26/08/2025
BAAQ NABADEED
Ku: Dowladda Federaalka Soomaaliya iyo Dowlad Goboleedka Jubaland
Ka: Gedo Peace Network (GPN)
Anaga oo ah Gedo Peace Network (GPN), oo ah urur bulshada rayidka ah oo ka shaqeeya nabadda, dib u heshiisiinta iyo wadajirka bulshada Soomaaliyeed, waxaan si walaac iyo murugo leh ula soconnaa dagaalka iyo xiisadda ka dhex taagan Dowladda Federaalka Soomaaliya iyo Jubaland.
Waxaan aaminsannahay in dagaal iyo isqabqabsi aan marna lagu xallin karin khilaafaadka siyaasadeed iyo maamulka, balse wada hadal, is-afgarad iyo tanaasul ay yihiin furaha nabadda iyo midnimada qaranka Soomaaliyeed.
Haddaba, GPN waxa uu soo jeedinayaa:
In si degdeg ah loo joojiyo dagaalka iyo colaadda dhiigga badan ku daatay.
In labada dhinac miiska wada hadalka lagu soo celiyo, iyadoo la adeegsanayo hab dhexdhexaadin ah oo caddaalad iyo kalsooni ku dhisan.
In la ilaaliyo xuquuqda iyo badbaadada shacabka rayidka ah, gaar ahaan haweenka, carruurta iyo dadka barakacay.
In bulshada rayidka iyo ururada nabadeed, sida GPN, lagu daro dadaallada xal raadin si loo helo heshiis waara.
In la xusuusto in midnimada, wadajirka iyo nabaddu ay yihiin awoodda ugu weyn ee ummadda Soomaaliyeed.
Waxaan ugu baaqaynaa dhammaan dhinacyada in ay ka hormariyaan danta guud, kana fogaadaan hadal ama ficil sii hurin kara colaadda. Nabadda waa tiirka horumarka, waxaana ku celinaynaa in walaalnimada iyo wadahadalka lagu beddelo colaadda iyo dagaalka.
Gedo Peace Network (GPN) wuxuu diyaar u yahay inuu fududeeyo wada hadal iyo is-afgarad dhab ah oo u horseeda Soomaali oo midaysan, nabdoon, kana siman sinaanta iyo cadaaladda.
Wabilaahi Towfiiq
Gedo Peace Network (GPN)
Luuq – Gedo, Soomaaliya
