02/05/2026
تحریک تحفظِ حقوقِ چترال کے زیرِ انتظام تمام معزز ممبران اور چترالی عوام کو آگاہ کیا جاتا ہے کہ چیئرمین جناب پیر مختار نبی کی زیرِ نگرانی تنظیم کو مزید منظم، فعال اور مؤثر بنانے کے لیے حلقہ بندی، ممبر سازی اور تنظیمی ڈھانچے کی تشکیل کا عمل جاری ہے۔
اس سلسلے میں سب سے پہلے شوریٰ کمیٹی کی تشکیل عمل میں لائی جا رہی ہے جس کے ارکان کی کم از کم تعداد 15 مقرر کی گئی ہے۔ شوریٰ کمیٹی تحریک کا ایک اہم مشاورتی شعبہ ہے جس کی بنیادی ذمہ داری تنظیم کو فعال رکھنا، ممبر سازی کو فروغ دینا، حلقہ جات کے ذریعے تنظیم کو وسعت دینا اور چترالی عوام کو درپیش مسائل پر مشاورت کے ذریعے مؤثر لائحۂ عمل ترتیب دینا ہے۔
اس کے بعد مرکزی کابینہ کی تشکیل کی جائے گی جس میں عہدیداران کی تعداد تقریباً 10 رکھی گئی ہے۔ مرکزی کابینہ کی ذمہ داری شوریٰ کمیٹی کے فیصلوں پر عمل درآمد کو یقینی بنانا، تمام حلقہ جات کو فعال رکھنا اور تنظیم کے داخلی امور کی نگرانی کرنا ہوگی۔
مزید برآں تنظیم کے دائرۂ کار کو وسیع کرتے ہوئے چترال کے اندر وی سی، یو سی، تحصیل اور ضلع سطح پر حلقہ جات کی تشکیل دی جائے گی جبکہ چترال سے باہر پشاور، اسلام آباد، لاہور، کراچی اور بیرونِ ملک مقیم چترالیوں کے لیے بھی باقاعدہ تنظیمی حلقے قائم کیے جائیں گےتاکہ تحریک ایک مضبوط منظم اور باوقار پلیٹ فارم کے طور پر سامنے آ سکے۔
تحریک تحفظِ حقوقِ چترال کا بنیادی مقصد چترالی عوام کو درپیش مسائل کی نشاندہی کرنا ان کے حل کے لیے مؤثر آواز بلند کرنا اور ان کے بنیادی حقوق کا تحفظ یقینی بنانا ہے۔
لہٰذا تمام ممبران اور چترالی بہن بھائیوں سے مؤدبانہ گزارش ہے کہ اس تنظیمی عمل میں بھرپور ساتھ دیں تاکہ ہم مل کر ایک مضبوط اور متحد پلیٹ فارم کے ذریعے اپنے مسائل کے حل اور اپنے حقوق کے تحفظ کے لیے مؤثر کردار ادا کر سکیں۔
یہ بات بھی واضح کی جاتی ہے کہ تحریک تحفظِ حقوقِ چترال نہ کسی سیاسی جماعت کے خلاف ہے نہ حکومتِ وقت کے خلاف، اور نہ ہی کسی مسلکی، نسلی یا علاقائی تقسیم کی حمایت کرتی ہے۔ تحریک کا واحد مقصد چترالی عوام کے حقوق کا تحفظ اور ان کی خدمت ہے اور اس کا سیاست سے کوئی تعلق نہیں۔
آئیں ہم سب مل کر اختلافات سے بالاتر ہو کر ایک پلیٹ فارم پر متحد ہوں اور اپنے مشترکہ مسائل کے حل کے لیے اجتماعی جدوجہد کریں۔
تنظیم سازی کے اس عمل میں حصہ لینے اور ممبرشپ حاصل کرنے کے لیے شعبہ اطلاعات و نشریات سے رابطہ کریں۔
📞 رابطہ نمبر:03003000387
شعبہ اطلاعات و نشریات
تحریک تحفظِ حقوقِ چترال
