03/02/2026
استيفن هوكينز
قول أبستين جاب ليك قاصرات..
أها، وبعد داك؟؟
إلا يعصرن ليك قدومك الزي حجر الطاحونة ده....
عمك نصُر دنقلاوي سواق إسعاف في وزارة الصحة، ساكن عزابي في حلتنا مع كورجة دناقلة. زول تشطيبة هالك.. وقديم أقدم من سنسنة الكِسرة.. نضارات نظر بقزاز تخين وبعد ده ما بشوف اكتر من ستة سبعة خطوات، بالليل مافي شوف مافي زفت، جلابية مهربدة وشال فلسطيني اسود بأبيض.. شنب كم شعرة طوال كده بالجنبات وفي النص دلجة.. وبس.
يقيف قدام باب البيت الجالوص المكعكع؛ اي توب ملون يجي قاطع في مرمى نظرو طوالي يصرف ليهو:
مساع الخير يخواننا.. إلاهي سيدي. ويللا.. يمشي في خترات التوب ده لغاية يكحل توب تاني جايي في الإتجاه المعاكس، يروح صارف ذات الحنك: مساع الخير يخواننا.. إلهي سيدي. وبوووو خلف دور.. يقطر التوب الجديد.. وهكذا وهكذا وهكذا.
شغال هكذا لغاية المغربية، بعد ما العيون كشافاتا تطفي.. حتن يخش البيت. ...
يعني النصيبة أبستين ده صاط ليكم الدنيا بعود نيم قديم.
حاشية خاصة بالقراء الحناكيش:
السَّنسَنَه: هي طرقة الكِسرة، المصنوعة من دقيق "الفيتريتة"/ الذرة الحمرا، وكذا يجوز تتقال لأي طرقة كسرة أو فطير من طرف إذا كان أخدت زمن اكتر من اللازم في الصاج أو الدوكة.. تقوم هذه الطرقة تنجض شديد، يعني "تتحمر" وينقلب لونها مايل للحمرة، وتبقى لذيذة مقرمشة.. موت أحمر بس.
وفي ذلك تقول الاهزوجة الشعبية الماخودة من "حجوة فاطنة السمحة":
يا القمره.. يا القمره
أقلبي السنسنة الحمره
شوفي ابويا وين ما جا.
لسان سوداني اصيل
@أبرز المعجبين
