God's Power Church

30/03/2024

*IJAMBO RY'IMANAMURI GOD'S POWER CHURCH GATENGA *Kuwa gatanu 29 Ukwezi kwa gatatu (Uwa gatanu wera) Yohana 19.17-30 Ikib.2 asohoka yiyikorereye umusaraba* (17):

▶️ Yesu yari atangiye urugendo rukomeye rwagombaga kumugeza aho yari bubambirwe. Rwari urugendo rurimo imibabaro myinshi harimo iy'umubiri utaretse niy'amarangamutima. Yikoreye umusaraba uremereye ku buryo byabaye ngombwa ko abasirikare bategeka Simoni w'Umunyakurene kuwumwakira

▶️ *( Luka 23.26)* Yesu yahuye n'ibibazo by'inzitane byarimo: 1. Kubambwa hamwe n'inyota nyinshi yagize (28). 2. Kurenganywa nyamara uwahamwe n'ibyaha akarekurwa (18.40). 3. Kubona abigishwa be n'abo yagiriye neza bamutererana

▶️ *(Mat 26.56). 4. Kubona akababaro nyina Mariya yari afite (25). Nubwo byari bikomeye bityo ntibyamubujije gutanga ibisubizo ku bari bakeneye guhumurizwa (26-27). Yesu ni igisubizo ku bamwizera. *Acurika umutwe umutima uraca* (30b): Urupfu rwa Yesu rwari rwarahanuwe mbere, ibyabaye ku munsi w'urupfu we Yesaya yari yarabihanuye

▶️ ( *Yes.53.12*). Uyu munsi ukubera uwo kwibuka ko Yesu yapfuye kubw'ibyaha byawe.

*Gushima*:

▶️ Shima Yesu ko yakurokoye kandi ujye ukomeze kumwizera.

Rev Pastor Niyitegeka Simeon

07/07/2022

Ujye unyigisha guhitamo neza no kumenya ubwenge, Kuko nizera amategeko yawe.
(Zaburi 119:66)

24/10/2020

ICYIGISHO CYO KUWA 24/10 /2020 MURI God's Power Church

Ndagusabye icyi cyigisho ucyiteho kandi cyigire aho cyigukura naho cyigusiga Uwiteka agushoboze kubyumva neza

UZWIHO INEZA CYANGWA INABI?

Fil 4:5
Ineza yanyu imenywe n'abantu bose, Umwami wacu ari bugufi.

Kimwe mu bintu bitumye isi iba mbi, ni inabi y'abayituye.

Birababaza cyane.
a. Umuntu kubwira undi nabi kandi nta nabi yamugiriye. Hari abantu benshi ndetse bitwa ko ari n'abakristo, bavuga nabi kandi bagakora ibibi bitewe n'inabi babamo.
b. Hari ho n'igihe abandi bo bakora nabi ntibanamenye ko bakoze nabi, wababwira ko bakoze nabi ntibanabyemere kuko nta neza bigeze kumenya...

Ese wabwirwa niki ko ukora nabi?
- Ibyo abantu bakuvugaho byerekana uko bagufata niba ari neza cgw nabi.
- Inshuti zawe nazo zerekana uko uteye mu bantu, niba utanireba reba inshuti zawe, niba uzigaya umenye ko ariko uri.
- Tega amatwi umutima nama wawe. Umutima wawe ujya uvuga ukuri, iyo rero uwuteze amatwi urakubwira.
- Kwimenyaho n'inkomoko yawe, abantu benshi bagira nabi bitewe n'aho barerewe. Kuko bahuye n'ibikomere by'inabi bituma baba nabi bakabiba inabi bityo bakagorana.

Ineza ni yo ikenewe muri wowe uko byamera kose!
I. Ntugira ineza kuko abantu bakugiriye neza, ahubwo kuko uri muri Kristo umwami w'ineza.
II. Ineza ni yo yerekana ubugwaneza bukomoka muri Kristo Yesu umuntu aba abereyeho.
III. Ineza ni yo igutera gukundwa imbere y'Imana n'abantu...

Nigute wamenywaho ineza gusa?
1. Gutega amatwi no gusesengura ibyo umuntu ashaka kuvuga mbere yo gusubiza,
2. Kwitoza kubabarira abagukomeretsa nk'uko ibyanditswe bivuga.
3. Kwemera ibyo ushoboye no guhakana hakiri kare ibyo udashobora.
4. Gutwara inabi imbere y'Imana nk'umutwaro wo gusengera mu kwiyiriza ubusa no gusenga.
5. Kwemera gukosorwa igihe umuntu akubwiye ati ukoze nabi.
6. Kwirinda kwivanga no gutinda ku bintu bituma uvuga nabi.
7. Kwitandukanya n'abatizera kuko bashobora kugushora mu ngeso mbi bigatuma uba mubi...

Gusa muri byose kuko twabaye babi bijya bigorana gukora neza, ariko kandi iyo ugambiriye gukora neza, Imana iragushoboza...

Mwami undanduremo inabi yose, umpindure intumwa itwaye ineza y'ubwami mu kubaho kwanjye kwa buri munsi, ni mu izina rya Yesu Kristo nsenze, Amen.

12/10/2020

ICYIGISHO CYO KUWA 12/10 /2020 MURI God's Power Church

IBYASEZERANIJWE BIBONERWA MU KWIZERA YESU KRISTO GUSA!

Gal 3:22
Ariko ibyanditswe bivuga yuko byose byakingiraniwe gutwarwa n'ibyaha, kugira ngo abizera bahabwe ibyasezeranijwe, babiheshejwe no kwizera Yesu Kristo.

Kuva Adamu amaze gucumura, ibyaremwe byose byarahindanye, byaranduye ndetse ibyanditswe byera byerekana ko byose aho biva bikagera bitwarwa n'ibyaha.

Kubera ko isi yahindanyijwe n'ibyaha, nicyo cyatumye Imana isezeranya abantu isezerano muri Aburahamu, kandi iryo sezerano ni Kristo Imana iha uwizera wese kugira ngo ahabwe ubugingo.

Bityo rero!
1. Uburyo bwo guhunga ibyaha bubonerwa mu irembo Imana icira abantu, nta muntu wakwicira inzira ngo ayibone.
2. Nta rindi rembo ryo gusohoka mu isi y'icyaha keretse Yesu Kristo.
3. Kugira ngo umuntu wese abashe kwinjira muri Kristo Yesu bizamusaba kwizera ko Yesu ariwe Kristo kugira ngo Imana ihimbazwe.
4. Umuntu wese utari muri Kristo Yesu arabura ku mwizera, kandi kuba atizera arabura kumwumva, Kuba bataramwumva barabura ubamubwira.

Ikigaragara ni uko ibiriho byose biri munsi y'ubutware bw'icyaha kubera ko umuntu yahindutse icyaha, bizongera gutungana ubwo umuntu azaba atakiri munsi y'ubutware bw'icyaha.

Uburyo bwifashishwa ni ukwizera Yesu Kristo, si uko akuraho ibyaha ahubwo ni uko agukura mu byaha.

NB. (Yesu ntakuraho ibyaha akura abamwizera muri byo)

Mwami, ntitwakoze ibyaha ahubwo twavutse turi ibyaha. Unsohore muri byo, unshorere mu kwizera Yesu Kristo kugira ngo mpinduke uwo ushaka ko mba we mu izina rya Yesu Kristo nsenze, amen.

08/10/2020

ICYIGISHO CYO KUWA 8/10 /2020 MURI God's Power Church

AMATEGEKO ATWARA ABATWARWA NA YO!

Rom 3:19
Tuzi yuko ibyo amategeko avuga byose abibwira abatwarwa na yo, kugira ngo akanwa kose kazibwe, kandi abari mu isi bose batsindirwe n'urubanza imbere y'Imana,

Iyo witegereje neza uyu murongo, usanga
1. Hari abantu batwarwa n'amategeko, n'
2. Abadatwarwa na yo.

Ese abatwarwa n'amategeko ni bande?
Ubwa mbere, amategeko yari yarahawe Abisirayeli kuko bari ibigande nk'uko Pawulo yabivuze neza muri 1 Tim 1:9
kandi tuzi ko amategeko atashyiriweho umukiranutsi, keretse abagome n'ibigande, n'abatubaha Imana n'abanyabyaha, n'abatari abera n'abatita ku by'Imana, n'abakubita ba se na ba nyina, n'abicanyi

Komera rero uhure n'amategeko niba uteye utya:
- Umugome,
- Ikigande,
- Utubaha Imana,
- Umunyabyaha,
- Utari uwera,
- Utita ku by'Imana,
- Ukubita se na nyina,
- Umwicanyi,
N'abandi nkabo ni bo barebwa n'amategeko.

Kuki?
√. Kuko amategeko atashyiriweho umukiranutsi,
√. Kuko amategeko adahesha gukiranuka,
√. Kuko ukiranuka aba arenze amategeko...

Ni bande batarebwa n'amategeko?
a. Abakiranutsi,
abantu bose bazi kubaho mu murongo ubagenewe imbere y'Imana kandi bakamenya gushyira ikintu mu mwanya wacyo, iby'Imana bakabika Imana n'iby'isi bakabiha nyirabyo.
b. Abizera.
Abizera nabo ntibarebwa n'amategeko kuko Bibiliya ivuga ko umukiranutsi abeshwaho no kwizera gusa.. (Habak 2:4, Abar 1:17, Abagal 3:11, Abaheb 10:38) ndetse ikongeraho ko
2 Abakor 5:7
( kuko tuba tugenda tuyoborwa no kwizera, tutayoborwa n'ibyo tureba) ,

Kubera iyo mpamvu nshuti zirikana ko Imana itagutegereje mu mategeko, ahubwo ko uyizera muri Kristo Yesu kugira ngo winjire mu Mwuka w'ubusabane na yo.
Wibuke kandi ko amategeko azana igihano kuko ahora areba uruhande rw'intege nke zawe akaguhana kuko atagira imbabazi, ariko mu kwizera wambara imbabazi za Kristo.

Mwami nshoboza kwiyambura ububi bwose bwankururira amategeko n'ibihano byayo; Mu izina rya Yesu Kristo nsenze, Amen.

Rev.Pastor NIYITEGEKA Simeon

11/08/2020