrimaha Bulshada, Maamulka iyo waaxyaha kale. Wada-hadalladu waxay diiradda saareen adeegyada bulshada, horumarinta degmada iyo maamulka hoose.

Sidoo kale, xubnaha Bulshada Rayidka waxay booqdeen goobo kala duwan oo magaalada ah si ay ugu kuurgalaan mashaariicda adeegyada bulshada iyo howlaha horumarineed ee socda. Goobaha la booqday waxaa kamid ahaa Suuqa Weyn ee Dhuusamareeb, oo ay si wadajir ah u dhiseen Midowga Yurub iyo Maamulka Degmada Dhuusamareeb, kaas oo si rasmi ah loo furay sannadkii 2024, iyadoo dhismihiisa ay gacan ka geysatay NIS Foundation.

Wafdigu wuxuu sidoo kale booqday dhismayaasha cusub ee ka socda magaalada, oo ay kamid tahay Barxadda Magaalada Dhuusamareeb. Sida uu sheegay maamulka degmada, barxadda waxaa loogu talagalay inay noqoto goob ay bulshada isugu timaaddo, laguna qabto munaasabadaha, dabaaldegyada iyo isu-soo-baxyada nabadeed ee bulshada.

Booqashooyinkan waxay xubnaha Bulshada Rayidka u noqdeen fursad ay ku bartaan mudnaanta horumarineed ee degmada, ula falgalaan maamulka hoose, isla markaana u xoojiyaan ka-qaybgalka bulshada iyo isla-xisaabtanka maamulka deegaanka.

23/09/2026

, 23 Sebtembar 2026:

Xubnaha Korjoogtada Bulshada Rayidka Soomaaliyeed ee ka socda Somalia Non State Actors, iyagoo adeegsanaya Hindisaha Korjoogteynta Baarlamaanka ee GoleKaab, ayaa maanta kormeeray kulanka 18-aad ee Kalfadhiga 8-aad ee Golaha Shacabka ee Baarlamaanka Federaalka Soomaaliya. Kulanka waxaa shir guddoomiyey Guddoomiye Kuxigeenka Labaad ee Golaha Shacabka BJFS, Mudane Cabdullaahi Cumar Abshirow.

Ugu h**eyn Kooramka kulanka ayaa ku furmay 140 Xildhibaan. Kulanka ayaa lagu soo bandhigay laba soo jeedin ajende ku daris ah oo ku saabsanaa Qaraarka Golaha Wasiirrada ee khuseeya Agaasime Waaxeedyada iyo Shaqaalaha Dowladda, iyo qaybinta iyo ansixinta Hindise Sharciyeedka Maareynta Deegaanka.

Golaha Shacabka ayaa sidoo kale dhammaystiray Akhrinta Saddexaad ee Hindise Sharciyeedka Iskaashiga Garsoorka Caalamiga ah, iyadoo warbixinta uu soo bandhigay Guddoomiyaha Guddiga Garsoorka, Awqaafta iyo Arrimaha Diinta, Xildhibaan Cali Xaaji Daahir.

Mudanayaasha Golaha Shacabka ayaa ansixiyey Hindise Sharciyeedka Maareynta Deegaanka, iyadoo ay oggolaadeen 140 Xildhibaan, mana jirin cid diiday ama ka aamustay.

Sidoo kale, Golaha Shacabka ayaa cod ku laalay Qaraarkii dhawaan uu soo saaray Ra’iisul Wasaaraha Xukuumadda Federaalka Soomaaliya ee khuseeyey Agaasime Waaxeedyada iyo Shaqaalaha Rayidka ah ee Dowladda. Waxaa oggolaaday laalidda qaraarka 136 Xildhibaan, halka 2 Xildhibaan ay diideen, 2 kalena ay ka aamuseen.

Ugu dambeyn, Golaha Shacabka ayaa loo qaybiyey Akhrinta Labaad ee Hindise Sharciyeedka wax-ka-beddelka Sharciga Bankiga Dhexe Soomaaliya, Sharci Lr. 30 ee soo baxay 20-kii Abriil 2012-kii.