19/03/2026
*" سہ روزہ اعتکاف "*
امامیہ اسٹوڈنٹس آرگنائزیشن پاکستان خیبر پختونخوا ریجن ضلع کرم علیشاری الزھرا یونٹ کے زیر اہتمام حسبِ سابق، امسال بھی سرزمین شہداء علیشاری پستہ شگہ مسجد اصحابِ کساء میں رمضان المبارک کے آخری عشرے کا اعتکاف نہایت روحانی اور پرنور ماحول میں اختتام پذیر ہوگیا۔ , 31 فرزندانِ توحید نے عبادات، اذکار، اور مناجات میں مصروف رہتے ہوئے اپنی مغفرت، قوم و ملت کی فلاح و بہبود، اور امتِ مسلمہ کی بہتری کے لیے خصوصی دعائیں کیں۔
مسجد اصحاب کساء پستہ شگہ علیشاری پاراچنار میں ہونے والے اس اجتماعی اعتکاف میں مختلف مکاتبِ فکر کے افراد شریک ہوئے، جنہوں نے دن رات عبادات میں مشغول رہ کر رحمت و مغفرت کے لمحات سے فیض حاصل کیا۔ اس دوران مختلف علماء کرام نے معتکفین کی روحانی تربیت کی، انہیں دینی و علمی نکات سے روشناس کرایا، اور ایمان و یقین کو مزید مضبوط کرنے کے لیے مختلف دروس دیے۔
اعتکاف کے دوران روز و شب ذکر و اذکار، عبادات، اور خصوصی دعا و مناجات میں گزارے گئے، جس نے معتکفین کے دلوں کو سکون اور روح کو تازگی بخشی۔
اعتکاف کے اختتام پر مولانا سید نصرت حسین الحسینی ، آغا سید ماجد حسین الحسینی، ضلعی نائب صدر حمزہ عباس بسیجی، جی پی آئی صدر اقتدار حسین مہدوی، سابقہ ضلعی محبین انچارج سید قمر عباس صالح، مشران قوم ، جوانانِ قوم نے شرکت کی _ تمام معتکفین اللہ تعالیٰ سے رحمت و مغفرت کی امید لیے اپنے گھروں کو روانہ ہوگئے۔
اہلِ ایمان کا یہ عقیدہ ہے کہ رمضان المبارک کے آخری ایام خصوصی برکات و رحمتوں کے حامل ہوتے ہیں، اور اعتکاف ان لمحات کو مزید بابرکت بنانے کا بہترین ذریعہ ہے۔ دعا ہے کہ اللہ تعالیٰ تمام معتکفین کی عبادات و اعمال کو اپنی بارگاہ میں شرفِ قبولیت عطا فرمائے اور انہیں اجرِ عظیم سے نوازے۔ آمین۔
*امامیہ اسٹوڈنٹس آرگنائزیشن پاکستان خیبر پختونخوا ریجن، ضلع کرم پاراچنار علیشاری الزھرا یونٹ*
