https://www.facebook.com/401218816405411/

Sudanese Initiative for Medical Awareness-SIMA, Khartoum (2026)

22/10/2024

السلام عليكم 🤩
تم فتح باب التقديم لمديري الاقسام الطبيه ونواب مديري الاقسام الطبيه !
Directors & Deputy directors

اولاً لازم يكون المجال الطبي المتقدم ليو من تخصصك

ثانياً لازم تكون شغوف بالبحث عن الحقايق المثبته علميا ومن مصادرها

ثالثاً الخبره بتكتسب وأهم شي تكون عايز تضيف لي نفسك وزملاءك في المبادره ودايما متعطش للمعرفه

🔻🔻شير عشان تصل لأكبر عدد من طلاب وخريجي المجال الطبي

التقديم من الفورم ادناه
⬇️⬇️⬇️⬇️⬇️⬇️⬇️

https://docs.google.com/forms/d/e/1FAIpQLSfQbPDeCbGLJDKdl6lLl7BDZhXXvFsQo5eRqreIzRYKlCEThw/viewform

بالتوفيق للجميع
مع تحياتي
Sudanese Initiative for Medical Awareness-SIMA

06/10/2024

حُمى الضنك !
شايف الباعوضه الفي الصوره ؟
دي الزاعجه المصريه ناقل لفايروس حمى الضنك شنو حمى الضنك؟ تعالو معانا نعرف

حمى الضنك مرض فيروسي بينتقل عن طريق نوع معين من البعوض اسمه (البعوضة الزاعجة المصريه (Aedes aegypti) وده البعوض بنلقاه كتير في المناطق الحارة والرطبة زي معظم دول أفريقيا وآسيا وفي السودان في ولايات الشرق غالبا كسلا والقضارف وعدد من الولايات الشماليه . البعوض ده بيشتغل بنشاط في النهار وخصوصاً الصباح الباكر والمساء، لكن ممكن يلدغ بالليل برضو أحياناً.

الناقل

الزاعجة المصرية هي الناقل الرئيسي للفيروس، عشان لما تلدغ زول مصاب بتاخد الفيروس وتبدأ تنقله لزول تاني لما تلدغوه. الحاجة الغريبة في البعوضة دي إنها بتعشق المياه الراكدة البسيطة عشان تتكاثر فيها، يعني حتى الأزيار أو البراميل المفتوحة في البيت ممكن تكون مزارع ليها.

الإصابة

الزول ممكن يصاب بحمى الضنك لما تلدغو بعوضة مصابة بالفيروس. المرض ما بيتنقل من زول لي زول بشكل مباشر، يعني مافي عدوى بين الناس مباشرة، إلا لازم يكون في بعوضة ناقلة. الإصابة ممكن تكون بسيطة أو شديدة حسب مناعة الشخص، ولو الزول أصيب بي نوع معين من الفيروس ممكن بعد فترة يصاب بي نوع تاني لانو في اربعه انواع من الفايروس ، وده بيكون أخطر من الإصابة الأولى.

الأعراض

حمى الضنك أول حاجة بتبدأ بارتفاع شديد في درجة الحرارة، وبعدا بيجي معاها صداع حاد وآلام في العضلات والمفاصل، كأنك شايل حِمل تقيل. برضو الزول بيحس بألم في العيون وبتظهر عليه طفح جلدي بعد يومين أو ثلاثة. الأعراض دي بتستمر لمدة من يومين لحد سبعة أيام. يعني الزول بيبقى في حالة تعب شديد وما قادر يقوم.

المضاعفات

في حالات معينة، الحمى ممكن تتطور لي حالة خطيرة اسمها **حمى الضنك النزفية**. دي بيحصل فيها نزيف داخلي وانخفاض في عدد الصفائح الدموية، ودي الوضعية البتبقى خطيرة جدا. ممكن النزيف ده يظهر في اللثة، الأنف أو حتى في الأعضاء الداخلية. ولو ما تعالجت سريعاً ممكن تأدي للموت، خصوصاً في الأطفال والصغار أو الناس العندهم مناعة ضعيفة.

الوقاية

عشان تتفادى الإصابة بحمى الضنك، لازم تحارب البعوض ذاتو. أول حاجة تتأكد إنو ما في أي مياه راكدة في البيت أو حوالينو لأنو دي البيئة المثالية للبعوضة تتكاثر فيها. استخدم ناموسيات وقت النوم، خصوصاً للأطفال، واستعمل طارد البعوض. برضو البس هدوم تغطي جسمك كويس لو كنت في منطقة فيها البعوض كتير.

العلاج

للأسف، مافي علاج محدد لي حمى الضنك، لكن لما الزول يصاب بيها، العلاج بيكون على حسب الأعراض. يعني ممكن تاخد مسكنات للألم وخافضات للحرارة زي الباراسيتامول ( البندول)، لكن لازم تتجنب الأسبرين عشان ممكن يزيد النزيف. أهم حاجة الزول يشرب موية كتيرة وعصائر عشان يتفادى الجفاف. وفي الحالات الشديدة، المريض ممكن يحتاج دخول المستشفى للحصول على السوائل الوريدية والرعاية المكثفة.

باختصار، الوقاية أهم حاجة في التعامل مع حمى الضنك لأنو البعوضة ما بترحم، وكلما كنت واعي ومحارب لي بيئتها، كلما قللت من فرصة الإصابة.

Sudanese Initiative for Medical Awareness-SIMA

المصادر ؛-

https://www.who.int/news-room/fact-sheets/detail/dengue-and-severe-dengue

05/10/2024

لماذا سُمّي أكتوبر بالشهر العالمي للتوعية بسرطان الثدي؟

يعتبر شهر أكتوبر "الشهر العالمي للتوعية بسرطان الثدي"، وهو فرصة سنوية لرفع مستوى الوعي حول هذا المرض الذي يُعدّ من أكثر أنواع السرطان انتشارًا بين النساء على مستوى العالم. لكن لماذا تم اختيار أكتوبر تحديدًا؟ وما هي قصة تخصيصه لهذا الغرض؟

نشأة التوعية بسرطان الثدي:

في البداية، لم تكن هناك حملة عالمية موحدة تهدف إلى التوعية بسرطان الثدي. بدأت الفكرة في الولايات المتحدة في أوائل الثمانينيات حين بدأ التركيز على أهمية التوعية والكشف المبكر عن سرطان الثدي. وفي عام 1985، تم إطلاق أول حملة رسمية تحت مسمى "الشهر الوطني للتوعية بسرطان الثدي" من قبل **الجمعية الأمريكية للسرطان** بالتعاون مع شركة أدوية تهتم بصحة النساء. كانت الحملة تهدف إلى توعية المجتمع بأهمية الكشف المبكر والفحص الذاتي كوسائل للحد من تفاقم المرض.

اختيار شهر أكتوبر:

تم اختيار شهر أكتوبر نظراً لكونه فترة ملائمة للتركيز على قضايا صحية هامة قبل دخول فصل الشتاء وموسم العطلات. أكتوبر أيضاً يأتي بعد شهور الصيف حيث يمكن تكريس جهود مجتمعية وحملات توعوية منظمة على مستوى العالم. ومنذ عام 1985، أصبح أكتوبر شهراً تُطلق فيه العديد من الأنشطة والفعاليات العالمية المتعلقة بالتوعية بسرطان الثدي.

رمز الشريط الوردي:

(الشريط الوردي) الذي يرمز إلى التوعية بسرطان الثدي، ارتبط بشكل كبير بشهر أكتوبر. بدأ استخدام الشريط الوردي كرمز في أوائل التسعينيات بفضل حملة قادتها ناشطة أمريكية تُدعى (إيفلين لودر) التي أسست فيما بعد مؤسسة لدعم الأبحاث المتعلقة بسرطان الثدي. تم توزيع الأشرطة الوردية على نطاق واسع لجذب الانتباه إلى القضية.

أهداف الحملة:

أكتوبر ليس فقط لرفع مستوى الوعي، بل أيضًا يهدف إلى جمع التبرعات لدعم أبحاث السرطان، تقديم الدعم للمرضى الناجين من المرض، وتشجيع النساء على إجراء الفحص الذاتي والفحوصات الدورية مثل الماموغرام، مما يساعد على الكشف المبكر الذي يزيد من فرص العلاج الناجح.

أهمية التوعية في شهر أكتوبر:

في كل عام، تُنظم فعاليات ومؤتمرات وورش عمل توعوية في مختلف أنحاء العالم خلال شهر أكتوبر، تهدف إلى تثقيف النساء والمجتمع بشكل عام حول أهمية الوقاية والفحص المبكر. تشمل هذه الفعاليات إقامة حملات إعلامية، سباقات لجمع التبرعات، وإضاءة معالم مشهورة حول العالم باللون الوردي تضامناً مع الحملة.

تأثير الحملة:

منذ إطلاق حملة أكتوبر للتوعية بسرطان الثدي، ساهمت الجهود المتزايدة في زيادة نسبة الوعي والكشف المبكر، ما أدى إلى انخفاض ملحوظ في نسبة الوفيات بسبب سرطان الثدي في العديد من الدول. كما تم جمع مليارات الدولارات لدعم الأبحاث التي ساعدت في تحسين العلاجات ورفع فرص الشفاء.

الخلاصة:

سُمّي أكتوبر بالشهر العالمي للتوعية بسرطان الثدي نتيجة الجهود المكثفة التي بدأت منذ الثمانينيات لتثقيف النساء والمجتمعات حول هذا المرض وأهمية الكشف المبكر. بفضل هذه الحملات، أصبح شهر أكتوبر رمزًا عالميًا للصحة والتضامن مع النساء اللواتي يعانين أو نجون من هذا المرض، والشريط الوردي بات رمزًا عالميًا يذكرنا جميعًا بأهمية العمل الجماعي لمكافحة سرطان الثدي.
Sudanese Initiative for Medical Awareness-SIMA
المصادر :-

https://www.breastcancer.org/about-breast-cancer/breast-cancer-awareness-month

01/10/2024

كتير مننا بستخدم شفرات الحلاقه غلط ودا بعرضنا لي اخطار كتيره منها الجروح والتهييج وحتى الالتهابات الجلديه في المناطق دي
تعالو معانا نعرف كيف نحلق بي طريقه صحيه وصحيحه .

التحضير قبل الحلاقة
أهم حاجة تخسل المنطقة دي بمويه دافية عشان تنظف وتفتح المسام وده بيساعد الشفرة تمشي بسهولة وبرضو لو الشعر طويل عليك تقصرو بمقص عشان الشفرة ما تنسد وتتعرض للجرح

اختيار الشفرة المناسبة
لازم تستخدم شفرة جديدة وحادة القديمة ما بتنفع وبتزيد من احتمالية الجروح والأفضل تستخدم شفرات مخصصة للمناطق الحساسة عشان تكون ألطف على الجلد

استخدام كريم الحلاقة
كريم حلاقة مخصص للبشرة الحساسة او الصابون العادي للناس الما بتتحسس لأنو مرات بسبب جفاف وأوعى من رغوه صابون الغسيل ! وخت كمية كافية عشان الشفرة ما تحتك بالجلد كتير

تقنية الحلاقة
حلق مع اتجاه نمو الشعر ما عكسو (دي اهم نقطه) عشان تتفادى الحساسيه وتهيج الجلد أو ظهور الحبوب وبرضو ما تضغط على الشفرة خليها تمشي خفيفة واحلق على مراحل وحدة بوحدة عشان ما تتعرض للجرح

العناية بعد الحلاقة
بعد ما تخلص غسّل المنطقة بمويه باردة عشان تهدي الجلد وتقفل المسام وحاول تستخدم كريم مرطب بدون عطور عشان ما يحصل تهيج وخلّي المنطقة تتنفس شوي وما تلبس حاجة ضيقة طوالي.

Sudanese Initiative for Medical Awareness-SIMA

المصادر:-

https://www.aad.org/public/everyday-care/skin-care-basics/hair/how-to-shave

25/09/2024

كلهم إسيتامينوفين الا انتو ترامادول

08/09/2024

*اضطراب ما بعد الصدمه*
*Post trauma Stress disorder*
( PTSD )

_ اغلبنا سمعنا بيه تقريبا ف خلونا ناخد فكره عنه

بيحصل بعد ما يمر الشخص ب صدمه او عدد من الصدمات ، سواء كان جزء من الحدث او مجرد شاهد

بعد الشخص يتعرض للحاجه دي ، بياخد زمن انه يتعافى و يتعايش و دا طبيعي جدا ، بس لمن تبدا تظهر اعراض او الموضوع ياخد زمن و يؤثر عليه و على حياته اليوميه لوقت طويل هنا بنقول دا PTSD
و المرض ارتبط ارتباط وثيق بالحروب عموما ، سواء للجنود او المدنيين

( قدره تأثر الناس بنفس الحدث مختلفه جدا ف ما كل البتعرضوا لنفس الموقف بيصابوا او بتأثروا بنفس المقدار )

_تشخيصه عنده معيار بعتمد على وجود الاعراض ومنها
الاكتئاب
الشعور بالذنب
الارق
نوبات العضب
ذكريات مزعجه عن الحدث
كوابيس حول الحدث
استعاده الذاكره للحدث ( كانه بيحصل اول مره )
التهرب من المحفزات المرتبطه بالحدث
و غيرهم

_العلاج

مبدئيا لو حسيت انك مصاب او بتعاني من الحاجه دي ، ما تتردد ابدا في اخد خطوه الاستشاره و العلاج

العلاج اساسه المساعده على التخطي و التعايش ، و الحد من الاعراض الذكرناها ، بيشمل :
التثقيف النفسي اولا - عشان يعرف المريض و يفهم اعراضه دي شنو و بتجيه لي
العلاج النفسي ( العلاج السلوكي المعرفي وفيه اساليب كتيره زي العلاج بالمواجهه او التعرض )
الى جانب العلاج الدوائي زي مضادات الاكتئاب

" تعلمنا أن الصدمة ليست مجرد حدث وقع في وقت ما في الماضي؛ إنها أيضا البصمة التي تركتها تلك التجربة على العقل والدماغ، والجسم "
جسمك يتذكر كل شيء . د. بيسيل فان

Sudanese Initiative for Medical Awareness-SIMA
المصادر :-

https://ar.m.wikipedia.org/wiki/اضطراب_الكرب_التالي_للصدمة_النفسية
https://www.mayoclinic.org/ar/diseases-conditions/post-traumatic-stress-disorder/
symptoms-causes/syc-20355967

31/08/2024

الحياة تحترق !

هل نحن في طريقنا إلى العصر الحجري؟
ماهي الأسباب للعودة لاستخدام الحطب؟

الشجرة هي مصدر الحياة فلتر طبيعي للغازات الملوثات بثبت التربة وتقلل من الانجزاف تساهم في إنتاج الأوكسجين لكن وبسبب انقطاع الغاز والكهرباء لفترات طويلة في مناطق مختلفة من السودان وبسبب فقدان المواطنين منازلهم كان في حوجة الوقود واكيد اقرب مصدر هو الحطب من الغابات والاشجار المحيطة بالمنطقة.

هل كان للمواطن حق الاختيار؟

قامت مليشيات الدعم السريع بإهمال حمايه الغابات والمحميات الطبيعيه في المناطق التحت سيطرتها ومع انعدام الوقود وأنابيب الغاز وانعدام الاداره الغابيه وحرس الغابات التابعه للدوله اصبحت الغابات في ايدي المواطن المحتاج بدون ضرابت سليمه لقطع الاشجار بغرض الاتجار في الفحم والحطب والأمر دا يعتبر كارثة حقيقية.
من ناحية اقتصادية ماف اي سبيل لتوفير الوقود بالنسبة للمواطنين بسبب سوء الأوضاع وبالتالي استمرار عمليات القطع الجائر ذات العواقب الوخيمة في النهاية.

طيب ممكن تورينا اضرار استخدام الحطب؟
الاضرار الصحية

-يسبب أضرار صحية خطيرة ومتنوعة على الإنسان و يؤدي إلى تفاقم أمراض الرئة

-التعرض لدخان الخشب المحترق يحدث تلوث الجسيمات الدقيقة بجسم الإنسان سواء أكان التعرض لمدة طويلة أو قصيرة

-يسبب الإصابة بنوبات الربو والالتهاب الحاد في القصبات الهوائية وأمراض الجهاز التنفسي.

الأخطار البيئية

-يزيد من خطر الزحف الصحراوي والعواصف الرملية في تلك المناطق.

-صعود غاز تاني اكيد الكربون والابخرة السامة مما يسبب تلوث الهواء

-فقدان التربة لخصائصها مما يقلل من الإنتاجية الزراعية في الأراضي المقطوعة

- تشويه المنظر العام وإتلاف الثروة الغابية

طيب هتقول لي هم مابيدهم حاجة مااختارو انهم يستخدموا الحطب دي ظروفهم.
ودا كلام صحيح نحن لما نحكي مشكلة اكيد لازم نتطرق للحل وعشان نتطرق للحل بصورة اوسع استنو البوست الجاي وهنتكلم عن طريقة القطع الصحيحة بدون قتل الشجرة بصورة كلية اذا كان لابد من انو نقطع يبقا نتعلم نقطعها صح وبضوتبط معينه

Sudanese Initiative for Medical Awareness-SIMA
المصادر:-

https://www.independentarabia.com/node/562671/%D8%B3%D9%8A%D8%A7%D8%B3%D8%A9/%D9%85%D8%AA%D8%A7%D8%A8%D8%B9%D8%A7%D8%AA/%D8%A3%D8%B2%D9%85%D8%A9-%D8%BA%D8%A7%D8%B2-%D8%AA%D8%AF%D9%81%D8%B9-%D8%B3%D9%83%D8%A7%D9%86-%D8%A7%D9%84%D8%AE%D8%B1%D8%B7%D9%88%D9%85-%D9%84%D9%82%D8%B7%D8%B9-%D8%A7%D9%84%D8%A3%D8%B4%D8%AC%D8%A7%D8%B1-%D9%88%D8%AD%D9%85%D9%84-%D8%A7%D9%84%D8%AD%D8%B7%D8%A8

https://alkhadraasy.com/category/%d9%86%d8%b4%d8%a7%d8%b7%d8%a7%d8%aa-%d8%a7%d9%84%d9%85%d8%a4%d8%b3%d8%b3%d8%a9/

30/08/2024

دقيقه دقيقه تعال أسألك سؤال صحي بسيط
انت بتشرب كم كبايه مويه في اليوم ؟
يمكن ما تكون عارف الجواب الدقيق بس خت ليك متوسط وتعال معاي

الموية بتشكل حوالي 60% من جسم الإنسان البالغ، وهي ضرورية عشان الجسم يشتغل كويس. شُرب كمية كافية من الموية يوميًا مهم جداً عشان تحافظ على صحتك، لأن لو جسمك نقص من الموية ممكن يحصل ليك مشاكل كبيرة. الاحتياج للموية بيختلف من زول لزول حسب العمر، النوع، ومستوى النشاط. وبصفة عامة، الرجال محتاجين يشربوا حوالي 3.7 لتر في اليوم ما يعادل 15 كبايه مويه والنساء حوالي 2.7 لتر.ما يعادل 12 كبايه مويه
بتزيد او بتنقص بتغير الجو والنشاط وكدا

فوائد شرب الموية شنو ؟

1.تحسين الهضم

شرب الموية بيساعد في عملية الهضم وبيمنع الإمساك، لأن الموية بتلين البراز وبتخليه يتحرك بسهولة في الأمعاء.

2. تنظيم حرارة الجسم

الموية بتساعد في تنظيم حرارة الجسم عن طريق التعرق، ودا بيبرد الجسم لما تكون الحرارة عالية.

3. تحسين صحة الجلد

الموية ضرورية عشان تحافظ على رطوبة الجلد، ودا بيساعد في تقليل التجاعيد ومنع الجفاف.

4. دعم وظائف الكلى

شرب الموية بيساعد الكلى في إنها تتخلص من الفضلات والسموم عن طريق البول، وبيقلل من خطر تكون الحصاوي.

5. زيادة الطاقة والتركيز

الجفاف بيأثر على الدماغ وبيخليك تحس بالتعب وتقلل من تركيزك. شرب الموية بكميات كافية بيساعدك تكون نشيط ويعزز الأداء العقلي عشان كدا شيل قاروره مويه معاك الامتحان.

6. المساعدة في فقدان الوزن

شرب الموية قبل الأكل ممكن يساعدك تقلل شهيتك، ودا بيساهم في تقليل كمية الأكل اللي بتاكلها ويساعدك في فقدان الوزن.

في ناس ممكن يقولوا ليك بننسى نشرب موية في طريقة ممكن تساعدكم يلي هي انت تخت الحفاظة في مكان واضح مثلا
_جمب التلفزيون_جمب باب البرندة مثلا _مكان بتمر بيه كتير في البيت المهم مكان واضح دا بخليك تتذكر

شرب كمية كافية من الموية يوميًا ما بس ضروري عشان تعيش، بل هو عامل مهم جداً لتحسين صحتك العامة ورفع مستوى حياتك. لازم الناس تعرف أهمية شرب الموية وتتبع النصائح عشان تلبي احتياجات جسمها.
Sudanese Initiative for Medical Awareness-SIMA
المصادر :-

https://www.medicalnewstoday.com/articles/290814

29/08/2024

جدري القرود
(نوع تاني من انواع البرجم)

تقريبا كلنا بدأنا نسمع بيه في الفتره دي
مرض يسببه فيروس جدري القرده MPXV
بسبب طفح جلدي عام و اعراض تانيه حنتكلم عنها

بنتشر عن طريق شنو ؟
المخالطه ( زيه زي العديد من الفيروسات )
لمس الحيوانات المصابه ( سواء اثناء الصيد او عند الطبخ ! )

سهوله طرق انتشاره هي السبب في تفشيه
و البتخلي انه انتقلاه يتم بسرعه

طيب اعراضه :
طفح جلدي ( مؤلم )
تضخم للغدد الليمفاويه
الحمى
التهاب الحلق
الصداع
الام العضلات
الام الظهر
الوهن

و دا على سبيل الذكر
الاعراض دي بتظهر في خلال اسبوع لكن ممكن تاخد من يوم الى 21
و بتستمر لمده اسبوعين او اربعه
و للناس العندهم ضعف مناعه حتاخد زمن اطول
غير انه ممكن يتسبب في مضاعفات كتيره
زي تلف الجلد ، التهاب الدماغ / القلب ، العمى و للاسف ممكن تصل للموت

بتم تاكيد الاصابه بالفحص النووي

بيعالج عن طريق الرعايه الداعمه و اخد اللقاحات الى جانب منع المضافات اللي اتكلمنا عنها

نقلا عن منظمه الصحه العالميه ( بدءا من سبتمبر/ 2023، ارتفعت حالات الإصابة بجدري القرود جمهورية الكنغو ، وسجّلت الكونغو في العام 2024 فقط أكثر من 14 ألف حالة إصابة، و511 حالة وفاة، وانتشرت السلالة المكتشفة حديثًا في بلدان إفريقية مجاورة. وفي 7 أغسطس 2024 أعلن المدير العام لمنظمة الصحة العالمية ، استدعاء لجنة خبراء بشكل طارئ لتقديم المشورة بشأن ما إذا كان ينبغي إعلان تفشّي فيروس جدري القرود "إمبوكس" حالة طوارئ دولية بعد انتشاره الواسع في إفريقيا )

المصادر :-

‏ https://www.who.int/ar/news-room/fact-sheets/detail/monkeypox
‏https://ar.m.wikipedia.org/wiki/جدري_النسناس

23/08/2024

نداء السماء إلى الخلايا

حصل سمعت عن ثقب الأوزون؟
عارف الأضرار الصحية الناتجة عن تسرب الأشعة فوق البنفسجية؟

اولا ياعزيزي خلينا نتعزف على الأوزون هو غاز مكون لطبقة في الغلاف الجوي في منطقة "ستراتوسفير" وغاز الاوزون يتكون من ثلاث ذرات من الأكسجين (O3) ومهمتها امتصاص جزء كبير من الأشعة فوق البنفسجية يعني حاجة كدا زي الشمسية بتحجب عننا الإشعاع الضار.

طيب الحصل ليها شنو واتقدت كييف؟
في زول اسمو جو فورمان ‫اكتشف الثقب من محطة هالي باي البريطانية في قارة إنتركتيكا وبعدها كتب الخبراء في مجلة "نيتشر" أنو معدلات الأوزون تغيرت بصورة مخيفة ودا تسبب في هزّ المجتمع العلمي ورجال السياسة يعني حصلت جوطة شديدة.

طيب من السبب شنو؟
في النهاية اكتشفو انو السبب هو مركبات الكلورفلور كربون لانها بتتفاعل مع غاز الأوزون وتسببت مشكلة كبيرة بعدها عملو مؤتمر كبير اسمو قمة مونتريال وتم حظر المركب دا بصورة جزئية في البداية لحد ما اتحظر بصورة نهائية وبعدها ماكميتو في الغلاف الجوي قلت ووصلت نسبة بسيطة الحمد لله.

طيب لي الجوطة دي كلها هل الموضوع دا خطير للدرجة دي ولا دلع خواجات ساكت؟
الموضوع أخطر مما تتصور ياعزيزي انت عارف انو من اضرار الأشعة فوق البنفسجية
-يؤدي التعرض لها إلى مخاطر صحية زي الحروق الجلدية.
سرطان الجلد
-التهاب القرنية والمياه البيضاء (كاتاراكت) وإضعاف المناعة.
-يمكن للأشعة فوق البنفسجية أن تلحق الضرر بالحمض النووي.

العالم مترابط جدا اشعة جاية من خارج الغلاف الجوي ممكن توصل لحد حمضك النووي وتدخل جوا تركيب جسمك عشان كدا حماية البيئة من حماية نفسك واسرتك حافظ على كوكب الأرض لحياة صحية وأكثر جمالا

المصادر :-

https://www.google.com/url?sa=t&source=web&rct=j&opi=89978449&url=https://www.webteb.com/articles/%25D8%25AA%25D8%25A7%25D8%25AB%25D9%258A%25D8%25B1%25D8%25A7%25D8%25AA-%25D8%25AE%25D8%25B7%25D9%258A%25D8%25B1%25D8%25A9-%25D9%2584%25D8%25AB%25D9%2582%25D8%25A8-%25D8%25B7%25D8%25A8%25D9%2582%25D8%25A9-%25D8%25A7%25D9%2584%25D8%25A7%25D9%2588%25D8%25B2%25D9%2588%25D9%2586_17319&ved=2ahUKEwiwp_6Ty4uIAxVTVaQEHUzKDHUQFnoECA8QAQ&usg=AOvVaw1NvALhnAp3DCAgVhADV1OL

https://www.google.com/url?sa=t&source=web&rct=j&opi=89978449&url=https://www.un.org/ar/climatechange/preserving-the-ozone-layer&ved=2ahUKEwiwp_6Ty4uIAxVTVaQEHUzKDHUQFnoECBgQBQ&usg=AOvVaw3ToewAypWS0i5ShU48z-M9

20/08/2024

السلام عليكم متابعين المبادره السودانية للتوعيه الصحيه
الليله ح نقطع الشك ونرتب ليكم المأكولات السودانيه على حسب القيمه الغذائيه

عشان نفهم قبل نرتبهم شنو نظام السعرات الحراريه ؟

السعرات الحرارية هي وحدة قياس للطاقة (العمله بتاعه الجسم للطاقه) اللي الجسم بيحتاجها عشان يشتغل بشكل صحيح
لما ناكل جسمنا بيحرق السعرات الحرارية دي عشان يوفر الطاقة اللازمة للحركة والهضم وحتى التفكير الأكل اللي فيهو سعرات حرارية أكتر بيدينا طاقة أكتر
لكن لو أكلنا فوق حاجتنا الجسم بيحول الفائض لدهن عشان كدا ضروري ننتبه لكمية السعرات الحرارية اللي بنستهلكها ونوازن بين الأكل والنشاط البدني وحوجه الجسم

**ترتيب المأكولات من الأقل للأعلى في السعرات الحرارية**

4 الرغيف السوداني(المرتبه الرابعه)

السعرات الحرارية حوالي 100-120 سعرة حرارية لكل 100 غرام
الرغيف السوداني أقلهم في السعرات الحرارية وبيتصنع من دقيق القمح

3 القراصة (المرتبه الثالثه)

السعرات الحرارية حوالي 120-150 سعرة حرارية لكل 100 غرام
القراصة سعراتها الحرارية أعلى شوية من الرغيف وبتتعمل من دقيق القمح أو الذرة

2 الكسرة(المرتبه الثانيه)

السعرات الحرارية حوالي 240-280 سعرة حرارية لكل 100 غرام
الكسرة فيها سعرات حرارية عالية لأنها بتتعمل من دقيق الذرة المخمر وبتدي طاقة كويسة

1 العصيدة( المرتبه الأولى)

السعرات الحرارية حوالي 250-300 سعرة حرارية لكل 100 غرام
العصيدة هي الأعلى في السعرات الحرارية لأنها غنية بالكربوهيدرات وبتدي الجسم طاقة كبيرة.

تابعو الصفحه
Sudanese Initiative for Medical Awareness-SIMA

20/08/2024

السلام عليكم متابعين المبادره السودانيه للوعي الصحي الليله ح نتكلم عن عدم تحمل اللاكتوز
ودي واحده من المشاكل الطبيه المربوطه بي هضم اللبن ومشتقات الالبان وبتفسر ليه في ناس بتضايق الالبان بطنهم
وبتقلبا

شنو هو اللاكتوز ؟

اللاكتوز ده عبارة عن نوع من السكر الموجود في اللبن ومنتجاته زي الجبنة والزبادي. عشان الجسم يهضم اللاكتوز كويس، محتاج إنزيم معين اسمه "اللاكتاز" ده وظيفته إنه يكسر اللاكتوز ويخليه سهل الهضم. بعض الناس في السودان، وحول العالم، ما عندهم كمية كافية من اللاكتاز في جهازهم الهضمي، وده بيخليهم يواجهوا صعوبة في هضم اللاكتوز. لما اللاكتوز ما يُهضم بشكل صحيح، بيمشي على طول للأمعاء الغليظة، وده بيعمل مشاكل زي الانتفاخ، الغازات، وتكون حتى في ناس بتحس بألم في البطن وبيحصل ليها إسهال.

أعراض عدم تحمل اللاكتوز ممكن تظهر من 30 دقيقة لحد ساعتين بعد ما تاكل أو تشرب حاجة فيها لبن. الأعراض دي بتختلف من شخص للتاني، يعني في ناس ممكن بس تحس شوية انتفاخ وناس تانية تعاني من إسهال شديد.

في السودان، الموضوع ده ممكن يكون متعب جداً لأنو اللبن ومنتجاته جزء كبير من نظامنا الغذائي. لكن في حلول لو كنت بتواجه مشكلة دي. أول حاجة ممكن تقلل كمية منتجات الألبان اللي بتاخدها، أو تجرب منتجات خالية من اللاكتوز زي اللبن الخالي من اللاكتوز أو حتى الحليب النباتي زي حليب اللوز أو الصويا. كمان في أقراص إنزيم اللاكتاز دي ممكن تاخدها قبل ما تأكل حاجة فيها لاكتوز عشان تساعد جسمك يهضم اللاكتوز بشكل أفضل.

الأهم من ده كلو إنك تكون واعي لجسمك، لو لاحظت إنك كل ما تشرب لبن أو تاكل جبنة بتحس بأعراض زي الانتفاخ أو المغص، لازم تفكر إنه ممكن تكون ما بتتحمل اللاكتوز وتبدأ تشوف الخيارات اللي تناسبك عشان تحافظ على صحتك.

Sudanese Initiative for Medical Awareness-SIMA

المصادر

https://www.mayoclinic.org/diseases-conditions/lactose-intolerance/symptoms-causes/syc-20374232

Sudanese Initiative for Medical Awareness-SIMA

22/10/2024

06/10/2024

05/10/2024

01/10/2024

25/09/2024

08/09/2024

31/08/2024

30/08/2024

29/08/2024

23/08/2024

20/08/2024

20/08/2024

Address

Website

Alerts

Shortcuts

Share

Category