CCSD المركز الثقافي

30/12/2025

30/12/2025

يسعدنا دعوتكم لحضور النسخة الثانية من Sudan 249 Gallery
برنامج فني–ثقافي وطني يهدف إلى إبراز التنوع الثقافي والفني السوداني، وتعزيز الوحدة والتعايش من خلال مساحة مفتوحة للفنانين والمجتمع المحلي.
📅 التاريخ:1/1/2026
📍 المكان: فندق الريح الطريفي
🕘 الزمن: 1:30 ظهرًا – 6:30 مساء
فعاليات اليوم تشمل:
🎨 عروض تراثية
🎭 عروض مسرحية
🎶 عروض غنائية وطنية وتراثية
👶 فعاليات للأطفال
🖼️ معرض فني
🎁مسابقات
كونوا جزءاً من يوم يجمعنا على حب السودان والفن ودعم الأصوات الشابة والناشئة.

25/12/2025

في المركز الثقافي للتنمية المستدامة يسعدنا ان نكون من شركاء Sudan 249 Gallery نسخة 2026
تأتي هذه الشراكة ضمن تحضيرات تقودها جمعية ارتاكا الفنية وبمشاركة تحالف يؤمن بالفن كمساحة جامعة للتعبير والاحتفاء بالهوية السودانية في تنوعها
تعكس مشاركتنا رؤيتنا في العمل المشترك وبناء مساحة فنية حية تعزز الابداع والتبادل الثقافي وقيم التعايش وتقبل الاخر
نثمن جهود جميع الشركاء ونتطلع الى تعاون مثمر يعزز دور الفن في بناء السلام والوعي والهوية

16/11/2025

اليوم العالمي للتسامح يذكرنا بأهمية احترام اختلاف الآخر المختلف. التسامح قوة داخلية تساعدنا على تجاوز الغضب واختيار الحكمة في هذا اليوم نجدد دعوتنا لبناء علاقات قائمة على الاحترام والدعم المتبادل ونبدأ بخطوات بسيطة مثل كلمة طيبة وتعامل هادئ ونظرة احترام لنقرب أنفسنا من عالم أكثر إنسانية

01/10/2025

🎀 Pink October
Early detection of breast cancer is a vital preventive measure that saves lives and reduces complications.
Let us spread awareness and encourage early screening for a healthier community



🎀 أكتوبر الوردي
الفحص المبكر لسرطان الثدي إجراء وقائي أساسي يسهم في إنقاذ الأرواح والحد من المضاعفات.
لننشر الوعي ونشجع على الفحص المبكر من أجل مجتمع أكثر صحة

29/09/2025

في حالة الإصابة بـ حمى الضنك أهم حاجة هي تعويض السوائل والعناصر الغذائية عشان نقلل خطر الجفاف ونساعد الجسم يتعافى

📍​الموية

لازم تكون بكميات كافية على مدار اليوم، ومعاها العصائر الطبيعية والشوربة لأنها بتعوّض الأملاح والطاقة البفقدها الجسم مع الحمى.

📍 ​ونأكل وجبات متوازنة عشان تقوي المناعة، مع مصادر بروتين زي اللحوم، البيض والبقوليات.

📍 بالإضافة للحبوب الكاملة والدهون الصحية.

التغذية السليمة دي بتدي الجسم طاقة وبتسرّع زمن التعافي من الأعراض

29/09/2025

🦟🚫 بالتجفيف الحمى تقيف
حمى الضنك بتنتشر بسرعة لأن البعوض الناقل بيتوالد في الموية النقية داخل وحول البيوت — في المكيفات، الأحواض، البراميل، الصهاريج، الإطارات وحتى الأواني البسيطة.
🦟🚫 لازم نحارب البعوض عشان نحمي نفسنا وأهلنا
لازم نجفف أماكن تراكم الموية: نقفل الحنفيات كويس، نجفف أي موية راكدة، ونزيل الحشائش خصوصاً حوالين البيوت المهجورة بسبب الحرب.
🦟🚫 لازم نحارب البعوض عشان نحمي نفسنا وأهلنا
لازم نفرغ أواني الحفظ، ننضفها بفرشاة أو سلك، نغطي البراميل بإحكام، نصرف الموية الراكدة من المكيفات، ونتخلص من الإطارات والعلب الفارغة. كمان مهم نجفف البرك ونعالج الكسور عشان ما تتجمع الموية.

28/09/2025

حمى الضنك مرض فيروسي.. وما عندو علاج محدد، لكن:
✅ البندول بكفي لتخفيف الحمى والصداع.
🚫 ما تستعملوا حقن أو محاليل وريدية إلا لو وصفها الطبيب.
🍲 الغذاء الكويس + الموية الكتيرة أهم دعم للمريض.
🚫 تجنبوا استعمال المسكنات زي البروفين عشان من يزيد من المضاعفات

27/09/2025

العالم الرقمي بقى جزء أساسي من حياتنا اليومية، وكلامنا فيه بقى عندو أثر كبير. بوست واحد ممكن يوصل لآلاف الناس: يا إمّا يبني ويا إمّا يهدم.
خطاب الكراهية في السوشال ميديا بينتشر أسرع من النار، لكن بنفس السرعة ممكن ننشر قيم التسامح والمحبة ونغير المزاج العام.

التعليقات السالبة بتكسر النفوس وتجرّح، لكن الكلمة الطيبة بتدعم وتبني. مسؤوليتنا كلنا نحافظ على منصاتنا نظيفة من التنمر، من الشتيمة، ومن أي خطاب كراهية.

الفضاء الرقمي محتاج وعي عشان يكون ساحة سلام، ما ساحة حرب. خلونا نستعمل الميديا للتعليم، للتنوير، ولربط الناس ببعض بخير. الرقمنة قوة حقيقية، ولو استخدمناها صح بتبني مجتمع متماسك. وسلام الإنترنت جزء لا يتجزأ من سلام المجتمع كله.🤍🕊️


#دبايوا
#إيتنينا
#اكوبام
#عافية

27/09/2025

يا جماعة ✋ الواجب علينا كلنا ..
التجفيف ما بس مسؤولية الحكومة.. دي مسؤولية جماعية.
لما نتعاون، البعوض ما بلقى محل يبيض فيه.
الواجب عليك ما تخلي موية راكدة في بيتك ولا في الحوش.
🪣 فرّغ الجردل، 🚰 نظّف الحيضان 🔒 غطِّي الخزان.
خلي بيتك نظيف، خلي حلتك نظيفة.. وبإيدينا نوقف حمى الضنك
نحن ندعو للتجفيف في كل مكان لمحاربة حمي الضنك
نحن نتضامن مع الحملة المجتمعية في الخرطوم وندعو الموجودين هناك للمشاركة فيها .. ساعد اتيام الحملة في الوصول لبيتك وبيت الجيران

26/09/2025

تجارب الشعوب حوالينا بتورينا إنو ما في نزاع أكبر من إنو ينحل بالحوار. في ناس اختاروا التسامح بدل الانتقام، وقدروا يبنوا مجتمعات أقوى وأكثر ترابط. القوة الحقيقية ما في السلاح، القوة في الكلمة الطيبة والعقول المنفتحة.

قصص النجاح بتدينا أمل، وبتفتح باب لمستقبل أفضل. حتى في بلدنا، شفنا مجتمعات أنقذها التسامح من الانقسام والتفكك. الناس البتعيش في سلام بتلقى نفسها أقرب للتعليم، للتنمية، وللاستقرار.

محتاجين نقرأ ونتعلم من تجارب التانيين، ما عشان نقلدهم، بل عشان نستفيد من دروسهم. السلام قرار، والقرار ممكن يغيّر حياة شعوب كاملة.🤍🕊️


#دبايوا
#إيتنينا
#اكوبام
#عافية

25/09/2025

الشباب هم روح البلد وطاقة المستقبل، هم البحددوا شكل بكرة، وهم القادرين يغيروا الواقع بسرعة.
لما الشباب يختاروا طريق الحوار بدل العنف، بيكونوا رسّخوا أساس لبلد أقوى وأجمل.

السلام ما كلام ساي، السلام ممارسة يومية، في الشارع، في الجامعة، وفي الشغل.
أصوات الشباب مسموعة، وأثرهم كبير، دورهم ما بس في المظاهرات أو النشاطات السياسية، بل في نشر التسامح وقبول الآخر بين أقرانهم.

البلد الما استثمرت في شبابها، ضيّعت فرصتها في مستقبل مستقر، لكن لما الشباب يتوحدوا حول قيم العدالة والتعايش، بيخلقوا خط دفاع قوي ضد أي فتنة، الجيل الجاي محتاج يشوف نموذج مختلف، شباب صانعين للسلام، وقدوة في المحبة والوعي.🤍🕊️


#دبايوا
#إيتنينا
#اكوبام
#عافية