04/07/2026
لما كنت عريس وأنا في شهر العسل قاعدين نتفرج على مقطع كوميدي في تلفوني مع زوجتي
فجأة جاتني رسالة مكتوب فيها (كيف حالك يا حبيبي)
والرسالة من (نور)
طبعاً الرسالة لما تظهر في الشاشة بتروح بعد ثواني
لكن حسيت بالثواني دي كأنها ساعات 😂
فجأة ساد الصمت كأنو في مطرة كانت صابة ووقفت
وظهرت في وشها علامات الاستغراب والاستهجان والادانة 😂
لكن في الحقيقة أنا بريء براءة الذئب من دم ابن يعقوب
بالرغم من براءتي فجأة حصل لي Error في مخي وغلبني التصرف
لأنو رسائل زي دي خربت بيوت
أنا بريء لأن الرسالة جاية من زميلي في الشركة مصري اسمه (نور الدين) وهو كاتب في الفيس بوك (نور) والمصريين بقولوا كلمة (حبيبي) عادي
لكن نحن السودانيين بنتحرج من الكلمة
على كل حال لو قلت ليها دا راجل ما بتصدق عشان كدا فتحت الماسنجر قدامها وقعدت أراسله عادي (مرحب بيك يا نور الدين... كيف حالك وكيف حال زوجتك وعيالك)
ورد علي وبارك لي
عندها تنفست الصعداء وقالت (دا صاحبك؟!!!)
قلت ليها أيوه دا زميلي في الشغل مصري
وقالوا إن المصائب لا تأتي فرادى
بعد يومين معانا عامل بنغالي اسمه (إقبال) اتصل علي ووقتها كانت زوجتي ماسكة تلفوني تشاهد
قالت لي هاك في واحدة اسمها إقبال بتتصل عليك
قلت ليها دا راجل وفتحت الاسبيكر عشان تسمع صوتو
قالت لي ليه راجل واسمه اسم بت
قلت ليها البنغالة عادي الرجال بسموا أسماء بنات
قبل ما اتزوج ما كنت مقتنع براجل بخاف من مرتو
لكن اكتشفت إنو الراجل ما بخاف منها بخاف من المشاكل عشان يعيش في هدوء
قالوا المرا عاملة زي الكهرباء لو عاملتها بلطف تنور ليك حياتك ولو عاملتها بخشونة تكهربك
الحمد لله حتى الآن ما حصل اتكهربت
