14/03/2026
Baraarujin: Afurinta Dadka Sooman (Tabaruc)
Bisha barakeysan ee Ramadaan waa bil khayr, naxariis iyo isu gargaar. Waa xilli ay muslimiintu isku caawiyaan oo ay u hiiliyaan dadka baahan. Mid ka mid ah camallada ugu fadliga badan bisha Ramadaan waa afurinta dadka sooman.
Nebigeena ﷺ wuxuu sheegay in qofkii afuriya qof sooman uu helayo ajar la mid ah kan qofka sooman, iyadoo aan waxba laga dhimayn ajarka qofka sooman. Sidaas darteed, afurinta dadka sooman waa fursad weyn oo lagu kasbado ajar badan.
Waxaan ugu baaqeynaa dhammaan dadka awooda leh inay ka qeyb qaataan tabaruca afurinta dadka sooman, si loo caawiyo dadka masaakiinta ah, barakacayaasha, iyo qoysaska aan awoodin inay si fudud u helaan afur. Tabarucaagu wuxuu noqon karaa cunto, timir, biyo, ama lacag lagu diyaariyo afur.
Aan wadajir uga shaqeyno samafal iyo walaaltinimo, si qof walba u helo farxadda afurka. Wax yar oo aad bixiso maanta waxay noqon kartaa sabab uu qof sooman ku farxo, adigana aad ku hesho ajar weyn.
“Qofkii afuriya qof sooman wuxuu helayaa ajarkiisa oo kale.”
Allaha naga aqbalo sadaqada iyo camalka wanaagsan.
