12/10/2025
پاکستان کی بہادر فوج نے پاکستان کی سرحدوں پر افغانستان کی حکومتی فورسزکے بھارتی سپانسرڈ حملے کو بھرپور طریقے سے ناکام بنا دیا۔
ژوب نیوز، 12 اکتوبر 2025: جدید ترین امریکی اسلحے سے لیس افغان فورسز نے بھارتی حکومت کی ملی بھگت سے پہلے سے منصوبہ بند طریقے سے پاکستان کی سرحدوں پر حملہ کیا جسے پاک فوج کے بہادر جوانوں نے سختی سے ناکام بنا دیا۔
پاک فوج کے بہادر جوانوں نے پاکستان کی سرحدوں کے قریب افغانستان میں موجود افغان فورسز کی تمام جنگی پوسٹوں کو تباہ کر دیا جو طویل عرصے سے پاکستان کے خلاف دہشت گردانہ کارروائیوں کے لیے استعمال ہو رہی تھیں۔
پاک سکیورٹی ذرائع کے مطابق افغان فورسز نے پاک افغان سرحد پر انگور اڈا، باجوڑ، کرم، دیر، چترال اوربلوچستان کے علاقے برام چاہ پر جدید ترین امریکی ہتھیاروں کا استعمال کیا اور بلا اشتعال فائرنگ کی ۔
افغانستان کی طرف سے فائرنگ کا مقصد خوارج کو پاکستان کی سرحد پار کرانا تھا تاہم پاک فوج اپنی چوکیوں پرچوکس اور تیار تھی جس نے فوری اور بھرپور جواب دیا۔
پاکستان، پاک -افغان سرحد پر خوارج اور داعش کے دہشت گردوں کے کیمپوں اور ٹھکانوں کو پیشہ ورانہ انداز میں نشانہ بنا رہا ہے اور افغان فورسز کئی علاقوں سے پسپائی اختیار کر چکی ہیں۔
سکیورٹی ذرائع کا کہنا ہے کہ پاک فوج کی بروقت کارروائی سے افغانستان میں متعدد سرحدی چوکیاں تباہ ، 19 افغان سرحدی چوکیوں پر پاک فوج کے بہادر جوانوں نے قبضہ کر لیا، اور بہت سے افغان فوجی اور خوارج ہلاک ہوگئے ، طالبان اپنی کئی چوکیاں چھوڑ کر علاقے سے فرار ہوگئے ہیں جبکہ ان کی لاشیں بکھری پڑی ہیں۔
پاکستان ٹیلی ویژن (پی ٹی وی) کی طرف سے نشر کی جانے والی ایک ویڈیو میں افغان پوسٹوں کو شعلوں میں بھڑکتے طالبان فوجیوں کو دکھایا گیا ہے جو مبینہ طور پر کرم میں ہتھیار ڈال رہے ہیں۔
افغانستان کی جانب سے یہ جارحیت ایسے وقت میں کی جا رہی ہے جب افغان وزیر خارجہ بھارت کے دورے پر ہیں۔
