15/04/2026
April 15, 2026, Somaliland waxa ay xustay maalinta qaran-beerista dhirta iyadoo lagu maamuusay munaasibad si heer sare ah loo soo agaasimay oo lagu maamuusayay dadaalka joogtada ah ee uu dalku ugu jiro ilaalinta deegaanka iyo adkaysiga cimilada. Munaasibadan oo ay soo qaban qaabisay Wasaaradda Deegaanka iyo Isbedelka Cimilada JSL , ayaa waxa ka soo qayb-galay masuuliyiin ka tirsan xukuumadda, wakiilo ka socday bulshada rayidka ah, hay’adaha u dooda deegaanka, iyo dadweyne ka kala socday gobollada dalka.
Xafladan oo si heersare ah loo soo agaasimay ayaa waxa goob joog ka ahaa Madaxweynaha Somaliland Mudane C/raxmaan Maxamed C/laahi (Ciro) oo isagu hormuud ka ahaa beerista geedkii labaad. Madaxweyne Ciro ayaa khudbadiisa ku nuux nuuxsaday muhiimada ay leedahay soo celinta dhulkii xaalufka ahaa, la dagaalanka xaalufka iyo ilaalinta noolaha oo ah istaraatiijiyado muhiim u ah la dagaalanka isbedelka cimilada. Waxa kale oo uu qiray doorka muhiimka ah ee bulshooyinka, gaar ahaan dhallinyarada, ku leeyihiin u ololaynta dadaallada dhiraynta iyo joogtaynta dardargelinta mustaqbal cagaaran.
Wasiirka Deegaanka iyo Isbadalka Cimilada oo ay weheliyaan masuuliyiin kale ayaa ka waramay hiigsiga fog ee wasaaradu ku talagaly in sanadkasta lagu beero 600,000 oo geed oo dalka oo dhan ah.
Hindisaha ayaa ujeedadiisu tahay in la dhimo saamaynta saxaraha, hagaajinta tayada hawada, iyo in lagu taageero hab-nololeedyada iyada oo loo marayo dhaqamo saaxiibtinimo leh. Ololaha dhir beerista ee sanadkan ayaa diiradda lagu saaray noocyada asaliga ah iyo kuwa u adkaysta abaarta ee ku habboon cimilada gobolka.
wasaaradu waxay diyaarisay 400,000 oo lagu beero gobolada oo dhan, iyadoo bulshooyinka maxalliga ah ay si firfircoon uga qaybqaateen. Munaasibadan ayaa ahayd mid lagu xasuusanayo sida ay Somaliland ugu heelan tahay ilaalinta deegaanka iyo hamiga ay u qabto inay tusaale u noqoto waxqabadka cimilada iyo horumarka waara ee Geeska Afrika.
