Sukkur Union of Journalists -SUJ

Sukkur Union of Journalists -SUJ Nonprofit Organization

سکھر یونین آف جرنلسٹس (ایس یو جے) کے زیر اہتمام پاکستان فیڈرل یونین آف جرنلسٹس (پی ایف یو جے) کے 76ویں یومِ تاسیس اور آز...
02/08/2026

سکھر یونین آف جرنلسٹس (ایس یو جے) کے زیر اہتمام پاکستان فیڈرل یونین آف جرنلسٹس (پی ایف یو جے) کے 76ویں یومِ تاسیس اور آزادیٔ صحافت کی جدوجہد کے سلسلے میں سکھر پریس کلب میں ایک پروقار سیمینار منعقد ہوا، جس میں صحافیوں، وکلا، سیاسی و مذہبی رہنماؤں، تاجر برادری اور سول سوسائٹی نے بڑی تعداد میں شرکت کی۔ سیمینار میں پی ایف یو جے کے مرکزی سیکریٹری فنانس لالہ اسد پٹھان، سکھر یونین آف جرنلسٹس کے صدر جاوید جتوئی، جمعیت علمائے اسلام (جے یو آئی) سندھ کے سیکریٹری جنرل علامہ راشد محمود سومرو اور سندھ ہائی کورٹ بار ایسوسی ایشن سکھر کے صدر قربان ملانو کے علاوہ سکھر پریس کلب کے صدر خالد بھانبھن، وومن یونین آف جرنلسٹس کی صدر سحرش کھوکھر، پیپلز پارٹی و سول سوسائٹی کی رہنما غزالہ انجم، مسلم لیگ (ن) کے رہنما خورشید میرانی اور اسمال ٹریڈرز کے صدر جاوید میمن نے خطاب کیا۔ ​سیمینار سے خطاب کرتے ہوئے پی ایف یو جے کے مرکزی سیکریٹری فنانس لالہ اسد پٹھان نے کہا کہ پی ایف یو جے گزشتہ 76 برس سے آزادیٔ صحافت، جمہوریت اور آئین کی بالادستی کے لیے مسلسل جدوجہد کر رہی ہے۔ انہوں نے کہا کہ صحافیوں نے کوڑے کھائے اور جیلیں کاٹیں مگر اپنے اصولوں پر سمجھوتہ نہیں کیا۔ انہوں نے شہید جان محمد مہر سمیت ملک بھر میں شہید ہونے والے 192 صحافیوں کے قاتلوں کی فوری گرفتاری اور سزا کا مطالبہ کرتے ہوئے کہا کہ عوامی مسائل، مہنگائی اور بے روزگاری سے توجہ ہٹانے کے لیے نئے تنازعات پیدا کیے جا رہے ہیں، جبکہ سوشل میڈیا کے ذمہ دارانہ استعمال اور اخلاقیات کی پاسداری بھی وقت کی اہم ضرورت ہے۔ سکھر یونین آف جرنلسٹس کے صدر جاوید جتوئی نے تمام شرکا کا شکریہ ادا کرتے ہوئے کہا کہ سکھر پریس کلب ہمیشہ آمریت اور سنسرشپ کے خلاف جدوجہد کا مرکز رہا ہے اور ایس یو جے صحافی برادری کے حقوق کے لیے ہمیشہ پیش پیش رہے گی۔
​جے یو آئی سندھ کے سیکریٹری جنرل علامہ راشد محمود سومرو نے اپنے خطاب میں کہا کہ سچ بولنے پر صحافیوں کو نشانہ بنایا جا رہا ہے، حکومت اگر شہید جان محمد مہر کے قاتلوں کو گرفتار نہیں کر سکتی تو یہ اس کی کھلی ناکامی ہے، انہوں نے ملک میں قانون کی یکساں بالادستی پر زور دیا۔ سندھ ہائی کورٹ بار ایسوسی ایشن سکھر کے صدر قربان ملانو نے کہا کہ حقیقی آزادی تب ممکن ہوگی جب میڈیا پر سے ہر قسم کی سنسرشپ کا خاتمہ ہوگا اور صحافت کو اخلاقی و شائستہ اصولوں پر استوار کیا جائے گا۔ دیگر مقررین خالد بھانبھن، سحرش کھوکھر، غزالہ انجم، خورشید میرانی اور جاوید میمن نے بھی پی ایف یو جے کی تاریخی جدوجہد کو سراہتے ہوئے شہید جان محمد مہر کو زبردست خراجِ عقیدت پیش کیا۔
​سیمینار کے موقع پر شہید جان محمد مہر کی برسی کے سلسلے میں قرآن خوانی اور دعائے مغفرت کی گئی، جبکہ اختتام پر ایک متفقہ قرارداد منظور کی گئی جس میں آزادیٔ صحافت کے تحفظ، سنسرشپ کے خاتمے، صحافیوں کے آئینی حقوق کی فراہمی اور شہید جان محمد مہر سمیت تمام شہید صحافیوں کے قاتلوں کو فوراً گرفتار کر کے قرار واقعی سزا دینے کا پرزور مطالبہ کیا گیا۔

سکھر یونین آف جرنلسٹس کا اہم اجلاس، 2 اگست کو سکھر پریس کلب میں ایف یو جے کا یوم تاسیس، ایتھکل جرنلزم کے عنوان سے سیمنار...
31/07/2026

سکھر یونین آف جرنلسٹس کا اہم اجلاس، 2 اگست کو سکھر پریس کلب میں ایف یو جے کا یوم تاسیس، ایتھکل جرنلزم کے عنوان سے سیمنار اور شہید جان محمد مہر کی برسی کی مناسبت سے قرآن خوانی و دعائیہ تقریب منعقد کرنے کا فیصلہ کیا گیا۔ اجلاس سے پی ایف یو جے کے سیکرٹری فائنانس لالا اسد پٹھان اور ایس یو جے کے صدر جاوید جتوئی کا خطاب۔

سکھر (پریس ریلیز) سکھر یونین آف جرنلسٹس کا ایک اہم اجلاس سکھر یونین آف جرنلسٹس کے صدر جاوید جتوئی کی صدارت میں منعقد ہوا۔ اجلاس میں پاکستان فیڈرل یونین آف جرنلسٹس کے سیکرٹری فائنانس لالا اسد پٹھان اور رکن ایف ای سی نصراللہ وسیر نے خصوصی طور پر شرکت کی، جبکہ سکھر یونین آف جرنلسٹس کے جنرل سیکریٹری کامران شیخ سکھر پریس کلب کے صدر خالد بھانبھن جنرل سیکریٹری احقر رضوی سمیت یونین اور پریس کلب کے عہدیداروں اور صحافیوں کی بڑی تعداد موجود تھی۔
اجلاس میں فیصلہ کیا گیا کہ پاکستان فیڈرل یونین آف جرنلسٹس کا یوم تاسیس 2 اگست کو سکھر یونین آف جرنلسٹس کے زیر اہتمام سکھر پریس کلب میں نہایت شایان شان طریقے سے منایا جائے گا۔ اس موقع پر "ایتھیکل جرنلزم (اخلاقی صحافت) اور پی ایف یو جے کا کردار" کے عنوان سے ایک فکر انگیز سیمینار منعقد کیا جائے گا جس میں وکلاء، سیاسی و سماجی تنظیموں کے رہنما، سول سوسائٹی کے نمائندے، عام شہری اور صحافی برادری بھرپور شرکت کرے گی۔ اجلاس میں سکھر کے شہید صحافی جان محمد مہر کی برسی سکھر پریس کلب میں عقیدت و احترام سے منانے کا بھی فیصلہ کیا گیا۔ شہید کی روح کے ایصال ثواب کے لیے قرآن خوانی، خیرات اور دعائیہ تقریب کا اہتمام کیا جائے گا جس میں صحافی برادری شہید صحافی جان محمد مہر کی صحافتی خدمات اور شجاعت کو شاندار الفاظ میں خراج تحسین پیش کرے گی۔ اجلاس سے خطاب کرتے ہوئے پاکستان فیڈرل یونین آف جرنلسٹس کے سیکریٹری فنانس لالا اسد پٹھان نے کہا کہ پاکستان فیڈرل یونین آف جرنلسٹس نے پاکستان میں ذرائع ابلاغ کی آزادی، انسانی حقوق، شہری آزادیوں اور جمہوری قدروں کے قیام و فروغ کے لیے ماضی میں لازوال قربانیاں دی ہیں پی ایف یو جے کے رہنماؤں اور صحافیوں نے کوڑے کھائے، قید و بند اور عقوبت خانوں کی سخت ترین سزائیں برداشت کیں لیکن کبھی اپنے اصولوں اور حق و صداقت کے پرچم کو جھکنے نہیں دیا۔ پی ایف یو جے کی ملک میں صحافت اور جمہوریت کی بحالی کے لیے خدمات تاریخ کا ایک روشن باب ہیں اجلاس سے خطاب کرتے ہوئے سکھر یونین آف جرنلسٹس کے صدر جاوید جتوئی نے صحافتی اصولوں اور ایتھیکل جرنلزم کی اہمیت پر مفصل روشنی ڈالی۔ انہوں نے "ایجنڈا جرنلزم" کے خطرناک اثرات اور نقصانات کی نشاندہی کرتے ہوئے کہا کہ مخصوص ایجنڈوں یا ذات و مفادات کے تحت کی جانے والی صحافت غیر جانبدارانہ صحافت کی روح کے منافی ہے۔ یہ نہ صرف صحافت کے مقدس پیشے کی ساکھ کو نقصان پہنچاتی ہے بلکہ عوام کا صحافتی اداروں پر سے اعتماد متزلزل کرتی ہے اور معاشرتی بگاڑ کا باعث بنتی ہے۔ صحافیوں کو صرف اور صرف سچائی، عوامی مفاد اور اخلاقی اصولوں کو اپنا شعار بنانا چاہیے پی ایف یو جے کے رہنما لالا اسد پٹھان نے پی ایف یو جے کے یوم تاسیس کے سیمینار اور شہید جان محمد مہر کی برسی کے تمام پروگراموں کو منظم اور شایان شان انداز میں منعقد کرنے، قرآن خوانی و خیرات کے اہتمام کے لیے سکھر یونین آف جرنلسٹس اور سکھر پریس کلب کی قیادت کو تمام تر ترتیبات مکمل کرنے کی ہدایات جاری کیں اور تمام صحافی برادری سے ان تمام پروگرامز میں بھرپور شرکت کی اپیل کی اس موقع پر سکھر پریس کلب کے خازن کاشف پھلپوٹو، نائب صدر فرید سومرو، سینیئر صحافی سلیم سھتو، جوائنٹ سیکریٹری شاہد چنہ، ایس یو جے کے نائب صدر اسحاق کھوسو، خازن شہزاد تابانی، جوائنٹ سیکریٹری جہانزیب وسیر، رضوان لودھی، فقیر مشتاق منگریو، قاضی ضیاءالرحمان، صلاح الدین سمیجو، عبدالغفور شیخ، ایاز مغل، انس ملک، رخسار عباسی، شعیب ملک و دیگر صحافیوں نے شرکت کی

جاری کردہ:
کامران شیخ
جنرل سیکریٹری
سکھر یونین آف جرنلسٹس

سکھر یونین آف جرنلسٹس کے صدر جاوید جتوئی کو محکمہ صحت کیجانب سے عوامی مفاد عامہ کے موضوع پر حقائق پر مبنی رپورٹ نشر کرنے...
06/06/2026

سکھر یونین آف جرنلسٹس کے صدر جاوید جتوئی کو محکمہ صحت کیجانب سے عوامی مفاد عامہ کے موضوع پر حقائق پر مبنی رپورٹ نشر کرنے کی پاداش میں دھمکی آمیز لیگل نوٹس ارسال،
سکھر یونین آف جرنلسٹس اور مجلس عاملہ کیجانب سے سخت مذمت، آزادی صحافت پر قدغن قرار۔
زباں بندی کسی صورت قبول نہیں، گرفتاریوں سے ڈرنے والے نہیں ہیں، کلمہ حق بلند کرتے رہیں گے۔ جاوید جتوئی صدر ایس یو جے۔

سکھر یونین آف جرنلسٹس کے صدر جاوید جتوئی، جنرل سیکیریٹری کامران شیخ، خازن شہزاد تابانی، سکھر پریس کلب کے صدر خالد بھانبن، جنرل سیکریٹری احقر رضوی، اور خازن، کاشف پھلپوٹو سمیت مجلس عاملہ کی جانب سے محکمہ صحت حکومتِ سندھ کے اس آمرانہ اقدام کی شدید ترین الفاظ میں مذمت کی گئی ہے جس کے تحت ایس یو جے صدر جاوید جتوئی کو ایچ آئی وی (HIV) ایڈز جیسے حساس اور عوامی مفاد کے موضوع پر حقائق پر مبنی رپورٹ نشر کرنے کی پاداش میں دھمکی آمیز لیگل نوٹس ارسال کیا گیا ہے۔ ایس یو جے کی قیادت اور مجلس عاملہ نے متفقہ طور پر اس اقدام کو اظہارِ رائے کی آزادی پر قدغن اور آزادیِ صحافت پر سیدھا وار قرار دیتے ہوئے واضح کیا ہے کہ "آئینہ دکھایا تو برا مان گئے" کے مصداق محکمہ صحت اپنی ناکامیاں چھپانے کے لیے خبر کو سوشل میڈیا سے ہٹانے اور غیر مشروط معافی مانگنے جیسے اوچھے ہتھکنڈوں اور قانونی کارروائی کی دھمکیوں پر اتر آیا ہے، جسے صحافی برادری کسی صورت تسلیم نہیں کرے گی۔​ایس یو جے کے رہنماؤں نے اپنے مشترکہ مذمتی بیان میں کہا ہے کہ پاکستان پیپلز پارٹی ہمیشہ سے جمہوریت پر یقین رکھنے والی جماعت رہی ہے اور خود سکھر یونین آف جرنلسٹس نے ہمیشہ جمہوری رویوں، جمہوری روایات اور قانون کی بالادستی کے لیے صفِ اول میں رہ کر جدوجہد کی ہے۔ ایس یو جے کے رہنماؤں نے ہمیشہ آمرانہ رویوں کے خلاف تاریخی تحریکیں چلائی ہیں، ہر دور کے آمر کے سامنے کلمۂ حق بلند کیا ہے اور اس پاداش میں جیلوں کی سختیاں تک برداشت کی ہیں، مگر افسوس کے ساتھ کہنا پڑ رہا ہے کہ آج کے اس جمہوری دور میں جمہوریت روایات کی امین پیپلزپارٹی کی جانب سے ایسے ہتھکنڈے استعمال کیے جا رہے ہیں جن کا مقصد صحافیوں کی زباں بندی کرنا ہے۔ ایس یو جے صدر جاوید جتوئی، جنرل سیکریٹری کامران شیخ اور خازن شہزاد تابانی نے اپنے عزم کا اعادہ کرتے ہوئے کہا ہے کہ عوامی مفاد میں سچ لکھنا اور بولنا ہمارا آئینی حق ہے اور ہم اس حق کا دفاع ہر فورم پر کریں گے۔ سکھر یونین آف جرنلسٹس کی مجلس عاملہ پاکستان پیپلز پارٹی کی اعلیٰ قیادت، وزیر اعلیٰ سندھ اور صوبائی وزیر صحت سے پرزور مطالبہ کرتی ہے کہ وہ اس غیر جمہوری رویے کا فوری نوٹس لیں اور آزادیِ صحافت کے منافی اس لیگل نوٹس کو فی الفور واپس کروایا جائے، بصورتِ دیگر صحافی برادری اپنے حقوق کے تحفظ کے لیے احتجاج کا راست اختیار کرنے پر مجبور ہوگی۔
​جاری کردہ:
ترجمان
سکھر یونین آف جرنلسٹس

(پریس رلیز) سکھر: سینئر صحافی زاہد حسین سہتو کا انتقال، سکھر یونین آف جرنلسٹس کیجانب سے گہرے دکھ کا اظہار۔​پاکستان فیڈرل...
23/05/2026

(پریس رلیز) سکھر: سینئر صحافی زاہد حسین سہتو کا انتقال، سکھر یونین آف جرنلسٹس کیجانب سے گہرے دکھ کا اظہار۔
​پاکستان فیڈرل یونین آف جرنلسٹس کے سیکریٹری فنانس لالا اسد پٹھان، سکھر یونین آف جرنلسٹس کے صدر جاوید جتوئی، جنرل سیکرٹری کامران شیخ، خازن شہزاد تابانی رکن (ایف ای سی) پی ایف یو جے نصراللہ وسیر اور (ایس یو جے) مجلس عاملہ کے تمام اراکین نے نارا یونین آف جرنلسٹس کے سابق صدر اور ممتاز صحافی زاہد حسین سہتو کے اچانک انتقال پر گہرے دکھ اور افسوس کا اظہار کیا ہے۔
​سکھر یونین آف جرنلسٹس کی جانب سے جاری کردہ تعزیتی بیان میں کہا گیا ہے کہ زاہد حسین سہتو ایک بہترین انسان، بے باک صحافی اور متحرک یونینسٹ تھے۔ انہوں نے اپنی زندگی کا ایک بہت بڑا حصہ صحافت کی نذر کیا اور ہمیشہ حق و سچ کا علم بلند رکھا۔ ان کی وفات سے صحافتی دنیا میں ایک ایسا خلا پیدا ہوا ہے جسے مدتوں پُر نہیں کیا جا سکے گا۔ جاری کردہ ​بیان میں کہا گیا کہ زاہد حسین سہتو سکھر یونین آف جرنلسٹس کا ایک بیش قیمت اثاثہ تھے۔ انہوں نے ایس یو جے (SUJ) کے پلیٹ فارم سے صحافی برادری کے حقوق اور فلاح و بہبود کے لیے جو گراں قدر خدمات سرانجام دیں، انہیں صحافتی تاریخ میں ہمیشہ یاد رکھا جائے گا۔ ان کی وفات نے پوری صحافی برادری کو غم میں مبتلا کر دیا ہے۔ واضح رہے کہ مرحوم زاہد حسین سہتو گزشتہ کچھ روز سے شدید علالت کے باعث ہسپتال میں زیرِ علاج تھے، جہاں وہ جانبر نہ ہو سکے اور خالقِ حقیقی سے جا ملے۔ ایس یو جے کے تمام عہدیداران اور ممبران دکھ کی اس مشکل گھڑی میں سوگوار خاندان کے غم میں برابر کے شریک ہیں۔ اللہ تبارک و تعالیٰ سے دعا ہے کہ وہ مرحوم کی مغفرت فرمائے، انہیں جنت الفردوس میں اعلیٰ مقام عطا کرے اور پسماندگان کو یہ صدمہ صبرِ جمیل اور استقامت سے برداشت کرنے کی توفیق عطا فرمائے۔ (آمین)

جاری کردہ
شعبہ نشر و اشاعت
سکھر یونین آف جرنلسٹس

03/05/2026

عالمی یومِ آزادیِ صحافت سکھر یونین آف جرنلسٹس کا سکھر پریس کلب کے سامنے بھرپور احتجاج
سکھر کے صحافی ہمیشہ کی طرح متحد ہیں اور آزادیِ صحافت پر کوئی سمجھوتہ نہیں کیا جائے گا۔ جاوید جتوئی صدر ایس یو جے۔

سکھر( ) عالمی یومِ آزادیِ صحافت کے موقع پر سکھر یونین آف جرنلسٹس کے صدر جاوید جتوئی اور سکھر پریس کلب کے صدر خالد بھانبن کی مشترکہ قیادت میں احتجاجی مظاہرہ کیا گیا، جس میں صحافیوں کی بڑی تعداد نے شرکت کی۔ مظاہرے کے شرکاء نے ہاتھوں میں بینرز اور پلے کارڈز اٹھا رکھے تھے جن پر صحافیوں کے تحفظ اور آزادیِ صحافت کے حق میں نعرے درج تھے احتجاج کے دوران صحافی برادری نے "آزاد صحافت زندہ آباد"، "صحافیوں کا معاشی قتل بند کرو" اور "اظہارِ رائے پر پابندی نامنظور" کے فلک شگاف نعرے درج تھے، اس موقع پر سکھر پریس کلب اور سکھر یونین آف جرنلسٹس کے رہنماؤں نے اس عزم کا اعادہ کیا کہ وہ حق اور سچ کی آواز بلند کرنے کے لیے کسی بھی قربانی سے دریغ نہیں کریں گے۔ مقررین کا کہنا تھا کہ آزاد صحافت جمہوریت کا چوتھا ستون ہے، لیکن بدقسمتی سے آج صحافیوں کو شدید دباؤ، دھمکیوں اور سنسر شپ کا سامنا ہے۔انہوں نے حکومت سے مطالبہ کیا کہ صحافیوں کے تحفظ کے لیے بنائے گئے قوانین پر سختی سے عملدرآمد کروائے۔اور فرائض کی ادائیگی کے دوران شہید ہونے والے صحافیوں کے مقدمات کو منطقی انجام تک پہنچایا جائے۔ رہنماؤں نے صحافیوں کے معاشی استحصال اور میڈیا ہاؤسز میں تنخواہوں کی عدم ادائیگی پر گہری تشویش کا اظہار کیا گیا۔ احتجاج میں سکھر یونین آف جرنلسٹس کے جنرل سیکرٹری کامران شیخ۔ فائنانس سیکرٹری شہزاد تابانی۔ نائب صدر پریس کلب فرید سومرو۔ فائنانس سیکرٹری کاشف علی۔ سمیت سینئر صحافیوں آصف ظہیر لودھی۔ غفور شیخ۔ جمیل مغل۔ فاروق سومرو ۔ علی شاہ۔ صدر کیمرا مین ایسوسی ایشن عمران شیخ۔ سیکرٹری بلاول بھٹی۔ یار محمد سومرو۔ جواد شاہ۔ شاہد علی ۔ شاہد چنو سمیت دیگر شامل تھے۔ مقررین کا کہنا تھا سکھر سمیت ملک بھر کی صحافی برادری ہمیشہ کی طرح متحد ہیں اور آزادیِ صحافت پر کوئی سمجھوتہ نہیں کیا جائے گا۔ یوم عالم صحافت پر سکھر پریس کلب کے عہدیداران، سکھر یونین آف جرنلسٹس کے ممبران، سینئر کالم نگاروں اور مقامی میڈیا سے وابستہ نمائندوں نے احتجاج اور تقریب میں کثیر تعداد میں شرکت کر کے صحافتی یکجہتی کا ثبوت دیا۔

جاری کردہ
ترجمان
سکھر یونین آف جرنلسٹس

توجہ طلب: اہم پیغام برائے عہدیداران/ سب یونٹس سکھر یونین آف جرنلسٹس۔ ​سکھر یونین آف جرنلسٹس کے تمام یونٹس کے معزز عہدیدا...
02/05/2026

توجہ طلب:
اہم پیغام برائے عہدیداران/ سب یونٹس سکھر یونین آف جرنلسٹس۔
​سکھر یونین آف جرنلسٹس کے تمام یونٹس کے معزز عہدیداران کو مطلع کیا جاتا ہے کہ "عالمی یومِ آزادیِ صحافت" کے موقع پر صحافتی اقدار کی سربلندی، میڈیا کی آزادی اور صحافیوں کے تحفظ و حقوق کے لیے احتجاج کی اپیل کرتے ہیں۔
​اس سلسلے میں تمام یونٹس سے التماس ہے کہ کل اپنے متعلقہ علاقوں میں احتجاجی مظاہروں کا انعقاد یقینی بنائیں۔
​ہدایات برائے احتجاج:
​بینرز: مظاہروں میں عالمی یومِ آزادیِ صحافت کی مناسبت سے بینرز کا استعمال لازمی کیا جائے۔
​مطالبات: بینرز اور پلے کارڈز پر "آزاد صحافت زندہ آباد" اور "صحافیوں کو تحفظ دو" جیسے مطالبات جلی حروف میں درج ہوں۔
​احتجاجی مظاہرے تمام علاقائی پریس کلبز اور یونین دفاتر کے سامنے منعقد کیے جائیں۔
​امید ہے کہ تمام یونٹس اس درخواست پر عمل کرتے ہوئے بھرپور احتجاجی مظاہرے منعقد کرواکر مثالی صحافتی اتحاد کا ثبوت دیں گے۔
​وسلام،
کامران شیخ
جنرل سیکریٹری

جاوید جتوئی
صدر
سکھر یونین یونین آف جرنلسٹس
​
​
​
​
​

**مزدوروں کے عالمی دن کے موقع پر سکھر یونین آف جرنلسٹس کا اعلامیہ** ایس یو جے نے ملک بھر میں مزدوروں کے حقوق کے لیے کام...
01/05/2026

**مزدوروں کے عالمی دن کے موقع پر سکھر یونین آف جرنلسٹس کا اعلامیہ**

ایس یو جے نے ملک بھر میں مزدوروں کے حقوق کے لیے کام کرنے والی تمام تنظیموں سے یکجہتی کا اظہار کیا اور عہد کیا کہ وہ محنت کشوں کے حقوق کی جدوجہد میں ہر سطح پر ان کا ساتھ دے گی۔

سکھر یونین آف جرنلسٹس (SUJ) مزدوروں کے عالمی دن کے موقع پر دنیا بھر کے محنت کشوں، خاص طور پر پاکستان کے مزدوروں اور صحافی برادری کے ان قلم کے مزدوروں کو خراج تحسین پیش کرتی ہے جو انتہائی مشکل حالات میں بھی معاشرے کی ترقی اور معلومات کی فراہمی کے لیے دن رات محنت کرتے ہیں۔

سکھر یونین آف جرنلسٹس کے صدر جاوید جتوئی جنرل سیکریٹری کامران شیخ، خازن شہزاد تابانی سمیت مجلس عاملہ کے تمام اراکین کی جانب سے جاری کردہ بیان میں کہا گیا ہے ایس یو جے حکومت پاکستان صنعتی اداروں اور نجی شعبے سے مطالبہ کرتی ہے کہ وہ مزدوروں کے بنیادی حقوق، منصفانہ اجرت، محفوظ کام کے ماحول اور سماجی تحفظ کو یقینی بنانے کے لیے فوری اقدامات کریں۔ خاص طور پر صحافی برادری جو اکثر غیر محفوظ ملازمت کے حالات، تنخواہوں میں تاخیر اور پیشہ ورانہ خطرات کا سامنا کرتی ہے، کے مسائل کو ترجیحی بنیادوں پر حل کیا جائے،

جاری کردہ اعلامیہ میں واضع کیا گیا ہے کہ سکھر یونین آف جرنلسٹس صحافتی اداروں کیلئے مالی مشکلات پیدا کرنے جیسے تمام حربوں کیخلاف منظم جدوجہد کا عزم کرتی ہے سکھر یونین آف جرنلسٹس پریس اور اظہار رائے کی آزادی کے لئے ماضی کی طرح بھرپور جدوجہد جاری رکھے گی اور ملک بھر میں صحافی برادری کے آئینی حقوق کے لئے ہمیشہ کی طرح اپنا کردارادا کریگی انہوں نے کہا کہ صحافتی تنظیموں نے ہمیشہ ڈیموکریسی کو مضبوط کرنے میں اپنا کردار ادا کیا ہے جمہوری ادوار میں صحافت کیخلاف سازشیں صحافی دشمن پیکا جیسے کالے قوانین کے تحت صحافیوں کی گرفتاریاں اور قلم کے مزدوروں کا معاشی و جسمانی قتل عام انتہائی نامناسب عمل ہے جس کی مذمت کرتے ہیں سکھر یونین آف جرنلسٹس کیجانب سے جاری کردہ بیان میں کہا گیا کہ حکومت کیجانب سے میڈیا دشمن حکمت عملی کی وجہ سے ہزاروں صحافی بے روزگار اور سینکڑوں میڈیا ہاؤسز بند ہوچکے ہیں، سکھر یونین آف جرنلسٹس کے صدر جاوید جتوئی جنرل سیکریٹری کامران شیخ اور خازن شہزاد تابانی نے اپنے مشترکہ بیان میں کہا کہ مزدور طبقہ کسی بھی معاشرے کی ریڑھ کی ہڈی ہے، بدقسمتی سے پاکستان میں محنت کشوں، خاص طور پر صحافیوں اور میڈیا ورکرز کو مسلسل استحصال، مالی عدم تحفظ کا سامنا ہے۔ ہم حکومت سے مطالبہ کرتے ہیں کہ صنعتی اصلاحات اور مزدور قوانین کو مؤثر طریقے سے نافذ کیا جائے، کم از کم اجرت کو موجودہ معاشی حالات کے مطابق بڑھایا جائے، اور صحافیوں کے خلاف غیر قانونی کارروائیوں کو روکا جائے، یونین نے زور دیا کہ تمام مزدوروں، بشمول صحافیوں، کو پرسکون اور محفوظ ماحول میں کام کرنے کا حق دیا جائے۔
معاشی بحران کے باوجود اجرتوں میں اضافہ کیا جائے اور تنخواہوں کی بروقت ادائیگی یقینی بنائی جائے۔ صحافیوں کے خلاف تشدد، ہراسانی یا غیر قانونی گرفتاری کے واقعات روکے جائیں اور ذمہ داروں کو قرار واقعی سزا دی جائے۔ ایس یو جے نے ملک بھر میں مزدوروں کے حقوق کے لیے کام کرنے والی تمام تنظیموں سے یکجہتی کا اظہار کیا اور عہد کیا کہ وہ محنت کشوں کے حقوق کی جدوجہد میں ہر سطح پر ان کا ساتھ دے گی۔

جاری کردہ
جاويد جتوئی
صدر
سکھر یونین آف جرنلسٹس

کامران شیخ
جنرل سیکریٹری
سکھر یونین آف جرنلسٹس

​
​ Lala Asad Pathan Lala Asad Pathan Afzal Butt

Address

Sukkur Press Club Sukkur
Sukkur

Telephone

+92715622995

Website

Alerts

Be the first to know and let us send you an email when Sukkur Union of Journalists -SUJ posts news and promotions. Your email address will not be used for any other purpose, and you can unsubscribe at any time.

Contact The Organization

Send a message to Sukkur Union of Journalists -SUJ:

Shortcuts

Share

Category