08/05/2026
چھلت پائیں RCC پل کے تعمیراتی کام میں شروع سے ہی کئی مقامات پر ناقص میٹریل اور غیر معیاری کام کی شکایات سامنے آ رہی تھیں۔ عوام اور خصوصاً چھھلت پائیں یوتھ نے اس مسئلے کو سنجیدگی سے لیتے ہوئے ہریس پٹ میں ایگزیکٹو انجینئر کے سامنے باقاعدہ شکایت درج کروائی اور مطالبہ کیا کہ پل جیسے اہم منصوبے میں کسی قسم کی غفلت یا تھرڈ کلاس کام برداشت نہیں کیا جائے گا۔
شکایت کے بعد متعلقہ حکومتی افسران اور انجینئرنگ ٹیم نے پل کے تعمیراتی مقام کا تفصیلی دورہ کیا۔ معائنے کے دوران کئی جگہوں پر کام ناقص پایا گیا، جہاں تعمیراتی معیار سرکاری اصولوں اور حفاظتی تقاضوں کے مطابق نہیں تھا۔ حکام نے فوری نوٹس لیتے ہوئے ناقص حصوں کو دوبارہ تعمیر کرنے اور غیر معیاری کام کو مکمل طور پر ختم کرنے کی ہدایات جاری کیں۔
چھھلت پائیں یوتھ اور مقامی عوام نے واضح کیا کہ یہ پل علاقے کے عوام کے لیے ایک اہم اور بنیادی ضرورت ہے، اس لیے اس کی تعمیر میں کسی قسم کی کوتاہی، کرپشن یا غیر ذمہ داری قبول نہیں کی جائے گی۔ عوام کی بروقت آواز اٹھانے کی وجہ سے ناقص کام کو روکا گیا اور متعلقہ اداروں کو دوبارہ معیاری تعمیر پر مجبور ہونا پڑا۔
امید کی جا رہی ہے کہ اب پل کا باقی ماندہ کام مکمل معیار، مضبوطی اور شفافیت کے ساتھ مکمل کیا جائے گا تاکہ آنے والے کئی سالوں تک عوام اس سہولت سے محفوظ انداز میں فائدہ اٹھا سکیں۔
